Qarttarym aman-saý júrshi...

2939
Adyrna.kz Telegram

1-qazan kúni Almatyda bir top qyzmetkerler men qoǵam belsendileri Qarttar kúni merekesin paıdalana otyryp, áleýmettik kómekke muqtaj qarııalardyń otbasyna qaıyrymdylyq kómek kórsetti. Almaty qalasy Qylmystyq atqarý júıesi Túrkisib aýdandyq bólimi, jergilikti polıııa bólimshesi jáne «Máńgilik Qazaqstan» qoǵamdyq qorynyń qyzmetkerleri birinshi ardager Idrıs Ramzaevtyń shańyraǵyna bas suqty. Ol tósek tartyp jatqanyna qaramastan, qonaqtardy jyly qarsy aldy. «Er jigitiń basyna ne kelip, ne ketpeıdi» demekshi, bir kezderi isti bolyp, taǵdyrdyń tálkegine ushyrap, túrmede uzaq jyl jazasyn ótegen Ramzaev búginde Túrkisib aýdandyq probaııa qyzmetiniń esebinde tur. Oǵan jylda qalalyq qylmystyq atqarý júıesi departamenti tarapynan túrli quqyqtyq-sottyq kómekter kórsetilip keledi.

Amandyq-saýlyq surasyp, az-kem áńgime-dúken qurǵannan soń, Ramzaevqa azyq-túlik qorjyny tabys etildi. «Almaty qalasy Qoǵamdyq damý basqarmasy bıyl bas bostandyǵynan aıyrý oryndarynda jazasyn ótep shyqqan azamattarmen jumys isteýdi bizge tapsyrǵan edi. Sol joba aıasynda túrmeden shyqqan adamdarǵa psıhologııalyq-áleýmettik járdem kórsetý júkteldi. Osy kómektiń bir aıǵaǵy retinde biz búgin sizge azyn-aýlaq materıaldyq turmystyq qoldaý kórsetkimiz keledi», dedi «Máńgilik Qazaqstan» qoǵamdyq qorynyń joba jetekshisi B.Nálibaev. Óz kezeginde Ramzaev qol ushyn sozǵan delegaııaǵa alǵysyn jaýdyrdy. «Bizdi umytpaı, elep-eskerip, kóńilimdi suraı kelgenderińizge myń da bir rahmet. Kómektiń úlken-kishisi bolmaıdy. Sizderdiń tıtteı járdemderińiz bizdiń turmysymyzdy uzaq ýaqytqa jeńildetedi. Maǵan jasaǵan qaıyrymdylyq kómekterińiz ózderińizge eselenip qaıtsyn. Isterińizge tek qana sáttilik tileımin», dep aǵynan jaryldy Idrıs aqsaqal.

Túrkisib aýdanynda turatyn taǵy bir qart azamat – Sergeı Morıakovtyń úıi Ramzaevtyń úıinen alys emes. Sondyqtan uıymdastyrýshylardyń azyq-túlik qorjyndary tıelgen kólikteri kóp uzamaı onyń úıine at basyn tiredi. Sergeı anasymen birge turady eken. Olar aýdandyq probaııa qyzmetiniń ınspektorlaryn jaqyn adamdaryndaı qarsy alyp, qalǵan qonaqtarmen de jeke-jeke tanysty. Alǵashqy bolyp sóz alǵan ınspektor Tursynaı Aýtova qarttardy qurmetteý tek 1-qazan kúnimen shektelmeıtinin aıryqsha atap ótti. «Qarttar – bizdiń qazynamyz. Sizderge qansha kómek kórsetsek te, sizderdiń qoǵamǵa sińirgen eńbekterińizdiń ótemin qaıtara almaımyz. Úkimettik emes uıymdarmen tize qosa otyryp jasaǵan osy kómegimizdi qabyl alyńyzdar» dep ol azyq-túlik qorjynyn úı ıelerine usyndy.

Alpys jasty alqymdaǵan Sergeı Morıakov jasy kelse de, qaladaǵy zaýyttardyń birinde jumys isteıdi. Onyń úkimetke alǵysy sheksiz. «Memleket bizdi esten shyǵarmaı, sizderdeı azamattardy jıi-jıi jiberip, qoldarynan kelgenshe kómekterin kórsetip turady», dep Sergeı rızashylyǵyn jasyrmady.

Aıta ketý kerek, qaıyrymdylyq is-sharasyna joǵaryda atalǵan qyzmetkerlermen qatar Túrkisib aýdandyq probaııa qyzmetiniń basshysy M.Aqsaqalov, Túrkisib aýdandyq jergilikti polıııa qyzmetkeri, aǵa leıtenant E.Baýyrjanuly, probaııa qyzmetiniń ınspektory G.Mustafaeva qatysty.

N.Naýryzálıev

 

Pikirler