25 قازان – الەۋمەتتىك قىزمەت كورسەتۋ سالاسى قىزمەتكەرلەرى كۇنى.
الەۋمەتتىك قىزمەتكەر – بۇل تەك كاسىپ يەسى عانا ەمەس، وزگەنىڭ مۇڭ-مۇقتاجىنا بەيجاي قاراي المايتىن مەيىربان جان. حالىقتى الەۋمەتتىك تۇرعىدان جان-جاقتى قورعاۋ ۇكىمەتىمىز جۇرگىزىپ وتىرعان سىندارلى ساياساتتىڭ باسىم باعىتتارىنىڭ ءبىرى بولىپ تابىلادى. سوندىقتان دا، ءبىزدىڭ ەلىمىزدە قارتتار مەن از قامتىلعان وتباسىلاردى، مۇگەدەكتەر مەن بالالاردى قورعاۋدىڭ ناقتى جۇيەسى قالىپتاسقان.
الەۋمەتتىك قىزمەت كورسەتۋ سالاسى قىزمەتكەرلەرىنىڭ كاسىبي مەرەكەسى قازان ايىنىڭ سوڭعى جەكسەنبىسىندە تويلاناتىن كاسىبي مەرەكەلەردىڭ ءبىرى. بۇل مەرەكە 2011 جىلدان بەرى اتالىپ كەلەدى.
«الەۋمەتتىك سالا قىزمەتكەرى» دەسەك، قوعام ومىرىندە بولىپ جاتقان مəسەلەلەرگە ءاتۇستى قاراماي، مەملەكەتىمىزدىڭ ءəربىر كومەككە زəرۋ جاندارىنا قول ۇشىن سوزاتىن ادامدار كوز الدىمىزعا كەلەدى. بۇگىنگى تاڭدا، تاعدىر تاۋقىمەتىن تارتقان، ءتۇرلى جاعدايلارعا تاپ بولعان نەمەسە مۇمكىندىگى شەكتەۋلى جانداردى كورگەنىمەن، كومەك كورسەتۋگە قۇلىق تانىتا قويمايتىندار دا بارشىلىق. ال، ءبىز تىلگە تيەك ەتكەلى وتىرعان «əلەۋمەتتىك سالانىڭ» پۇشپاعىن يلەپ جۇرگەن قىزمەتكەرلەر بولسا، وسىنداي جاندارمەن بىرگە بىتە قايناسىپ ءومىر سۇرەدى. وسىنداي كوزگە كورىنە بەرمەس، قيىندىعى كوپ جۇمىستى ەڭسەرىپ جۇرگەن الەۋمەتتىك سالا قىزمەتكەرىنىڭ ءبىرى - تاڭسىقباەۆا داميرا بازاربايقىزى.
داميرا بۇل سالاعا 2003 جىلى قازاقستان-رەسەي حالىقارالىق ۋنيۆەرسيتەتىنەن ەكونوميست ديپلومىن الىپ، جۇمىس ىزدەپ كەلىپ، كەزدەيسوق ورنالاسقان بولاتىن. جۇمىسىن جاقسى كورىپ كەتكەنى سونشا، قازىر باسقا سالانى ايتسا، بارماس تا ەدى... سەبەبى مۇندا ول مۇمكىندىگى شەكتەۋلى جاندارعا جاردەماقىلار تولەۋ بويىنشا جۇمىسپەن اينالىسادى... «ازاماتتارعا ارنالعان ۇكىمەت» مك كەاق الماتى قالاسى فيليالى المالى اۋداندىق الەۋمەتتىك تولەمدەردى ۆەدومستۆوارالىق ەسەپتەۋ بولىمىندە قىزمەت ەتە وتىرىپ، كوپتەگەن تاعدىرلى جاندارعا قول ۇشىن بەرەدى. ولاردىڭ كۇندەلىكتى تۇرمىس-تىرشىلىگىنە قولعابىس جاساپ، ومىرىنە ەتەنە ارالاسادى، قايعىسىمەن ءبولىسىپ، وڭالىپ كەتۋىنە ىقپال جاسايدى.
«مۇمكىندىگى شەكتەۋلى جانداردىڭ جىل سايىنعى تولەمدەرىن دەر كەزىندە تولەنۋىنە ەرەكشە ءمان بەرەمىن. قانداي دا ءبىر سەبەپپەن كەشىگىپ قالۋىنىڭ الدىن الىپ وتىرامىن. اۋدانداعى 3587 قاجەتتىلىگى بار جاندارعا، 608 مۇگەدەك بالالاردى تاربيەلەۋشىلەرگە جانە 1-توپتاعى تۋعاننان مۇگەدەكتىگى بار 141 ادامنىڭ الەۋمەتتىك تولەمدەرىنىڭ ۋاقتىلى تولەنۋى مەنىڭ جاۋاپكەرشىلىگىمدە دەسەم بولادى. ولاردىڭ ءاربىرىنىڭ ومىرىنە وسىلاي ارالاسا وتىرىپ، ىزگىلىكتى ىسپەن اينالىسىپ وتىرعانىمدى سەزىنەمىن. سول جۇمىسىمنان وزىمە قۋات الامىن»، - دەيدى تاجىريبەلى مامان داميرا بازاربايقىزى.
ول الەۋمەتتىك سالاداعى قاجىرلى ەڭبەگى ءۇشىن دەنساۋلىق ساقتاۋ مينيسترلىگىنىڭ، «الەۋمەتتىك ەڭبەك سالاسىنىڭ ۇزدىگى» توسبەلگىسىمەن، سالالىق مينيسترلىكتەردىڭ قۇرمەت گراموتالارىمەن ماراپاتتالعان. ۇجىمدا قوعامدىق جۇمىستاردىڭ بەلسەندىسى. وتباسىندا سۇيىكتى جار، اياۋلى انا. جولداسى جاسۇلان قورعانى، ەكى قۇلىنشاعى – ەلنۇرى مەن دارىنى قوس قاناتى. بوس ۋاقىتىندا كىتاپ وقىپ، تىگىن تىگىپ، تابيعاتتا سەرۋەندەگەندى جاقسى كورەدى.
مەيىربان جاندار مەرەكەسى قارساڭىندا، وسى سالانىڭ ساڭلاقتارىنىڭ ءبىرى داميرا بازاربايقىزىنا ەڭبەگىنىڭ جەمىسىن، وتباسىنىڭ باقىتىن تىلەيمىز!
ءيا، اقىل-ەسىن جوعالتىپ، قۇلدىققا سالىنعانداردى ەلىنە قايتاراتىن دا، قۇجاتتارىن قايتا جاساتاتىن دا، حالىقتىڭ ءالسىز توپتارىنا كومەكتەسەتىن دە، ناۋقاس ادامنىڭ قوعامعا قايتا بەيىمدەلۋىنە جاعداي جاسايتىن دا – وسى الەۋمەتتىك جۇمىس ماماندارى. سوندىقتان، تەك مەرەكە قارساڭىندا عانا ەمەس، ەڭبەگىن ەلەپ، ناردىڭ جۇگىندەي اۋىر مىندەتتى ارقالاپ جۇرگەن قىزمەتكەرلەر بارلىق كەزدە قۇرمەتكە لايىقتى دەر ەدىك.
"ەلىمىزدەگى ميلليونداعان ادامداردىڭ ءومىر ءسۇرۋ ساپاسى، ولاردىڭ الەۋمەتتىك كوڭىل-كۇيى، ەرتەڭگى كۇنگە دەگەن سەنىمى الەۋمەتتىك قىزمەتكەرلەردىڭ كاسىبيلىگى مەن بىلىكتىلىگىنە، جوعارى جەكە قاسيەتتەرىنە بايلانىستى... شىنىندا دا، الەۋمەتتىك قورعاۋ سالاسىندا كەزدەيسوق ادامدار جوق. ويتكەنى، بۇل كەز-كەلگەننىڭ قولىنان كەلە بەرمەيتىن ۇلكەن پسيحولوگيالىق جانە ەموتسيونالدى قيىن جۇمىس. الەۋمەتتىك قىزمەتكەرلەر - وتە مەيىرىمدى جانە كومەك كورسەتۋدە جاقسى نيەتتەرگە يە، جاۋاپكەرشىلىگى مول جاندار. مەن ءوز ۇجىمىمداعى وسىنداي جاندارعا باسىمدى يەمىن جانە ولارمەن ماقتانامىن! راسىندا ولار ماقتانۋعا تۇرارلىق جاندار", - دەيدى فيليال ديرەكتورى دانيار قىرىقباەۆ.
ءبىز دە ازاماتتاردىڭ ءال-اۋقاتىنا قاتىستى كورىنبەيتىن مايدان جاۋىنگەرلەرىن كاسىبي مەرەكەلەرىمەن قۇتتىقتايمىز!
گۇلۆيرا اسقار
"ادىرنا" ۇلتتىق پورتالى
