Áleýmettik jeliniń áleýeti artqan zaman. Tárbıe quraly deýge de bolady. Sebebi eńkeıgen káriden eńbektegen balaǵa deıin barlyǵyn osy áleýmettik jeliden tabýǵa bolady. Ersi qylyqtardy jasap, shekten shyǵady.
Negizi kópshilikke jol tartqan kez kelgen dúnıe saralaý men saraptaýdan ótkeni abzal al kim kóringenniń shalajansary kópshilikke usynylmaǵany jaqsy. Shyrpy jaqsań, tutanýǵa shaq turǵan qazirgi qoǵamda jelilerde jeldeı esken túrli qaýeset pen gý-gý, arandatýdyń artýy – aqıqatyn aıtsaq, alańdatady.
⠀Oıyna kelgenin istemegende qaıtsin? Keshirim surap qutylýǵa bolady emes pe? Jalǵan aqparat taratyp, ıa bolmasa jalańashtanyp, ulttyq kıimderdi qorlap, qazaqtardy mazaq etip, aýzyna kelgenin aıtyp, qazaq qyzyn qorlap, ultymyzdyń uly tulǵalaryn mazaq etýge ábden bolady. Tek ertesine «Barsha qazaqstandyqtardan keshirim suraımyn!» dep beınejazba túsirse salsań bolǵany. Esesine oqyrmandar sanyn kóbeıtip, bir «haıp» jasaýǵa bolady.
⠀Jeliniń oısyzdary eldi shýlatýdan jalyǵar emes. Endigi kezek Alash zııalylaryna da kelip jetti. Abaı men Ybyraı, Ahmet Baıtursynov pen Álıhan Bókeıhanovty mazaq qylý arqyly qazaq halqynyń namysyn aıaqqa taptaıtyn beınejazbalar paıda boldy. Ony kóp adamdar kórip, qoldap, jastar bolsa “laık” basyp, kúlkige aınaldyrýda. Bul baryp turǵan ulttyq namysty, qazaq halqyn qorlaý ǵoı!
⠀Qazaqtyń bolashaǵy úshin, táýelsizdigi úshin janyn qıǵan Álıhandardy búginginiń «jastary» mazaq vıdeo jasap, nadandyqtyń shyńyn kórsetti. Álgi vıdeoǵa Álıhan atamyzdyń jaı sýretin emes, atý jazasyna kesilmeı turyp túrmede túsken sońǵy sýretin paıdalanǵan. Álıhan men Ahmetter bizder úshin atylyp ketti. Abaı atamyz nadan urpaǵyn oıatý jolynda qara sóz jazyp qam jep edi. Al bul degeniń naǵyz ulttyń ulylaryna jasalǵan qastandyq, zulymdyq.
⠀Árbir namysty qazaq bul jaǵdaıǵa beı-jaı qaramaıtyny anyq. Sondyqtan kezekti jastardyń erkeligi dep keshire salyp, taǵy da qaıtalanýyna jol bermeı, zań aıasynda qatań jaza qoldanylsyn! Buǵan qalaısha úndemeı qalamyz? Áleýmettik jelige jarııalaǵan adamdy jaýapqa tartý qajet. Shóp te, ań da, qus ta qorǵalyp jatyr. Al uly tulǵalarymyzdyń atyn kim qorǵaıdy?! Úkimet tarapynan ekinshi mundaı jaǵdaı qaıtalanbaıtyndaı sharalar qabyldansa ıgi edi.
Facebook paraqshasynan alyndy.
