بۇگىن اقپاراتتىق-كوممۋنيكاتسيالىق ورتالىعىندا شىمكەنت قالاسى اكىمىنىڭ ورىنباسارى م.يساحوۆ جانە شىمكەنت قالالىق مەملەكەتتىك ەڭبەك ينسپەكتسياسى باسقارماسىنىڭ باسشىسى ب.قالجانوۆتىڭ قاتىسۋىمەن اتالعان باسقارمانىڭ 7 ايدا اتقارعان جۇمىستارى جونىندە بريفينگ ءوتتى.
– «شىمكەنت قالاسىنىڭ كاسىپوداقتار ورتالىعى» اۋماقتىق كاسىپوداقتار بىرلەستىگى شىمكەنت قالاسىنىڭ كاسىپكەرلەر پالاتاسىمەن بىرلەسە «شاعىن كاسىپكەرلىك سۋبەكتىلەرىنىڭ ەڭبەك قۇقىقتارىن بۇزعاندىعى بويىنشا تۇسكەن ارىز-شاعىمدارمەن جۇمىس جۇرگىزۋ الگوريتمى» شىمكەنت قالاسى اكىمىمەن بەكىتىلىپ، جۇمىس جۇرگىزىلۋدە. ياعني، بۇگىندە الگوريتم اياسىندا شيەلەنىسكەن ماسەلەلەردى شەشۋدەمىز. بۇل ماقساتتا ءۇش جاقتى كوميسسيا قۇرىلدى. ولار – شىمكەنت قالاسىنىڭ اۋدان اكىمدىكتەرى، «كاسىپوداقتار ورتالىعى» اۋماقتىق كاسىپوداقتار بىرلەستىگى جانە شىمكەنت قالاسىنداعى قر جۇمىس بەرۋشىلەر (كاسىپكەرلەر) كونفەدەراتسياسى، – دەدى ماقسۇت پەرنەبايۇلى.
ال باۋىرجان احمەتالىۇلى اتقارىلعان جۇمىستار بويىنشا ءسوز قوزعادى.
– وسى جىلدىڭ 7 ايىندا ازاماتتاردان 650 ارىز-شاعىم ءتۇسىپ، بارىنە جاۋاپ بەرىلدى. ونىڭ 104-نە تەكسەرۋ جۇرگىزىلىپ، 147-ءى زاڭ بۇزۋشىلىق انىقتالدى. ايتا كەتەيىن، ارىز-شاعىمنىڭ كوبىسى جەكەمەنشىك بالاباقشالارعا بايلانىستى. بۇل رەتتە جالاقى قارىزى جايلى جەتكىزسەك، وتكەن جىلى 7 كاسىپورىن 73 جۇمىسكەردىڭ الدىندا 13,8 ملن تەڭگە جالاقى قارىزى بولعان. بۇگىندە اتقارىلعان جۇمىستار ناتيجەسىندە بۇل كورسەتكىش 3,8 ملن تەڭگەگە ءتۇستى، – دەدى ب.قالجانوۆ.
باسقارما باسشىسى ودان بولەك، وندىرىستىك ورىنداردا جازاتايىم جاعدايلاردىڭ ازايعانىن ايتتى. سونداي-اق ەلەكتروندىق شارت بويىنشا ءسوز قوزعاپ، قالادا جىل باسىنان بەرى 923 كاسىپورىن 37425 ەڭبەك شارتتارىن جۇيەگە ەنگىزگەنىن جەتكىزدى.
شىمكەنت اقپاراتتىق-كوممۋنيكاتسيالىق ورتالىعى
فوتو – س.قوساي
