بۇگىن ءماجىلىستىڭ جالپى وتىرىسىندا توراعا نۇرلان نىعماتۋلين فونوگراممامەن ءان ايتاتىندارعا قاتىستى پىكىر ءبىلدىردى دەپ حابارلايدى «ادىرنا» ۇلتتىق پورتالى Baq.kz سايتىنا سىلتەمە جاساپ.
وندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ جوباسى تالقىعا سالىندى. زاڭ جوباسىن تانىستىرعان مادەنيەت جانە سپورت ءمينيسترى اقتوتى رايىمقۇلوۆا ءانشى كونتسەرتتە فونوگراممامەن ءان ايتقاندا كورەرمەنگە ەسكەرتۋى كەرەك دەگەن بولاتىن. وسىعان بايلانىستى ءماجىلىس توراعاسى پىكىر ءبىلدىردى.
مەنىڭشە، ناعىز ونەر، ول – ايتىس. ايتىسقا فونوگراممامەن شىعىپ كورىڭىزشى. وندا ەشقاشان، ەشقانداي فونوگرامما بولمايدى. سول ءۇشىن شىعار، حالقىمىز وسى ايتىستى جاقسى كورەدى. "قيسىق اربا جول بۇزادى" دەپ حالقىمىز ايتقانداي، ونەر ارقاشان دا تازا بولۋى كەرەك. ءاندى جاندى داۋىستا ايتقان دۇرىس. ال فونوگرامما بولسا، وندا ونى الدىن الا ەسكەرتۋ قاجەت جانە بيلەتتىڭ باعاسى دا سوعان سايكەس بولۋى ءتيىس. ودان كەيىن حالىق ول كونتسەرتكە باراتىن نە بارمايتىنىن ءوزى شەشەدى. ارينە، كونتسەرت جاندى داۋىستا بولسا، انشىگە حالىقتىڭ باعاسى دا، قۇرمەتى دە جوعارى بولادى، - دەدى نۇرلان نىعماتۋلين.
ءمينيستردىڭ ايتۋىنشا، ءانشى بۇل تالاپتى ورىنداماسا، زاڭ الدىندا جاۋاپ بەرۋى مۇمكىن ەكەنىن ايتتى.
ماڭىزدى نورمانىڭ ءبىرى - مۋزىكالىق تۋىندىنى فونوگراممامەن ورىنداعان كەزدە ونى الدىن الا حابارلاۋ. بۇل ۇيىمداستىرۋشى مەن ورىنداۋشىنىڭ اراسىندا كەلىسىمشارت بويىنشا رەتتەلەدى. ەگەر كەلىسىمشارتتا ول نورما بۇزىلسا، وندا اكىمشىلىك جاۋاپكەرشىلىك كوزدەلەدى. وزدەرىڭىز بىلەسىزدەر، قازاقستاندا اكىمشىلىك قۇقىق بۇزۋشىلىق كودەكس بار. وسى كودەكستىڭ نورماسىنا سايكەس، اكىمشىلىك قۇقىق بۇزۋشىلىق نورماسى قاراستىرىلادى، - دەدى اقتوتى رايىمقۇلوۆا.
