شىمكەنت قالاسىندا كوروناۆيرۋس جۇقتىرعان ناۋقاستاردى قابىلدايتىن 13 دياگنوستيكالىق ورتالىق ۇيىمداستىرىلدى.
بۇل جونىندە بۇگىن قالالىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشىسى باقىتجان پوزيلوۆ اقپاراتتىق-كوممۋنيكاتسيالىق ورتالىقتا وتكەن بريفينگتە باياندادى.
- دياگنوستيكالىق ورتالىقتاردا 17 كت جانە 30 رەنتگەن اپپاراتى بار. سونىمەن بىرگە، 6 پتر زەرتحاناسى بار، ونىڭ 2-ءۋى جاڭادان اشىلدى. ولار تاۋلىگىنە 2 500 تەست قابىلدايدى، - دەدى.
سونىمەن قاتار، مەديتسينا مەكەمەلەرىن ماتەريالدىق-تەحنيكالىق جابدىقتاۋ بويىنشا قوسىمشا 282 يۆل الىنىپ، قالادا يۆل سانى 612 بىرلىككە جەتكەنىن ايتتى. جاڭا 3 وتتەگى ستانتسياسى مەن 9 سۇيىق وتتەگى رەزەرۆۋارى قوندىرىلعان.
ودان وزگە، قىركۇيەك ايىندا مەديتسينا ۇيىمدارىنىڭ ءوزارا ارەكەت الگوريتمى پىسىقتالىپ، ناۋقاستاردى كاتەگوريالارعا ءبولۋدى ۇيلەستىرۋ ءۇشىن 3 رەت وقۋ-جاتتىعۋ وتكىزىلدى. وسى ۋاقىت ىشىندە 10 164 مەديتسينا مامانى كوروناۆيرۋس ينفەكتسياسىمەن كۇرەس بويىنشا وقىتىلدى.
ال، ەمحانالار جانىنان قۇرىلعان 67 ءموبيلدى توپ 29 415 پاتسيەنتكە مەديتسينالىق قىزمەت كورسەتتى. ناۋقاستارعا جەدەل جاردەم كورسەتۋ ماقساتىندا جاڭا call-center ىسكە قوسىلدى. شاقىرۋدى قابىلداۋ لينياسى 9-دان 28-گە ءوسىپ، وپەراتورلار سانى ءۇش ەسەگە ارتتى. بۇگىنگى تاڭدا قوڭىراۋ قابىلداۋ قۋاتتىلىعى تاۋلىگىنە 3 500-گە جەتتى.
شىمكەنت قالاسى اكىمىنىڭ ءباسپاسوز قىزمەتى
