شىمكەنتتە قىلمىستىق توپ سىياقى الۋ ماقساتىندا 600 ملن. استام سوماعا جالعان شوت-فاكتۋرالار جازۋ ۇستىندە ۇستالدى، دەپ حابارلايدى «ادىرنا» ۇلتتىق پورتالى قر قارجى مينيسترلىگىنىڭ قارجى مونيتورينگى كوميتەتىنە سىلتەمە جاساپ.
قر قم قارجى مونيتورينگى كوميتەتىنىڭ شىمكەنت قالاسى بويىنشا ەكونوميكالىق تەرگەۋ دەپارتامەنتى قىزمەتكەرلەرى جۇرگىزگەن جەدەل-ىزدەستىرۋ ءىس-شاراسى ناتيجەسىندە قالا اۋماعىندا ءبىر توپ ازاماتتىڭ الدىن-الا ءسوز بايلاسىپ، اسا ءىرى كولەمدە ءىس جۇزىندە جۇمىستاردى ورىنداماي، قىزمەتتەر كورسەتپەي، تاۋارلاردى تيەپ-جونەلتپەي شوت-فاكتۋرا جازۋمەن اينالىسقانى انىقتالدى.
«الدىن-الا ءسوز بايلاسقان 4 ازامات 615 ملن. تەڭگەنى قۇرايتىن جالعان شوت-فاكتۋرالاردى جازۋ ءۇشىن 40 ملن.تەڭگە، ياعني جالپى سومانىڭ 6,5% سىياقى رەتىندە الۋ ۇستىندە ۇستالدى»،-دەيدى تەرگەۋشىلەر.
شىمكەنت قالاسى اباي اۋداندىق سوتىنىڭ ۇكىمىمەن ايىپتالۋشىلار قر قك 216 بابىنىڭ 3-ب. سايكەس كىنالى دەپ تانىلىپ، ولارعا 3 جىل مەرزىمگە شارتتى تۇردە باس بوستاندىعىنان ايىرۋ جازاسى تاعايىندالعان.
«ادىرنا» ۇلتتىق پورتالى
