ەلىمىزدە مەكتەپتەردى شتاتتىق رەجيمگە اۋىستىرۋ ماسەلەسى قاراستىرىلىپ جاتىر. بۇل تۋرالى پرەمەر-مينيستر اسقار مامين ۇكىمەت سايتىندا جاريالانعان ءماجىلىس دەپۋتاتتارىنىڭ ساۋالىنا بەرگەن جاۋابىندا ايتتى، دەپ حابارلايدى «ادىرنا» ۇلتتىق پورتالى.
«مەملەكەت باسشىسىنىڭ تاپسىرماسى بويىنشا قازىرگى تاڭدا سالالىق مەملەكەتتىك ورگاندار ءداستۇرلى ءبىلىم بەرۋ فورماسىنا ورالۋ جانە كەزەڭ-كەزەڭمەن جەڭىلدەتۋ ماسەلەلەرىن پىسىقتاپ جاتىر»،-دەپ مالىمدەدى مامين.
پرەمەر-مينيستر قاشىقتان وقىتۋدى ەنگىزۋ ەلدە ورىن العان ەپيدەميولوگيالىق جاعدايعا بايلانىستى ەكەنىن اتاپ ءوتتى.
«ددۇ كەلتىرگەن مالىمەتتەرگە سايكەس، 12 جاستان اسقان بالالار كوروناۆيرۋستىڭ تارالۋىندا بەلسەندى ءرول اتقارادى. 2020 جىلدىڭ 4 قازانى بويىنشا وقۋشىلار اراسىندا كوروناۆيرۋستىق ينفەكتسيانىڭ 136 جاعدايى تىركەلگەن بولاتىن. ولاردىڭ 51-ءى كەزەكشى سىنىپتاردىڭ وقۋشىلارى بولسا، 85-ءى قاشىقتان ءبىلىم الىپ جۇرگەندەر»،-دەپ ءسوزىن قورىتىندىلادى ول.
ستاتيستيكالىق مالىمەتتەرگە سۇيەنەتىن بولساق، بيىل رەسپۋبليكا بويىنشا 3,4 ميلليون بالا مەكتەپكە باردى. قازىرگى تاڭدا ولاردىڭ 2 613 428-ءى قاشىقتان ءبىلىم الۋدا.
«ادىرنا» ۇلتتىق پورتالى
