ەلىمىزدە سوتتالعان جاندار ەلەكتروندى دۇكەندەر ارقىلى مەيرامحانا تاماقتارىنا تاپسىرىس بەرە الادى، دەپ حابارلايدى «ادىرنا» ۇلتتىق پورتالى قر ءىىم قىلمىستىق-اتقارۋ جۇيەسى كوميتەتىنىڭ ءباسپاسوز قىزمەتىنە سىلتەمە جاساپ.
قاج كوميتەتىنىڭ توراعاسى جانات ەشماعامبەتوۆ ءىىم الاڭىندا وتكەن ونلاين بريفينگتە جوبانىڭ ءۇش وڭىردە جۇزەگە اسىرىلىپ جاتقانىن حابارلادى.
«2019 جىلى ءبىز قاج مەكەمەلەرىندە ەلەكتروندىق دۇكەندەردى ەنگىزۋ بويىنشا پيلوتتىق جوبانى ىسكە قوستىق. جوبا ءۇش وڭىردە جۇزەگە اسىرىلۋدا. بولاشاقتا ءبىز بۇل تاجىريبەنى ەلىمىزدىڭ بارلىق كولونيالارى بويىنشا ەنگىزۋدى جوسپارلاپ وتىرمىز. بۇل ءبىزدىڭ جۇيەمىزدى رەفورمالاۋدىڭ اسا ماڭىزدى باعىتى جانە سوتتالعانداردىڭ الەۋمەتتىك بەيىمدەلۋى ءۇشىن اسا ماڭىزدى مانگە يە. ولار كولونيادا تۇرىپ، وزدەرىن قوعامنىڭ ءبىر بولشەگى رەتىندە سەزىنە الادى»، - دەپ اتاپ ءوتتى ول.
الداعى ۋاقىتتا ەلەكتروندى دۇكەندەردە تاۋارلاردىڭ 400-دەن استام اتاۋى ۇسىنىلاتىن بولادى. ولاردىڭ قاتارىندا ازىق-تۇلىك، سۋسىندار، تۇرمىستىق حيميا، كەڭسە تاۋارلارى، كيىم-كەشەك بار.
تۇرمەدەگىلەردى باعىپ-قاعۋ ءۇشىن جىل سايىن قانشا اقشا جۇمسالادى؟
2018 جىلى تۇرمەدەگى ءبىر ادامدى اسىراۋ ءۇشىن بيۋدجەتتەن جىلىنا 877 مىڭ تەڭگە جۇمسالعان. tengrinews.kz سايتى وسى جىلدىڭ قىركۇيەك ايىندا ءار سوتتالعان ادامعا جىلىنا 1,1 ميلليون تەڭگە بولىنەتىنىن حابارلاعان بولاتىن. الايدا كەشە وتكەن بريفينگ بارىسىندا بۇل مالىمەت جوققا شىعارىلدى. كوميتەت كەلتىرگەن دەرەكتەر بويىنشا،ەلىمىزدە 2021 جىلدان باستاپ قاماۋداعى ءبىر ادامعا پورتسيا ءمازىرىنىڭ تاۋلىكتىك نورماسى 1050 تەڭگەنى قۇرايتىن بولادى. سونداي-اق، مينيسترلىكتىڭ تاپسىرماسى بويىنشا، كەلەر جىلى اباقتىداعى تاماق ءمازىرى 33 تارماقتان تۇراتىن ونىمگە دەيىن كوبەيتىلمەك.
بۇگىندە تۇرمەدەگىلەردىڭ جازاسىن وتەۋ جاعدايىن وركەنيەتتى ەلدەردەگىدەي جاقسارتا ءتۇسۋى مىقتاپ قولعا الىنعان. دەسە دە، سوتتالۋشىلاردىڭ تەك 40 پايىزى عانا جۇمىس ىستەيتىن كورەنەدى. ياعني، قالعان 60 پايىز ادامدى اسىراۋ ۇكىمەت ەسەبىنەن جۇزەگە اسىرىلۋدا.
ديانا اسان،
«ادىرنا» ۇلتتىق پورتالى
