Nur-Sultannyń qylmystyq ister jónindegi mamandandyrylǵan aýdanaralyq sotynda alǵashqy jeńil relsti transport júıesin salý kezinde anyqtalǵan "aqsha jymqyrý isine" baılanysty aldyn ala tyńdaý ótti, dep habarlaıdy centralasian.org.
Astana sotynyń baspasóz qyzmetiniń málimetinshe, bul iste birneshe aıyptalýshy bar: Nur-Sultan qalasynyń altynshy shaqyrylymyndaǵy máslıhattyń burynǵy hatshysy Janat Nurpeıisov, qalalyq kólik jáne avtomobıl joldary basqarmasynyń burynǵy bastyǵy Rashıd Amanjolov, "Astana Innovations" kompanııasy basqarmasynyń burynǵy tóraǵasy Talǵat Áshim jáne tórt kásipker, enshiles kompanııa basshylary Dáýren Ábdihamıtov, Ulyqbek Achılov, Tımýr Kasabaev, Dýlat Músenov.
Olarǵa "uıymdasqan top qurý jáne oǵan jetekshilik etý" jáne "ózine senip tapsyrylǵan múlikti ıemdený jáne jumsaý" baptary boıynsha aıyptar taǵylǵan.
Osyǵan deıin isti tergegen jemqorlyqpen kúres is-qımyl agenttigi "aqsha jymqyrý shemasyn Nur-Sultan qalasy ákiminiń burynǵy orynbasary Qanat Sultanbekov, "Astana LRT" kompanııasynyń burynǵy basshysy Talǵat Ardan uıymdastyrǵan" dep málimdegen edi. Olarǵa halyqaralyq izdeý jarııalanǵan.
Tergeý organdarynyń málimetinshe, sheneýnikter kásipkerlermen birge joba qunyn jasandy túrde qymbattatyp, jalǵan kásiporyndardyń kómegimen mıllıard teńgeni qaǵaz aqshaǵa aınaldyrǵan.
Atyshýly "Astana LRT" jobacy 2009 jyly Imanǵalı Tasmaǵambetovtyń elorda ákimi bolyp turǵan kezde bastalǵan. Metronyń uzyndyǵy 41 shaqyrym bolyp bekitilgen.
Al 2015 jyly Tasmaǵambetovtyń ornyna kelgen Jaqsybekov bul jobany "EXPO 2017" halyqaralyq kórme tusynda paıdalanýǵa beremiz dep ýáde etken. Arada bir jyl ótkende qala ákiminiń orynbasary Sergeı Horoshýn jýrnalısterge LRT qurylysy 2017 jylǵa deıin salynyp úlgermeıtinin aıtty. Ákimniń sózinshe, bir jyl boıy qujattarǵa qol qoıýmen ýaqyt ótkizgen.
Bas qalanyń ákimdigine Áset Isekeshov (2017 jyl - avt.) kelgennen keıin LRT aınalasynda sybaılas jemqorlyqqa qatysty áńgime órbidi. Áset Isekeshev «Astana LRT» JShS qurylysyn baqylaý maqsatynda «LRT Construction» JShS dep atalatyn jańa kompanııa qurdy. Elbasy Nursultan Nazarbaevqa hat joldanyp, jobanyń quny qysqartylǵanyn málimdedi. Saǵyzsha sozylǵan qurylys 2019 jyldyń jeltoqsanynda paıdalanatyny habarlandy. Biraq Nur-Sultanǵa ákim bolyp kelgen Baqyt Sultanov LRT jobasynyń toqtap qalǵanyn aıtty.
2019 jyly mamyrda QR Premer-mınıstriniń orynbasary Álıhan Smaılov LRT jobasynyń qurylysy 2020 jyldyń 1 qyrkúıegine qaraı aıaqtalatynyn aıtty. Al ákim Altaı Kólginov jeltoqsan aıynda jobanyń tolyq aıaqtalatynyn, biraq ýaqytyn aıtpady. Ákim alǵashqyda 1,9 mlrd dollorǵa baǵalanǵan jobanyń 1,2 mlrd dollary únemdelgenin jetkizdi. "Mamandarmen eseptep, bastapqy kezeńde 10 mınýt jetkilikti dep sheshtik. Odan keıin jıirek bola bastaıdy. Jer asty ótkelderdiń de sanyn qysqarttyp, nátıjesinde 350 mln teńge qarajat únemdedik. Jalpy únem kólemi shamamen 1,2 mlrd dollardy quraıdy. Kórip otyrǵandaryńyzdaı, joba birshama arzandady. Tolyqtaı alǵanda LRT-ny salyp bitirý mindeti tur. Sebebi kóptegen dúnıe jasalyp, ınfraqurylym tartylyp qoıylǵan,"- dedi ákim. Qazir metro jolynyń uzyndyǵy – 22 shaqyrym.
Jasulan Naýryzáli,
"Adyrna" ulttyq portaly
