قىتايدا تۋعان قانداستارىمىز قاستەر مۇساحانۇلى مەن مۇراگەر ءالىمۇلى بوسقىن مارتەبەسىن الدى. بۇل تۋرالى بەلگىلى ادۆوكات ءلاززات احاتوۆا فەيسبۋك پاراقشاسىندا جاريالادى، دەپ حابارلايدى "ادىرنا" ءتىلشىسى.
ء"سۇيىنشى!!!
قاستەر مەن مۇراگەر بوسقىندىق مارتەبەسىن الىپتى! ارادا تۇسىنىكسىز جاعدايلار بولسا دا، پەندەشىلىككە سالىناتىن كەز ەمەس، ەكى جىگىت ءۇشىن شىن جۇرەگىممەن قۋانىشتىمىن!
قاستەر، مۇراگەر، قۋانىش قۇتتى بولسىن! سەندەر ءۇشىن قۋانىشتىمىن!
تاۋەلسىز قازاقستاننىڭ ازاماتى بولۋلارىڭا تىلەكتەسپىن! وسى ۋاقىتقا دەيىنگى قيىن ساتتەرىڭدە، بوستاندىققا شىققان ساتتەرىڭدە بىرگە بولسام دا، اقىرعى قۋانىشتى بىرگە تويلايتىن كۇندى جازباپتى. ول ماڭىزدى ەمەس. ماڭىزدىسى- و باستاعى ماقسات ورىندالدى! ەندى قازاقستانعا وكپەلەرىڭ جوق شىعار)
بارلىق قيىندىق ارتتا قالىپ، بوسقىندىقتى دا الاتىن كۇنىمىز جاقىن دەپ، قانشا سەندىرسەم دە،جەڭىسكە جارتى قادام قالعاندا، باسقا ادۆوكاتتان اراشا سۇراعاندارىڭ مەن ءۇشىن تۇسىنىكسىز بولعانى جاسىرىن ەمەس. مۇمكىن، وعان سەندەردىڭ كىنالارىڭ جوق شىعار. مۇمكىن، بىرەۋلەردىڭ ساياسي ويىنى بولعان شىعار..البەتتە سولاي.. الايدا ءبارى اياقتالعاندا كومەك سۇراعان ازانوۆ ارىپتەسىم نەگە ءىستى تاعى دا سوڭىنا جەتكىزبەدى؟..مۇلدە باسقا وكىل قاتىسىپتى كوميسسياعا..”ەندى ءتىپتى قورعاۋشىنىڭ دا قاجەتى جوق، كوميسسياعا وزدەرىڭ قاتىسا بەرسەڭدەر بولادى، كارانتين اياقتالعان سوڭ، بوسقىندىقى دا الاسىڭدار” - دەگەن بولاتىنمىن. ول كۇنگە دە جەتتىڭدەر. سەنىمسىزدىك تانىتىپ ەدىڭدەر، ەندى بازبىرەۋلەر سياقتى ساياسي ويىن ويناماعانىمدى تۇسىنگەن بولارسىڭدار..
ءجا، وكپە-رەنىش ايتاتىن ۋاقىت ەمەس، شىنىمەن جۇرەگىم جارىلا، قۋانىپ وتىرمىن! ەستي سالا شىداماي، پوست جازىپ جاتىرمىن.
P.S. نۇرگۇلگە (مۇراگەردىڭ اپكەسى) حابارلاسىپ، ءبىر-ءبىرىمىزدى قۇتتىقتاپ، استانالىقتار ءوزىمىز مارە-سارە قۋانىپ جاتىرمىز. “قيىن ساتتەردە جاندارىندا ءبىز بولدىق قوي، ونى ۇمىتپايتىن شىعار، ەكەۋى. استاناعا كەلگەن سوڭ، تويلايمىز عوي، اپكە”-دەپ جاتىر نۇرگۇل دە قۋانىشى قوينىنا سىيماي “تويلاۋدى قويا بەرشى، ماقساتىمىز ورىندالعانىن ايتسايشى. قورعايتىن جەردە قورعادىق، ەندى قاستارىندا كىم جۇرگەنى ماڭىزدى ەمەس، بار قيىندىق ارتتا قالدى”-دەپ جاتىرمىن.
ەكى ۇلىڭ اتامەكەندە قالدى، قازاق ەلىم!!!،"- دەپ ءسۇيىنشى سۇرادى.
ەسكە سالا كەتسەك، قاستەر مۇساحانۇلى مەن مۇراگەر ءالىمۇلىنا "مەملەكەتتىك شەكارانى قاساقانا زاڭسىز كەسىپ ءوتتى" دەگەن ايىپ تاعىلىپ، سوت ۇكىمىمەن قاماۋعا الىنعان بولاتىن. جىل باسىندا شىعىس قازاقستان وبلىسى زايسان اۋداندىق سوتى شىڭجاڭنان قازاقستانعا وتكەن (قاشقان) ەكى ەتنيكالىق قازاقتى ءبىر جىلعا باس بوستاندىعىنان ايىرۋ تۋرالى شەشىم شىعارعان ەدى. ادۆوكاد ءلاززات احاتوۆا قوس قانداسىمىزدى قاماۋدان بوساتىپ الدى.
وسى وقيعادان سوڭ ولار ادۆوكات باۋىرجان ازانوۆتان كومەك سۇراپ، ول وسى ءىستى قولعا العان.
