نۇر-سۇلتاننىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا العاشقى جەڭىل رەلستى ترانسپورت جۇيەسىن سالۋ كەزىندە انىقتالعان "اقشا جىمقىرۋ ىسىنە" بايلانىستى الدىن الا تىڭداۋ ءوتتى، دەپ حابارلايدى centralasian.org.
استانا سوتىنىڭ ءباسپاسوز قىزمەتىنىڭ مالىمەتىنشە، بۇل ىستە بىرنەشە ايىپتالۋشى بار: نۇر-سۇلتان قالاسىنىڭ التىنشى شاقىرىلىمىنداعى ءماسليحاتتىڭ بۇرىنعى حاتشىسى جانات نۇرپەيىسوۆ، قالالىق كولىك جانە اۆتوموبيل جولدارى باسقارماسىنىڭ بۇرىنعى باستىعى راشيد امانجولوۆ، "استانا Innovations" كومپانياسى باسقارماسىنىڭ بۇرىنعى توراعاسى تالعات ءاشىم جانە ءتورت كاسىپكەر، ەنشىلەس كومپانيا باسشىلارى داۋرەن ءابدىحاميتوۆ، ۇلىقبەك اچيلوۆ، تيمۋر كاساباەۆ، دۋلات مۇسەنوۆ.
ولارعا "ۇيىمداسقان توپ قۇرۋ جانە وعان جەتەكشىلىك ەتۋ" جانە "وزىنە سەنىپ تاپسىرىلعان مۇلىكتى يەمدەنۋ جانە جۇمساۋ" باپتارى بويىنشا ايىپتار تاعىلعان.
وسىعان دەيىن ءىستى تەرگەگەن جەمقورلىقپەن كۇرەس ءىس-قيمىل اگەنتتىگى "اقشا جىمقىرۋ سحەماسىن نۇر-سۇلتان قالاسى اكىمىنىڭ بۇرىنعى ورىنباسارى قانات سۇلتانبەكوۆ، "استانا LRT" كومپانياسىنىڭ بۇرىنعى باسشىسى تالعات اردان ۇيىمداستىرعان" دەپ مالىمدەگەن ەدى. ولارعا حالىقارالىق ىزدەۋ جاريالانعان.
تەرگەۋ ورگاندارىنىڭ مالىمەتىنشە، شەنەۋنىكتەر كاسىپكەرلەرمەن بىرگە جوبا قۇنىن جاساندى تۇردە قىمباتتاتىپ، جالعان كاسىپورىنداردىڭ كومەگىمەن ميلليارد تەڭگەنى قاعاز اقشاعا اينالدىرعان.
اتىشۋلى "استانا LRT" جوباcى 2009 جىلى يمانعالي تاسماعامبەتوۆتىڭ ەلوردا اكىمى بولىپ تۇرعان كەزدە باستالعان. مەترونىڭ ۇزىندىعى 41 شاقىرىم بولىپ بەكىتىلگەن.
ال 2015 جىلى تاسماعامبەتوۆتىڭ ورنىنا كەلگەن جاقسىبەكوۆ بۇل جوبانى "EXPO 2017" حالىقارالىق كورمە تۇسىندا پايدالانۋعا بەرەمىز دەپ ۋادە ەتكەن. ارادا ءبىر جىل وتكەندە قالا اكىمىنىڭ ورىنباسارى سەرگەي حوروشۋن جۋرناليستەرگە LRT قۇرىلىسى 2017 جىلعا دەيىن سالىنىپ ۇلگەرمەيتىنىن ايتتى. اكىمنىڭ سوزىنشە، ءبىر جىل بويى قۇجاتتارعا قول قويۋمەن ۋاقىت وتكىزگەن.
باس قالانىڭ اكىمدىگىنە اسەت يسەكەشوۆ (2017 جىل - اۆت.) كەلگەننەن كەيىن LRT اينالاسىندا سىبايلاس جەمقورلىققا قاتىستى اڭگىمە ءوربىدى. اسەت يسەكەشەۆ «استانا LRT» جشس قۇرىلىسىن باقىلاۋ ماقساتىندا «LRT Construction» جشس دەپ اتالاتىن جاڭا كومپانيا قۇردى. ەلباسى نۇرسۇلتان نازارباەۆقا حات جولدانىپ، جوبانىڭ قۇنى قىسقارتىلعانىن مالىمدەدى. ساعىزشا سوزىلعان قۇرىلىس 2019 جىلدىڭ جەلتوقسانىندا پايدالاناتىنى حابارلاندى. بىراق نۇر-سۇلتانعا اكىم بولىپ كەلگەن باقىت سۇلتانوۆ LRT جوباسىنىڭ توقتاپ قالعانىن ايتتى.
2019 جىلى مامىردا قر پرەمەر-ءمينيسترىنىڭ ورىنباسارى ءاليحان سمايلوۆ LRT جوباسىنىڭ قۇرىلىسى 2020 جىلدىڭ 1 قىركۇيەگىنە قاراي اياقتالاتىنىن ايتتى. ال اكىم التاي كولگىنوۆ جەلتوقسان ايىندا جوبانىڭ تولىق اياقتالاتىنىن، بىراق ۋاقىتىن ايتپادى. اكىم العاشقىدا 1,9 ملرد دوللورعا باعالانعان جوبانىڭ 1,2 ملرد دوللارى ۇنەمدەلگەنىن جەتكىزدى. "ماماندارمەن ەسەپتەپ، باستاپقى كەزەڭدە 10 مينۋت جەتكىلىكتى دەپ شەشتىك. ودان كەيىن جيىرەك بولا باستايدى. جەر استى وتكەلدەردىڭ دە سانىن قىسقارتتىپ، ناتيجەسىندە 350 ملن تەڭگە قاراجات ۇنەمدەدىك. جالپى ۇنەم كولەمى شامامەن 1,2 ملرد دوللاردى قۇرايدى. كورىپ وتىرعاندارىڭىزداي، جوبا ءبىرشاما ارزاندادى. تولىقتاي العاندا LRT-نى سالىپ ءبىتىرۋ مىندەتى تۇر. سەبەبى كوپتەگەن دۇنيە جاسالىپ، ينفراقۇرىلىم تارتىلىپ قويىلعان،"- دەدى اكىم. قازىر مەترو جولىنىڭ ۇزىندىعى – 22 شاقىرىم.
جاسۇلان ءناۋرىزالى،
"ادىرنا" ۇلتتىق پورتالى
