ەكى كۇن ىشىندە قوس بىردەي پرەزيدەنتتىڭ كەڭەسشىسى بولعان سۋما چاكرابارتي كىم؟

1893

كەشە بريتانيالىق ەكونوميست-يۋريست سۋما چاكرابارتي ەل پرەزيدەنتى قاسىم-جومارت توقاەۆتىڭ ەكونوميكالىق دامۋ ماسەلەلەرى بويىنشا شتاتتان تىس كەڭەسشىسى لاۋازىمىن يەلەنىپ، جۇرت قىزۋ تالقىعا سالعان بولاتىن. بۇگىن ءدال سول سۋما چاكرابارتي وزبەكستان رەسپۋبليكاسىنىڭ  پرەزيدەنتى شاۆكات ميرزياەۆتىڭ دە كەڭەسشىسى بولىپ تاعايىندالدى. قوس بىردەي پرەزيدەنتتىڭ كەڭەسشىسى لاۋازىمىنا يە بولعان سۋما چاكرابارتي كىم؟

 ول 1959 جىلى ءۇندىستاننىڭ دجالپايگۋري قالاسىندا تۋعان. 1964 جىلى وتباسىمەن ۇلىبريتانياعا كوشىپ بارعان. وكسفوردتىڭ تۇلەگى: فيلوسوفيا، ساياساتتانۋ، ەكونوميكا سالالارى بويىنشا ماماندانعان. ۇلىبريتانيانىڭ ازاماتى.

چاكرابارتي 1984 جىلى ۇلىبريتانيانىڭ سىرتقى دامۋ باسقارماسىندا (ODA) اعا ەكونوميكالىق كومەكشى بولىپ قىزمەت ەتەدى.

1980 جىلدارى ۇلىبريتانيا ۇكىمەتى ونى حالىقارالىق ۆاليۋتا قورى مەن دۇنيەجۇزىلىك بانككە قىزمەت ەتۋگە جىبەرەدى.

1996 جىلى ول ۇلىبريتانيانىڭ قارجى مينيسترلىگىنىڭ ءرولىن اتقاراتىن ۇلى مارتەبەلى قازىناشىلىققا (Her Majesty's Treasury)  اۋىسىپ، سودان كەيىن پرەمەر-مينيستر توني بلەردى قولداۋ ءۇشىن تيىمدىلىك پەن يننوۆاتسيا بويىنشا جاڭا  ورتالىق بولىمشە قۇرۋعا جاۋاپتى بولادى.

2001 جىلى چاكرابارتي ايماقتىق دامۋ باعدارلامالارى بويىنشا حالىقارالىق دەپارتامەنتتىڭ باس ديرەكتورى بوپ سايلاندى. ونىڭ قاراماعىندا افريكا، ازيا، شىعىس ەۋروپا، كاريب تەڭىزى جانە لاتىن امەريكاسىنان 1200 قىزمەتكەر بولادى. سونداي-اق ول 2009 جىلى 8 جەلتوقساندا 2003 جىلى بولعان ۇلىبريتانيانىڭ يراكقا شابۋىلىن تالقىلاپ، «يراك تەرگەۋىندە» كۋالىك بەرەدى.

2002-2007 جىلدارى حالىقارالىق دامۋ مينيسترلىگىندە تۇراقتى حاتشى بولدى، سودان كەيىن وسى لاۋازىمىن 2012 جىلعا دەيىن ادىلەت مينيسترلىگىندە جالعاستىرادى. ول وسى كەزەڭدەگى ءوزىنىڭ باستى جەتىستىگىنىڭ ءبىرى مينيسترلىكتىڭ جۇمىس ىستەۋىنىڭ جاڭا مودەلىن ازىرلەۋ جانە ەنگىزۋ دەپ ەسەپتەيدى. وسىنىڭ ارقاسىندا ميلليارد فۋنت ستەرلينگتەن استام قاراجات ۇنەمدەي العان.

2012 جىلى چاكرابارتي ەۋروپالىق قايتا قۇرۋ جانە دامۋ بانكىنىڭ (ەقدب) پرەزيدەنتى بولىپ سايلانىپ، بۇل قىزمەتىن 2020 جىلدىڭ 2 شىلدەسىنە دەيىن جالعاستىرادى. ول ەقدب بانكىندە قىزمەت ەتە وتىرىپ، ۇلكەن رەفورمالار جاساي الدىم دەپ مالىمدەگەن.

چاكرابارتيدىڭ قازاقستانمەن بايلانىسى جايلى 2013 جىلى «پاۆلودارەنەرگو» اق-نا (80 ميلليون دوللار سوماسىندا), «سەۆكازەنەرگو» اق-نا (40 ميلليون), «پاۆلودار اەك» اق-نا جانە «سولتۇستىك قازاقستان اەك» اق-نا (9 ميلليون دوللاردان) ەققدب-ءنىڭ نەسيە قاراجاتىن ءبولۋ تۋرالى كەلىسىمگە قول قويعانى تۋرالى اقپارات بار. بۇدان بولەك، 2016 جىلدىڭ مامىر ايىندا چاركابارتي شىعىس قازاقستان وبلىسىن سۋمەن قامتۋ ءۇشىن جالپى سوماسى 4,4 ميلليارد تەڭگەگە جوبانى قولداۋ تۋرالى شارتقا قول قويعان.

چاكرابارتي وسى جىلدىڭ 2 ناۋرىزىندا پرەمەر-مينيستر اسقار مامينمەن كەزدەسىپ، ۇلكەن الماتى اينالما اۆتوموبيل جولىن سالۋ  مەملەكەتتىك-جەكە ارىپتەستىك سالاسىنداعى ءىرى جوبانى ىسكە اسىرۋ ماسەلەلەرىن تالقىلاعان. پرەمەر-ءمينيستردىڭ ايتۋىنشا, وتكەن 27 جىل ىشىندە ەققدب-ءنىڭ قازاقستاننىڭ قارجى، ينفراقۇرىلىم، ەنەرگەتيكا، اۋىل شارۋاشىلىعى سالالارىنا، IT-تەحنولوگيالار مەن كوممۋنالدىق قىزمەتتەر سەكتورلارىنا، سونداي-اق شاعىن جانە ورتا بيزنەستى قولداۋ بويىنشا سالعان ينۆەستيتسيالارىنىڭ كولەمى 271 جوبا ءۇشىن $9 ملردتان اسقان.

فوتو اشىق دەرەككوزدەن الىندى 

ايجان پەردەبەكقىزى

«ادىرنا» ۇلتتىق پورتالى

پىكىرلەر
رەداكتسيا تاڭداۋى