«ADAL BILIM» جوبالىق ءوفيسىنىڭ ادمينيستراتورى سەرگەي پەن Facebook جەلىسىندەگى رەسمي پاراقشاسىندا جوبالارعا بولىنەتىن گرانتتار، ستيپەنديالار مەن مەدالدارى بار سىياقىلار ەشكىمدى عىلىمي ورتاعا تارتا المايتىنىن ايتتى، دەپ حابارلايدى «ادىرنا» ۇلتتىق پورتالى.
«قازاقستاندا عالىمداردىڭ ەڭبەكاقىسىن جەكە قارجىلاندىرۋدىڭ تىكەلەي كەستەسى بولمايىنشا، جوبالارعا بولىنەتىن گرانتتار، ستيپەنديالار مەن مەدالدارى بار سىيلىقاقىلار عىلىمي جانە اكادەميالىق ورتاعا ەشكىمدى دە تارتا المايدى»، - دەدى ول.
پەن بۇل ۇسىنىستى 1 قازان كۇنى قر پارلامەنتى ءماجىلىسى جۇمىس توبىنىڭ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جوباسى اياسىنداعى وتىرىستا مالىمدەگەن بولاتىن. وسى ورايدا، ول «ADAL BILIM» جوبالىق ءوفيسىنىڭ اتىنان عالىمداردىڭ ەڭبەگىن تىكەلەي قارجىلاندىرۋ جۇيەسىن قۇرۋ تۋرالى ۇسىنىس ءبىلدىردى.
«ءبىز قازىرگى كەزدە قولدانىلىپ جۇرگەن ءۇش نىسانعا (بازالىق، گرانتتىق جانە نقب) قوسا عىلىمدى قارجىلاندىرۋدىڭ ءتورتىنشى نىسانىن – عالىمداردىڭ ەڭبەكاقىسىن تىكەلەي قارجىلاندىرۋدى ەنگىزۋدى ۇسىنامىز. نەگىزگى ماقسات – عىلىمي ءبىلىمنىڭ ساباقتاستىعىن قۇرۋ جانە عىلىمي قىزمەتتىڭ ناتيجەلەرىن جۇيەلەۋ. ءبىزدىڭ تۇسىنىگىمىز بويىنشا، ەڭبەكاقىنى تىكەلەي قارجىلاندىرۋ جوعارى جانە جوعارى وقۋ ورنىنان كەيىنگى ءبىلىم ۇيىمىندا نەمەسە عىلىمي ۇيىمدا قىزمەت ەتەتىن عالىمدارعا قاتىستى عانا جۇرگىزىلۋى ءتيىس»، - دەپ اتاپ ءوتتى سەرگەي پەن.
قارجى مينيسترلىگى بۇل ۇسىنىسقا قارسىلىعىن ءبىلدىردى. رەسمي وكىلدەردىڭ ايتۋىنشا، قازىرگى تاڭدا ەلىمىزدە بيۋدجەتتىك قارجىلاندىرۋدىڭ ەكى نىسانى عانا ورىندالۋى مۇمكىن – سمەتالىق جانە مەملەكەتتىك تاپسىرىس. «ۇسىنىلىپ وتىرعان نىسان قارجىلاندىرۋ سحەمالارىنا ساي كەلمەيد»،-دەدى مينيسترلىك.
«ادىرنا» ۇلتتىق پورتالى
