ۇكىمەت باسشىسى اسقار مامين اكىمدىكتەر مەن جاۋاپتى مينيسترلەرگە بىرقاتار تاپسىرما بەردى، دەپ حابارلايدى "ادىرنا" ءتىلشىسى.
«بيىل داعدارىسقا قارسى قابىلدانعان شارالاردى ىسكە اسىرۋ حالىقتىڭ جۇمىسپەن قامتىلۋىن ساقتاۋعا ىقپال ەتتى. جۇمىسپەن قامتۋدىڭ جول كارتاسى قازاقستاندىقتاردىڭ كوبىنە جۇمىسى مەن تابىسىن ساقتاۋعا سەپتىگىن تيگىزدى، ەلەۋلى الەۋمەتتىك-ەكونوميكالىق تيىمدىلىگىن كورسەتتى. جول كارتاسىنىڭ جوبالارىن ىسكە اسىرۋ ءۇشىن قاجەتتى تاۋارلاردىڭ، جۇمىستار مەن قىزمەتتەردىڭ شامامەن 90%-ى وتاندىق وندىرۋشىلەردەن ساتىپ الىندى. جۇمىسپەن قامتۋدىڭ جول كارتاسىنىڭ شەڭبەرىندە شامامەن 6600 الەۋمەتتىك، كوممۋنالدىق جانە كولىكتىك ينفراقۇرىلىم وبەكتىسى سالىنىپ، رەكونسترۋكتسيادان وتكەن. جوبالار اياقتالعان سوڭ، ساباقتاس سالالاردا 100 مىڭ جۇمىس ورنى قۇرىلادى»،- دەدى اسقار مامين ۇكىمەت وتىرىسىندا.
پرەمەر-ءمينيستردىڭ ايتۋىنشا جالپى جۇمىسپەن قامتۋدى قولداۋ شارالارىن ىسكە اسىرۋ قارقىنى اتىراۋ، شىعىس قازاقستان، جامبىل، قىزىلوردا وبلىستارىندا، نۇر-سۇلتان جانە شىمكەنت قالالارىندا جاقسى.
ەڭبەك مينيسترلىگىنە مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، وسى جىلدىڭ سوڭىنا دەيىن 2021 جىلعا ارنالعان جۇمىسپەن قامتۋدىڭ جول كارتاسىن جاڭارتۋ جانە وندا تۇراقتى جۇمىس ورىندارىن قۇرۋعا باسا ءمان بەرۋ تاپسىرىلدى. بۇل رەتتە جوبالاردىڭ باسىم بولىگى اياقتالعاندىقتان، جۇمىسىنان بوساپ قالاتىن ادامداردى جۇمىسپەن قامتۋ شارالارىمەن قامتۋ كەرەكتىگى اتاپ ءوتىلدى.
ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، وسى جىلدىڭ سوڭىنا دەيىن بارلىق مەملەكەتتىك باعدارلامالاردىڭ جۇمىس ورىندارىن قۇرۋ بويىنشا ينديكاتورلارىن جاڭارتۋ، ءتيىستى ستاتيستيكالىق ەسەپكە الۋ جۇيەسىن ەنگىزۋ، سونداي-اق جۇمىس ورىندارىن قۇرۋدىڭ وڭىرلىك كارتالارىن ازىرلەپ، بەكىتۋ تاپسىرىلدى.
"ادىرنا" ۇلتتىق پورتالى
