1-قازان كۇنى الماتىدا ءبىر توپ قىزمەتكەرلەر مەن قوعام بەلسەندىلەرى قارتتار كۇنى مەرەكەسىن پايدالانا وتىرىپ، الەۋمەتتىك كومەككە مۇقتاج قاريالاردىڭ وتباسىنا قايىرىمدىلىق كومەك كورسەتتى. الماتى قالاسى قىلمىستىق اتقارۋ جۇيەسى تۇركىسىب اۋداندىق ءبولىمى، جەرگىلىكتى پوليتسيا بولىمشەسى جانە «ماڭگىلىك قازاقستان» قوعامدىق قورىنىڭ قىزمەتكەرلەرى ءبىرىنشى ارداگەر يدريس رامزاەۆتىڭ شاڭىراعىنا باس سۇقتى. ول توسەك تارتىپ جاتقانىنا قاراماستان، قوناقتاردى جىلى قارسى الدى. «ەر جىگىتىڭ باسىنا نە كەلىپ، نە كەتپەيدى» دەمەكشى، ءبىر كەزدەرى ءىستى بولىپ، تاعدىردىڭ تالكەگىنە ۇشىراپ، تۇرمەدە ۇزاق جىل جازاسىن وتەگەن رامزاەۆ بۇگىندە تۇركىسىب اۋداندىق پروباتسيا قىزمەتىنىڭ ەسەبىندە تۇر. وعان جىلدا قالالىق قىلمىستىق اتقارۋ جۇيەسى دەپارتامەنتى تاراپىنان ءتۇرلى قۇقىقتىق-سوتتىق كومەكتەر كورسەتىلىپ كەلەدى.
اماندىق-ساۋلىق سۇراسىپ، از-كەم اڭگىمە-دۇكەن قۇرعاننان سوڭ، رامزاەۆقا ازىق-تۇلىك قورجىنى تابىس ەتىلدى. «الماتى قالاسى قوعامدىق دامۋ باسقارماسى بيىل باس بوستاندىعىنان ايىرۋ ورىندارىندا جازاسىن وتەپ شىققان ازاماتتارمەن جۇمىس ىستەۋدى بىزگە تاپسىرعان ەدى. سول جوبا اياسىندا تۇرمەدەن شىققان ادامدارعا پسيحولوگيالىق-الەۋمەتتىك جاردەم كورسەتۋ جۇكتەلدى. وسى كومەكتىڭ ءبىر ايعاعى رەتىندە ءبىز بۇگىن سىزگە ازىن-اۋلاق ماتەريالدىق تۇرمىستىق قولداۋ كورسەتكىمىز كەلەدى»، دەدى «ماڭگىلىك قازاقستان» قوعامدىق قورىنىڭ جوبا جەتەكشىسى ب.نالىباەۆ. ءوز كەزەگىندە رامزاەۆ قول ۇشىن سوزعان دەلەگاتسياعا العىسىن جاۋدىردى. «ءبىزدى ۇمىتپاي، ەلەپ-ەسكەرىپ، كوڭىلىمدى سۇراي كەلگەندەرىڭىزگە مىڭ دا ءبىر راحمەت. كومەكتىڭ ۇلكەن-كىشىسى بولمايدى. سىزدەردىڭ تيتتەي جاردەمدەرىڭىز ءبىزدىڭ تۇرمىسىمىزدى ۇزاق ۋاقىتقا جەڭىلدەتەدى. ماعان جاساعان قايىرىمدىلىق كومەكتەرىڭىز وزدەرىڭىزگە ەسەلەنىپ قايتسىن. ىستەرىڭىزگە تەك قانا ساتتىلىك تىلەيمىن»، دەپ اعىنان جارىلدى يدريس اقساقال.
تۇركىسىب اۋدانىندا تۇراتىن تاعى ءبىر قارت ازامات – سەرگەي مورياكوۆتىڭ ءۇيى رامزاەۆتىڭ ۇيىنەن الىس ەمەس. سوندىقتان ۇيىمداستىرۋشىلاردىڭ ازىق-تۇلىك قورجىندارى تيەلگەن كولىكتەرى كوپ ۇزاماي ونىڭ ۇيىنە ات باسىن تىرەدى. سەرگەي اناسىمەن بىرگە تۇرادى ەكەن. ولار اۋداندىق پروباتسيا قىزمەتىنىڭ ينسپەكتورلارىن جاقىن ادامدارىنداي قارسى الىپ، قالعان قوناقتارمەن دە جەكە-جەكە تانىستى. العاشقى بولىپ ءسوز العان ينسپەكتور تۇرسىناي اۋتوۆا قارتتاردى قۇرمەتتەۋ تەك 1-قازان كۇنىمەن شەكتەلمەيتىنىن ايرىقشا اتاپ ءوتتى. «قارتتار – ءبىزدىڭ قازىنامىز. سىزدەرگە قانشا كومەك كورسەتسەك تە، سىزدەردىڭ قوعامعا سىڭىرگەن ەڭبەكتەرىڭىزدىڭ وتەمىن قايتارا المايمىز. ۇكىمەتتىك ەمەس ۇيىمدارمەن تىزە قوسا وتىرىپ جاساعان وسى كومەگىمىزدى قابىل الىڭىزدار» دەپ ول ازىق-تۇلىك قورجىنىن ءۇي يەلەرىنە ۇسىندى.
الپىس جاستى القىمداعان سەرگەي مورياكوۆ جاسى كەلسە دە، قالاداعى زاۋىتتاردىڭ بىرىندە جۇمىس ىستەيدى. ونىڭ ۇكىمەتكە العىسى شەكسىز. «مەملەكەت ءبىزدى ەستەن شىعارماي، سىزدەردەي ازاماتتاردى ءجيى-ءجيى جىبەرىپ، قولدارىنان كەلگەنشە كومەكتەرىن كورسەتىپ تۇرادى»، دەپ سەرگەي ريزاشىلىعىن جاسىرمادى.
ايتا كەتۋ كەرەك، قايىرىمدىلىق ءىس-شاراسىنا جوعارىدا اتالعان قىزمەتكەرلەرمەن قاتار تۇركىسىب اۋداندىق پروباتسيا قىزمەتىنىڭ باسشىسى م.اقساقالوۆ، تۇركىسىب اۋداندىق جەرگىلىكتى پوليتسيا قىزمەتكەرى، اعا لەيتەنانت ە.باۋىرجانۇلى، پروباتسيا قىزمەتىنىڭ ينسپەكتورى گ.مۇستافاەۆا قاتىستى.
ن.ناۋرىزاليەۆ
