پارلامەنت پالاتالارىنىڭ بىرلەسكەن وتىرىسىندا الاتاۋ قالاسىنا ەرەكشە مارتەبە بەرۋ تۋرالى كونستيتۋتسيالىق زاڭ جوباسى قارالدى. جيىندا ءسوز سويلەگەن ءماجىلىس دەپۋتاتى نۇرتاي سابيليانوۆ بۇل باستامانىڭ قالانى ينۆەستيتسيا مەن يننوۆاتسياعا نەگىزدەلگەن زاماناۋي ورتالىققا اينالدىرۋعا باعىتتالعانىن ايتتى، دەپ حابارلايدى «ادىرنا» ۇلتتىق پورتالى.
دەپۋتاتتىڭ ايتۋىنشا، زاڭ جوباسى الاتاۋدى ەلدىڭ جاڭا ەكونوميكالىق ءوسىم نۇكتەسىنە اينالدىرۋعا باعىتتالعان. بۇل باستاما 15 ناۋرىزدا وتكەن رەسپۋبليكالىق رەفەرەندۋمدا قابىلدانعان جاڭا كونستيتۋتسيادا بەكىتىلگەن «قارقىندى داميتىن قالا» ارنايى قۇقىقتىق رەجيمىمەن تىعىز بايلانىستى.
نۇرتاي سابيليانوۆ ءوز سوزىندە مەملەكەت باسشىسى قاسىم-جومارت توقاەۆتىڭ ينۆەستورلار ءۇشىن قولايلى ورتا قالىپتاستىرۋ – باسىم باعىتتاردىڭ ءبىرى ەكەنىن اتاپ وتكەنىن جەتكىزدى. ارناۋلى قۇقىقتىق رەجيم وسى ماقساتقا جەتۋدىڭ ءتيىمدى قۇرالى رەتىندە قاراستىرىلىپ وتىر.
زاڭ جوباسىنا سايكەس، الاتاۋ «اقىلدى قالا» قاعيداتىمەن داميدى. ياعني تسيفرلىق تەحنولوگيالار، جاساندى ينتەللەكت، جوعارى تەحنولوگيالىق ءوندىرىس جانە عىلىمي-يننوۆاتسيالىق ورتالىقتار قالا دامۋىنىڭ نەگىزگى باعىتىنا اينالادى.
قۇجاتتا باسقارۋدىڭ جاڭا مودەلى ۇسىنىلعان. الاتاۋ قالاسىنىڭ كەڭەسى ستراتەگيالىق شەشىمدەر قابىلدايتىن جوعارى ورگان بولادى. ونىڭ قۇرامىن پرەزيدەنت بەكىتەدى، ال جۇمىسىن پرەمەر-مينيستر ۇيلەستىرەدى. ال نەگىزگى اتقارۋشى ورگان رەتىندە اكىمشىلىك ينۆەستيتسيالىق جوبالاردى ىسكە اسىرۋ، كاسىپكەرلىكتى دامىتۋ جانە ينفراقۇرىلىمدى جەتىلدىرۋمەن اينالىسادى.
سونىمەن قاتار، زاڭ جوباسىندا ينۆەستيتسيالىق جانە كاسىپكەرلىك قىزمەت، قالا قۇرىلىسى، تسيفرلىق اكىمشىلەندىرۋ سالالارىندا دەربەس شەشىمدەر قابىلداۋ مۇمكىندىگى قاراستىرىلعان. ينۆەستورلار ءۇشىن ء«بىر تەرەزە» قاعيداتى ەنگىزىلىپ، بيزنەس جۇرگىزۋ راسىمدەرى جەڭىلدەتىلەدى.
الاتاۋ قالاسىنىڭ قارجىلىق مودەلى دە ەرەكشەلەنەدى. قالانىڭ جيىنتىق بيۋدجەتى جەرگىلىكتى بيۋدجەت پەن اكىمشىلىك بيۋدجەتتەن قۇرالادى. بۇل جۇيە قارجى اعىندارىن ءتيىمدى باسقارۋعا جانە ەكونوميكالىق جوبالاردى جەدەل ىسكە اسىرۋعا مۇمكىندىك بەرەدى. سونىمەن قاتار ينۆەستيتسيالىق جوبالار ءۇشىن سالىقتىق پرەفەرەنتسيالار بەرۋ قاراستىرىلعان.
دەپۋتاتتىڭ مالىمەتىنشە، زاڭ جوباسىن تالقىلاۋ بارىسىندا 500-دەن استام ۇسىنىس تۇسكەن. ولار باسقارۋ جۇيەسىن ناقتىلاۋ، تسيفرلىق قىزمەتتەردى دامىتۋ جانە جاۋاپكەرشىلىكتى كۇشەيتۋگە باعىتتالعان.
قۇجاتتا سونداي-اق مۇگەدەكتىگى بار ازاماتتار ءۇشىن قولايلى ورتا قالىپتاستىرۋ ماسەلەلەرى دە ەسكەرىلگەن. بيۋدجەت قاراجاتىنىڭ ءتيىمدى جۇمسالۋىن قامتاماسىز ەتۋ ءۇشىن مىندەتتى اۋديت پەن تۇراقتى ەسەپتىلىك ەنگىزۋ ۇسىنىلىپ وتىر.
