Ekibastuz qalasynda praımerızge qatysýshy, jastar bastamalaryn damytý ortalyǵynyń basshysy Maral Karagesekovanyń Memlekettik til týraly pikiri jurtshylyqtyń ashýyn týǵyzdy, dep habarlaıdy "Adyrna" ulttyq portaly.
Atalǵan mekeme basshysy qoldaýshylarymen birge ótken debatta bir pikirinde: "Negizinde, bizde eki memlekettik til bar" dep saldy túıeden túskendeı. Ózi bildeı bir mekeme basshysy bolǵanymen qoımaı, praımerızge qatysýshy ekenin de eskermeı bulaı kósile, kese sóıleýi - áleýmettik jeli qoldanýshylarynyń qarsylyǵyna tap boldy.
Jarqynbek Amantaı esimdi kerekýlik jýrnalıst jeke paraqshasyna: "Bizde bir ǵana memlekettik til bar! Mańyzdy bir mekemeni basqaratyn adamnyń sózi osyndaı bolsa, masqara! Shara qoldanýdy talap etemiz!" dep jazdy.
Al, Janargúl Qadyrova esimdi jeli qoldanýshysy: "Mynadaı saıası saýatsyz adam memlekettik organda, ıaǵnı, jastar bastamalaryn damytý ortalyǵy basshysynyń oryntaǵynda nege otyrady? Mundaılar qoǵam úshin qaýipti! Ornynan ketsin, tilimizdi mazaq qylmaı!", dep pikir qaldyrypty.
Qazaqstan Respýblıkasynyń Memlekettik til týraly Zańyn mensinbeı, jurt aldynda aýyzyna kelgendi aıta beretin azamattyń basshylyq orynda otyryp, qoǵam narazylyǵyn týdyrýyna ne sebep?
Bunyń jaýabyn aldaǵy kúnderde izdeıtin bolamyz.
