پرايمەريز قاتىسۋشىسى: بىزدە ەكى مەملەكەتتىك ءتىل بار

4185
Adyrna.kz Telegram

ەكىباستۇز قالاسىندا پرايمەريزگە قاتىسۋشى، جاستار باستامالارىن دامىتۋ ورتالىعىنىڭ باسشىسى مارال كاراگەسەكوۆانىڭ مەملەكەتتىك ءتىل تۋرالى پىكىرى جۇرتشىلىقتىڭ اشۋىن تۋعىزدى، دەپ حابارلايدى "ادىرنا" ۇلتتىق پورتالى.

اتالعان مەكەمە باسشىسى قولداۋشىلارىمەن بىرگە وتكەن دەباتتا ءبىر پىكىرىندە: "نەگىزىندە، بىزدە ەكى مەملەكەتتىك ءتىل بار" دەپ سالدى تۇيەدەن تۇسكەندەي. ءوزى بىلدەي ءبىر مەكەمە باسشىسى بولعانىمەن قويماي، پرايمەريزگە قاتىسۋشى ەكەنىن دە ەسكەرمەي بۇلاي كوسىلە، كەسە سويلەۋى - الەۋمەتتىك جەلى قولدانۋشىلارىنىڭ قارسىلىعىنا تاپ بولدى.

جارقىنبەك امانتاي ەسىمدى كەرەكۋلىك جۋرناليست جەكە پاراقشاسىنا: "بىزدە ءبىر عانا مەملەكەتتىك ءتىل بار! ماڭىزدى ءبىر مەكەمەنى باسقاراتىن ادامنىڭ ءسوزى وسىنداي بولسا، ماسقارا! شارا قولدانۋدى تالاپ ەتەمىز!" دەپ جازدى.

ال، جانارگۇل قادىروۆا ەسىمدى جەلى قولدانۋشىسى: "مىناداي ساياسي ساۋاتسىز ادام مەملەكەتتىك ورگاندا، ياعني، جاستار باستامالارىن دامىتۋ ورتالىعى باسشىسىنىڭ ورىنتاعىندا نەگە وتىرادى؟ مۇندايلار قوعام ءۇشىن قاۋىپتى! ورنىنان كەتسىن، ءتىلىمىزدى مازاق قىلماي!", دەپ پىكىر قالدىرىپتى.

قازاقستان رەسپۋبليكاسىنىڭ مەملەكەتتىك ءتىل تۋرالى زاڭىن مەنسىنبەي، جۇرت الدىندا اۋىزىنا كەلگەندى ايتا بەرەتىن ازاماتتىڭ باسشىلىق ورىندا وتىرىپ، قوعام نارازىلىعىن تۋدىرۋىنا نە سەبەپ؟

بۇنىڭ جاۋابىن الداعى كۇندەردە ىزدەيتىن بولامىز.

 

پىكىرلەر