Úkimet basshysy Asqar Mamın ákimdikter men jaýapty mınıstrlerge birqatar tapsyrma berdi, dep habarlaıdy "Adyrna" tilshisi.
«Bıyl daǵdarysqa qarsy qabyldanǵan sharalardy iske asyrý halyqtyń jumyspen qamtylýyn saqtaýǵa yqpal etti. Jumyspen qamtýdyń jol kartasy qazaqstandyqtardyń kóbine jumysy men tabysyn saqtaýǵa septigin tıgizdi, eleýli áleýmettik-ekonomıkalyq tıimdiligin kórsetti. Jol kartasynyń jobalaryn iske asyrý úshin qajetti taýarlardyń, jumystar men qyzmetterdiń shamamen 90%-y otandyq óndirýshilerden satyp alyndy. Jumyspen qamtýdyń jol kartasynyń sheńberinde shamamen 6600 áleýmettik, kommýnaldyq jáne kóliktik ınfraqurylym obektisi salynyp, rekonstrýkııadan ótken. Jobalar aıaqtalǵan soń, sabaqtas salalarda 100 myń jumys orny qurylady»,- dedi Asqar Mamın Úkimet otyrysynda.
Premer-mınıstrdiń aıtýynsha jalpy jumyspen qamtýdy qoldaý sharalaryn iske asyrý qarqyny Atyraý, Shyǵys Qazaqstan, Jambyl, Qyzylorda oblystarynda, Nur-Sultan jáne Shymkent qalalarynda jaqsy.
Eńbek mınıstrligine múddeli memlekettik organdarmen jáne ákimdiktermen birlesip, osy jyldyń sońyna deıin 2021 jylǵa arnalǵan Jumyspen qamtýdyń jol kartasyn jańartý jáne onda turaqty jumys oryndaryn qurýǵa basa mán berý tapsyryldy. Bul rette jobalardyń basym bóligi aıaqtalǵandyqtan, jumysynan bosap qalatyn adamdardy jumyspen qamtý sharalarymen qamtý kerektigi atap ótildi.
Ulttyq ekonomıka mınıstrligine múddeli memlekettik organdarmen jáne ákimdiktermen birlesip, osy jyldyń sońyna deıin barlyq memlekettik baǵdarlamalardyń jumys oryndaryn qurý boıynsha ındıkatorlaryn jańartý, tıisti statıstıkalyq esepke alý júıesin engizý, sondaı-aq jumys oryndaryn qurýdyń óńirlik kartalaryn ázirlep, bekitý tapsyryldy.
"Adyrna" ulttyq portaly
