قازاقستان بۇگىنگى كۇنگە دەيىن نەبىر تار جول، تايعاق كەشۋلەردەن ءوتىپ، الەۋمەتتىك-ەكونوميكالىق، ساياسي جاڭارۋ، رۋحاني جاڭعىرۋ جولىندا سەنىمدى العا جىلجىپ كەلەدى. جەرىمىزگە تابانى تيگەن وزگە ۇلت وكىلدەرىن حالقىمىزدىڭ ەرەكشە جىلىلىقپەن قارسى العانى تاريحتان بەلگىلى. ەلىمىز وزگە ەتنيكالىق توپتاردىڭ ۇلتتىق تىلدەرى مەن ادەت-عۇرىپتارىن، سالت-داستۇرلەرىن دامىتۋعا دا قولداۋ كورسەتۋىن توقتاتقان ەمەس. وسىلايشا شاشاۋ شىعارماي، دوستىق پەن بىرلىكتى تۋ ەتىپ، ورتاق مۇددەگە جۇمىلدىرىپ وتىر.
الايدا مەملەكەتتىك ءتىلدىڭ مارتەبەسى ءالى دە ءوز دەڭگەيىنە كەلگەن جوق. قازاق ءتىلى – مەملەكەتىمىزدىڭ تابان تىرەيتىن تۇعىرلى تەمىرقازىعى. «ۇلتتىڭ ساقتالۋىنا دا، جوعالۋىنا دا سەبەپ بولاتىن نارسەنىڭ ەڭ قۋاتتىسى – ءتىل»، − دەيدى ۇلتتىڭ رۋحاني كوسەمى احمەت بايتۇرسىنۇلى.
2019 جىلعى 31 جەلتوقساندا ۇكىمەتتىڭ قاۋلىسىمەن بەكىتىلگەن «قازاقستان رەسپۋبليكاسىنداعى ءتىل ساياساتىن ىسكە اسىرۋدىڭ 2020 − 2025 جىلدارعا ارنالعان مەملەكەتتىك باعدارلاماسىندا» بىلاي دەلىنگەن: «باعدارلامادا مەملەكەت باسشىسى ق.ك. توقاەۆتىڭ 2019 جىلعى 2 قىركۇيەكتەگى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا بەلگىلەنگەن مىندەتتەردى جۇزەگە اسىرۋ كوزدەلەدى. مەملەكەت باسشىسى ناقتى شارالار نەگىزىندە ەلىمىزدەگى ەتنيكالىق توپتاردىڭ ءتىلى مەن مادەنيەتىن دامىتۋعا جاعداي جاساۋ جانە قازاق ءتىلىنىڭ ۇلتارالىق قاتىناس ءتىلى رەتىندەگى ءرولىن كۇشەيتۋ قاجەتتىگىن اتاپ ءوتتى. وسىعان بايلانىستى باعدارلامادا قازاقستان اۋماعىنداعى تەرەڭ تاريحي، مادەني جانە پسيحولوگيالىق بازاسى بار مەملەكەتتىك ءتىلدىڭ ەتنوسارالىق قاتىناس ءتىلى رەتىندە تولىققاندى قولدانىلۋى قاجەتتى شارالار كوزدەلگەن». بۇل – مەملەكەتتىك ءتىلدىڭ پوزيتسياسىن نىعايتۋ ءۇشىن جاسالعان ماڭىزدى قادامداردىڭ ءبىرى.
مەملەكەت قۇرۋشى ۇلت توڭىرەگىنە توپتاسىپ، ءبىر تىلدە سويلەۋ ارقىلى عانا ءبىرتۇتاس حالىق بولا الاتىنىمىز انىق. جەرىمىز ورتاق بولسا، ءتىلىمىز دە ورتاق بولۋ كەرەك!
قۋانىش جۇمابەكۇلى
PhD دوكتورى،
احمەت بايتۇرسىنۇلى اتىنداعى
ءتىل ءبىلىمى ينستيتۋتىنىڭ
عىلىمي قىزمەتكەرى
