الەمدە وزبەك تىلىندە 50 ملن ادام سويلەيدى. مۇنى وزبەكستان پرەزيدەنتى شاۆكات ميرزياەۆ مالىمدەدى، دەپ حابارلايدى "ادىرنا" ءتىلشىسى.
وزبەك ءتىلىنىڭ مەرەكەسىنە بايلانىستى (1989 جىلى 21 قازاندا "مەملەكەتتىك ءتىل" تۋرالى زاڭ قابىلداندى - رەد.) حالقىنا ارناعان قۇتتىقتاۋ سوزىندە:
"قازىرگى كەزدە الەمدە وزبەك ءتىلدى سويلەسۋشىلەر سانى 50 ميلليونعا جۋىق بولۋى ونىڭ الەمدەگى ەڭ ءىرى تىلدەردىڭ بىرىنە اينالىپ وتىرعاندىعىن كورسەتەدى.
شەت ەلدەردەگى 65 جوعارى وقۋ ورىندارىندا وزبەك ءتىلى مەن ادەبيەتى زەرتتەلۋدە جانە وسى سالادا عىلىمي زەرتتەۋلەر جۇرگىزەتىن شەتەلدىك عالىمداردىڭ سانى وسۋدە،" - دەدى شاۆكات ميرزيەۆ. قۇتتىقتاۋ سوزىندە اۋعانستاننىڭ وزبەك تىلىنە رەسمي ءتىل مارتەبەسى بەرىلگەندىگى اتالىپ ءوتىلىپ، سول ءۇشىن ەل باسشىلىعىنا شىن جۇرەكتەن العىس ايتاتىندىعىن جەتكىزدى.
قازىر وزبەكستان لاتىن عارپىنە تولىق كوشۋدىڭ الدىندا تۇر. پرەزيدەنت ميرزياەۆتىڭ وزبەك ءتىلىن دامىتۋعا ارنالعان جاڭا جارلىعىنا سايكەس، 2030 جىلعا قاراي ەلدەگى بارلىق بالاباقشالارىنىڭ 80 پايىزى وزبەك تىلىندە ءجۇرۋى ءتيىس. بۇعان قوسا شەتەلدىكتەرگە ارنالعان وزبەك ءتىلى باعدارلاماسى جاسالعان.
2021 جىلدىڭ 1 ساۋىرىنەن باستاپ بارلىق دەڭگەيدەگى شەنەۋنىكتەردىڭ وزبەك ءتىلى مەن ادەبيەتى ءبىلىمى تەكسەرىلىپ، ارنايى سەرتيفيكات بەرىلەتىن بولدى.
