قىرعىزستان پرەزيدەنتى سوورونباي جەەنبەكوۆ پرەزيدەنتتىك قىزمەتىنەن كەتتى، دەپ حابارلايدى "ادىرنا" ءتىلشىسى. ول وتستاۆكاعا كەتەتىنى جايلى مالىمدەمەسىن 15 قازاندا ياعني وسىدان بىرنەشە ساعات بۇرىن مەملەكەت باسشىسىنىڭ رەسمي سايتىندا جاريالادى.
جەەنبەكوۆ ۇندەۋىندە "بيلىككە جابىسىپ" وتىرمايتىنىن، "قىرعىزستان تاريحىندا ءوز حالقىنا وق اتقان، قان توككەن پرەزيدەنت رەتىندە قالعىسى كەلمەيتىنىن، سوندىقتان وتستاۆكاعا كەتۋگە شەشىم قابىلداعانىن" جازدى. ونىڭ سوزىنشە، "قىرعىزستانداعى بەيبىتشىلىك، تۇتاستىق، حالىقتىڭ بىرلىگى مەن تىنىشتىعى بارىنەن جوعارى". جەەنبەكوۆ "جاڭا ۇكىمەت قۇرامى بەكىتىلسە" دە، "بىشكەكتەگى الەۋمەتتىك-ساياسي جاعداي تۇراقسىز بولىپ تۇرعانىن" ايتتى.
"14 قازاندا جوگوركۋ كەڭەش ۇكىمەت قۇرامىن بەكىتتى. مەن تاعايىنداۋلار تۋرالى ءتيىستى جارلىققا قول قويدىم. بىراق بۇل ەلدەگى جاعدايدى رەتتەگەن جوق. وكىنىشكە قاراي، اگرەسسيا باسىلمادى، مەنىڭ تەز ارادا وتستاۆكاعا كەتۋىمدى تالاپ ەتۋ ءالى جالعاسىپ جاتىر. قازىرگى جاعداي ەكى تاراپتىڭ قاقتىعىسىنا جاقىندادى. ءبىر جاعىندا – نارازىلار، ەكىنشى جاقتا – قۇقىق قورعاۋ ورگاندارى" دەپ جازىلعان جەەنبەكوۆتىڭ مالىمدەمەسىندە.
جەەنبەكوۆ ەكى تاراپتى ارانداۋعا بەرىلمەۋگە شاقىردى.
"اسكەريلەر مەن ميليتسيالار مەملەكەتتىك رەزيدەنتسيانى قورعاۋ ءۇشىن قارۋ قولدانۋى ءتيىس. بۇل جاعدايدا قان توگىلەتىنى انىق. مەن ەكى تاراپتى دا ارانداتۋعا جول بەرمەۋگە شاقىرامىن" دەدى ول.
جەەنبەكوۆ ەلدىڭ جاڭا تاعايىندالعان پرەمەر-ءمينيسترى سادىر جاپاروۆتى جانە باسقا دا ساياساتكەرلەردى ءوز جاقتاستارىن بىشكەكتەن اكەتىپ، ەل استاناسىندا تىنىش ءومىردى قالپىنا كەلتىرۋگە شاقىردى.
