ءماجىلىس دەپۋتاتتارى ءبىلىم بەرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى، دەپ حابارلايدى «ادىرنا» ۇلتتىق پورتالى Sputnik قازاقستان اقپاراتتىق اگەنتتىگىنە سىلتەمە جاساپ.
دەپۋتات ءابدىماناپ بەكتۇرعانوۆتىڭ ايتۋىنشا، زاڭ جوباسى اياسىندا بىرنەشە وزەكتى ماسەلەنى شەشۋ جوسپارلانىپ وتىر. ماسەلەن، بۇگىندە قوسارلى وقىتۋعا (دۋالنوە وبۋچەنيە) قاتىستى قۇقىقتىق كولليزيا بار. ەڭبەك كودەكسىندە قوسارلى وقىتۋ جۇيەسىمەن ءبىلىم الاتىنداردىڭ وندىرىستىك وقۋ مەن كاسىبي ءىس-تاجىريبەدەن ءوتۋ ۋاقىتى ەڭبەك ءوتىلى رەتىندە ەسەپتەلەدى. الايدا تۋرا وسى كودەكستە ەڭبەك ءوتىلىن راستايتىن قۇجاتتار تىزبەسىندە قوسارلى وقىتۋ تۋرالى كەلىسىمشارت كورسەتىلمەگەن.
ء"ىس جۇزىندە وسى كولليزياعا بايلانىستى جۇمىس بەرۋشىلەر قوسارلى وقىتۋ شارتى نەگىزىندە وندىرىستىك وقىتۋ مەن كاسىپتىك پراكتيكادان ءوتۋ كەزەڭىن ەسەپكە الماي وتىرادى", - دەيدى بەكتۇرعانوۆ.
بۇدان بولەك، جاڭا زاڭ جوباسى اياسىندا تەحنيكالىق جانە كاسىپتىك مامانداردى دايارلاۋعا مەملەكەتتىك تاپسىرىس بەرۋ قاعيدالارىن بەكىتۋ جوسپارلانعان. اتاپ ايتقاندا، مەملەكەتتىك تاپسىرىس جۇمىسپەن قامتۋ ورگاندارى مەن كاسىپكەرلىك پالاتالارىنىڭ ۇسىنىستارى نەگىزىندە جاسالادى. ال، ەڭ باستىسى، ءاربىر ءوڭىردىڭ ەڭبەك نارىعىنداعى سۇرانىس ەسكەرىلۋى شارت.
"ال جوعارى وقۋ ورىندارىنا بەرىلەتىن مەملەكەتتىك تاپسىرىستا وقۋ ۇزاقتىعىنا قاراي كاسىبي تۇردە ەڭبەكپەن وتەۋ مەرزىمىن بەلگىلەۋ ۇسىنىلادى. وسىلايشا، مەملەكەتتىك تاپسىرىس بويىنشا ءبىلىم العان ازاماتتار بۇكىل كەزەڭدە بارلىق ءۇش جىلدى دا جۇمىسپەن وتەيتىن بولادى. ال باسىندا اقىلى نەگىزدە وقىپ، ارتىنان گرانتقا اۋىسقاندار، يا بولماسا، كەرىسىنشە، الدىمەن گرانتتا، ودان كەيىن اقىلى جۇيەگە اۋىسىپ كەتكەندەر پروپورتسيونالدى تۇردە وتەيدى", - دەپ ءتۇسىندىردى بەكتۇرعانوۆ.
ايتا كەتەيىك، قازاقستاندا پەداگوگيكالىق، مەديتسينالىق، مالدارىگەرلىك جانە اۋىل شارۋاشىلىعى ماماندىقتارىنىڭ تۇلەكتەرىنە ارنالعان گرانتتى وتەۋ تالابى بۇرىننان بار. وتەۋ مەرزىمى – وقۋ بىتىرگەننەن كەيىن كەمىندە 3 جىل.
سونداي-اق، زاڭ جوباسى بويىنشا بازالىق ءبىلىمدى تەكسەرۋگە ارنالعان ء"بىلىم بەرۋ جەتىستىكتەرىنىڭ مونيتورينگى" اتتى ءبىلىمدى سىرتتاي باعالاۋدىڭ جاڭا مودەلىن ەنگىزۋ ۇسىنىلىپ وتىر.
"حالىقارالىق تارجىريبەنى ەسكەرە وتىرىپ، ءبىلىم بەرۋ ۇيىمدارىن سىرتقى باعالاۋ تەتىگى جەتىلدىرىلەدى. بۇل ءبىلىم الۋشىلاردىڭ ءبىلىم ساپاسىن ارتتىرۋعا مۇمكىندىك بەرەدى", - دەيدى بەكتۇرعانوۆ.
تاعى ءبىر تۇزەتۋگە سايكەس، قوسىمشا ءبىلىم بەرۋ ۇيىمدارىنا دا مەملەكەتتىك تاپسىرىستى ورنالاستىرۋ جوسپارلانعان. سونىڭ ارقاسىندا قوسىمشا بىلىممەن تەگىن قامتىلاتىن بالالاردىڭ سانى ارتادى. ال مەكتەپتەردە تىيىم سالىنعان زاتتاردىڭ ءتىزىمى ەنگىزىلەدى.
ءبىلىم جانە عىلىم ۆيتسە-ءمينيسترى شولپان كارينوۆانىڭ ايتۋىنشا، بۇگىندە مەكتەپكە تىيىم سالىنعان زاتتاردى اكەلەتىندەر بار. بىراق بالالاردىڭ قالتاسىن اقتارىپ، تەكسەرىپ وتىرۋعا رۇقسات جوق. ال جاڭا زاڭ اياسىندا ءبىلىم بەرۋ ۇيىمدارىنىڭ جارعىسىنا وزگەرىس ەنگىزىلىپ، ءتيىستى نورمالار جازىلادى.
"الەۋمەتتىك پەداگوگتار مونيتورينگ جاساپ، پسيحولوگتارمەن بىرگە ونداي بالالارمەن تىعىز جۇمىس ىستەيدى", - دەيدى كارينوۆا.
فوتو اشىق دەرەككوزدەن الىندى.
