بۇل تۋرالى بۇگىن اقپاراتتىق-كوممۋنيكاتسيالىق ورتالىعىندا وتكەن ءباسپاسوز بريفينگىندە «Shymkent» الەۋمەتتىك كاسىپكەرلىك كورپوراتسياسى اكتسيونەرلىك قوعامى باسقارماسىنىڭ توراعاسى باۋىرجان كانكين مالىمدەدى.
– ينۆەستورلارعا جەر تەلىمىن ۇسىنۋدى جەڭىلدەتۋ ماقساتىندا «Shymkent» اكك تاراپىنان جاڭا مەحانيزم ازىرلەندى. اتالعان مەحانيزم نەگىزىندە 223,9 ملرد تەڭگەلىك 30 ينۆەستيتسيالىق جوبانى ىسكە اسىرۋ بويىنشا كەلىسىمگە قول جەتكىزدىك. بۇل جوبالار ءبىلىم، دەنساۋلىق ساقتاۋ، تۇرعىن ءۇي قۇرىلىسى (دەۆەلوپمەنت) جانە قىزمەت كورسەتۋ سالالارىندا. وسى ورايدا ايتا كەتەيىن، فرونت وفيس اشىلعالى ءۇش ايدىڭ ىشىندە 5000 كاسىپكەرگە قىزمەت كورسەتتىك، – دەدى ب.كانكين.
سپيكەردىڭ سوزىنە سۇيەنسەك، 2020 جىلدىڭ باسىنان بەرى «وڭتۇستىك» اەا-عا جالپى قۇنى 39,172 ملرد تەڭگەنى قۇرايتىن 2 257 جۇمىس ورنىنىڭ قۇرىلۋمەن 9 جوبا تارتىلعان. ال «وڭتۇستىك»، «تاسساي» يندۋستريالدى ايماقتارىنا، «Shymkent» اگروونەركاسىپتىك ايماعىنا جانە كولىكتىك-لوگيستيكالىق ورتالىقتىڭ اۋماعىنا جالپى قۇنى 37,5 ملرد تەڭگەنى قۇرايتىن بىرقاتار ينۆەستيتسيالىق جوبالار تارتىلعان. «وسى ورايدا «وڭتۇستىك» جانە «تاسساي»، سونداي-اق قالانىڭ ينۆەستيتسيالىق تارتىمدىلىعىن ارتتىرۋ ماقساتىندا «جۇلدىز» يندۋستريالدى ايماعىن قۇرۋ جوسپارلانۋدا. بۇل ماقساتتا كولەمى 306 گا قۇرايتىن جەر تەلىمى انىقتالدى. قازىرگى ۋاقىتتا قاجەتتى ينفراقۇرىلىممەن قامتاماسىز ەتۋ ءۇشىن جوبالىق-سمەتالىق قۇجاتتاما ازىرلەنۋدە»، – دەدى باۋىرجان توقبولاتۇلى.
باسقارما توراعاسىنىڭ ايتۋىنشا، «شىمكەنت» اكك «1000 ساۋدا ورنى» جوباسىن ىسكە اسىرۋدا. ول كاسىپكەرلەرگە ساۋدا جۇرگىزۋ جانە قىزمەت كورسەتۋ ءۇشىن قولايلى شارتتار مەن جەر ۋچاسكەلەرىن بەرۋدى قاراستىرادى. ال قۇرىلىس سالاسىنا توقتالساق، 7-20-25 باعدارلاماسى بويىنشا جالپى اۋدانى 63 258,32 ش.م قۇرايتىن 24 تۇرعىن ءۇيدىڭ قۇرىلىسى اياقتالعان. سونىمەن قاتار بۇگىندە جاو باعدارلاماسى بويىنشا 26 ءۇيدىڭ قۇرىلىسى جالعاسۋدا. ونىڭ ىشىندە 21 ءۇيدى وسى جىلدىڭ سوڭىنا دەيىن، قالعان 5 ءۇيدى 2021 جىلى تاپسىرۋ جوسپارلانعان.
شىمكەنت اقپاراتتىق-كوممۋنيكاتسيالىق ورتالىعى
فوتو – بەرەكە سەيىتجاپپار
