الەۋمەتتىك جەلىنىڭ الەۋەتى ارتقان زامان. تاربيە قۇرالى دەۋگە دە بولادى. سەبەبى ەڭكەيگەن كارىدەن ەڭبەكتەگەن بالاعا دەيىن بارلىعىن وسى الەۋمەتتىك جەلىدەن تابۋعا بولادى. ەرسى قىلىقتاردى جاساپ، شەكتەن شىعادى.
نەگىزى كوپشىلىككە جول تارتقان كەز كەلگەن دۇنيە سارالاۋ مەن ساراپتاۋدان وتكەنى ابزال ال كىم كورىنگەننىڭ شالاجانسارى كوپشىلىككە ۇسىنىلماعانى جاقسى. شىرپى جاقساڭ، تۇتانۋعا شاق تۇرعان قازىرگى قوعامدا جەلىلەردە جەلدەي ەسكەن ءتۇرلى قاۋەسەت پەن گۋ-گۋ، ارانداتۋدىڭ ارتۋى – اقيقاتىن ايتساق، الاڭداتادى.
⠀ويىنا كەلگەنىن ىستەمەگەندە قايتسىن؟ كەشىرىم سۇراپ قۇتىلۋعا بولادى ەمەس پە؟ جالعان اقپارات تاراتىپ، يا بولماسا جالاڭاشتانىپ، ۇلتتىق كيىمدەردى قورلاپ، قازاقتاردى مازاق ەتىپ، اۋزىنا كەلگەنىن ايتىپ، قازاق قىزىن قورلاپ، ۇلتىمىزدىڭ ۇلى تۇلعالارىن مازاق ەتۋگە ابدەن بولادى. تەك ەرتەسىنە «بارشا قازاقستاندىقتاردان كەشىرىم سۇرايمىن!» دەپ بەينەجازبا تۇسىرسە سالساڭ بولعانى. ەسەسىنە وقىرماندار سانىن كوبەيتىپ، ءبىر «حايپ» جاساۋعا بولادى.
⠀جەلىنىڭ ويسىزدارى ەلدى شۋلاتۋدان جالىعار ەمەس. ەندىگى كەزەك الاش زيالىلارىنا دا كەلىپ جەتتى. اباي مەن ىبىراي، احمەت بايتۇرسىنوۆ پەن ءاليحان بوكەيحانوۆتى مازاق قىلۋ ارقىلى قازاق حالقىنىڭ نامىسىن اياققا تاپتايتىن بەينەجازبالار پايدا بولدى. ونى كوپ ادامدار كورىپ، قولداپ، جاستار بولسا “لايك” باسىپ، كۇلكىگە اينالدىرۋدا. بۇل بارىپ تۇرعان ۇلتتىق نامىستى، قازاق حالقىن قورلاۋ عوي!
⠀قازاقتىڭ بولاشاعى ءۇشىن، تاۋەلسىزدىگى ءۇشىن جانىن قيعان ءاليحانداردى بۇگىنگىنىڭ «جاستارى» مازاق ۆيدەو جاساپ، ناداندىقتىڭ شىڭىن كورسەتتى. الگى ۆيدەوعا ءاليحان اتامىزدىڭ جاي سۋرەتىن ەمەس، اتۋ جازاسىنا كەسىلمەي تۇرىپ تۇرمەدە تۇسكەن سوڭعى سۋرەتىن پايدالانعان. ءاليحان مەن احمەتتەر بىزدەر ءۇشىن اتىلىپ كەتتى. اباي اتامىز نادان ۇرپاعىن وياتۋ جولىندا قارا ءسوز جازىپ قام جەپ ەدى. ال بۇل دەگەنىڭ ناعىز ۇلتتىڭ ۇلىلارىنا جاسالعان قاستاندىق، زۇلىمدىق.
ء⠀اربىر نامىستى قازاق بۇل جاعدايعا بەي-جاي قارامايتىنى انىق. سوندىقتان كەزەكتى جاستاردىڭ ەركەلىگى دەپ كەشىرە سالىپ، تاعى دا قايتالانۋىنا جول بەرمەي، زاڭ اياسىندا قاتاڭ جازا قولدانىلسىن! بۇعان قالايشا ۇندەمەي قالامىز؟ الەۋمەتتىك جەلىگە جاريالاعان ادامدى جاۋاپقا تارتۋ قاجەت. ءشوپ تە، اڭ دا، قۇس تا قورعالىپ جاتىر. ال ۇلى تۇلعالارىمىزدىڭ اتىن كىم قورعايدى؟! ۇكىمەت تاراپىنان ەكىنشى مۇنداي جاعداي قايتالانبايتىنداي شارالار قابىلدانسا يگى ەدى.
Facebook پاراقشاسىنان الىندى.
