وتكەن اپتادا BI Group كومپانياسى شىمكەنتتە قالانىڭ سولتۇستىك بولىگىندە 500 مىڭ شارشى مەتر اۋماقتا زاماناۋي اكىمشىلىك-تۇرعىن ءۇي ورامنىڭ قۇرىلىس جوباسىن ۇسىندى.
بايدىبەك بي داڭعىلىنداعى يپپودروم ورنىندا پايدا بولاتىن بولاشاق كەشەن تۇجىرىمداماسىنىڭ تانىستىرىلىمىنا قر پرەمەر-ءمينيسترىنىڭ ورىنباسارى رومان سكليار، شىمكەنت قالاسىنىڭ اكىمى مۇرات ايتەنوۆ، كومپانيا باسشىسى ايدىن راحىمبەۆ قاتىستى.
شىمكەنت قالاسى اكىمىنىڭ ورىنباسارى باۋىرجان مامىتاليەۆ وسى جوبانى ىسكە اسىرعان جاعدايدا قالانىڭ دامۋ مۇمكىندىكتەرى تۋرالى جان-جاقتى ءتۇسىندىرىپ بەردى.
– بۇل وتە ۇلكەن جوبا. جوبا ىسكە اسىرىلعان جاعدايدا، ونداعى ينۆەستيتسيا كولەمى 135 ميلليارد تەڭگە، سالىقتىق جەڭىلدىكتەر شامامەن 15 ميلليارد تەڭگەنى قۇرايدى. قۇرىلىسقا جالپى 6000-عا جۋىق ادام تارتىلادى. ال قۇرىلىس اياقتالعاننان كەيىن الەۋمەتتىك جانە كوممەرتسيالىق نىسانداردا شامامەن 2500 تۇراقتى جۇمىس ورنى اشىلادى. مەكتەپتەر، بالاباقشالار، ءبىلىم بەرۋ ورتالىقتارى جانە تاعى باسقا نىسانداردى سالۋ كوزدەلىپ وتىر، – دەدى ب.مامىتاليەۆ.
قالا اكىمدىگىنىڭ ءباسپاسوز قىزمەتى حابارلاعانداي، BI Group ازىرگە تەك ءوز تۇجىرىمداماسىن ۇسىندى. بارلىعى ەگجەي-تەگجەيلى پىسىقتالعاننان كەيىن، شىمكەنتتە قوعامدىق تىڭداۋلار وتكىزىلەدى.
– ەگجەي-تەگجەيلى جوسپارعا قالا اكىمى قوعامدىق تىڭداۋلاردىڭ وڭ ناتيجەلەرىنەن كەيىن، ياعني جوبانى كوپشىلىك قولداسا عانا قول قويادى. ەگەر ازاماتتاردىڭ كوپشىلىگى جوبانى قابىلداماسا، ءبىز ونى جۇزەگە اسىرمايمىز. بىراق بۇل جوبالار مەگاپوليستىڭ ۇزاق مەرزىمدى دامۋى اياسىندا قولعا الىناتىنىن تەرەڭىنەن ءتۇسىنۋ قاجەت.
جالپى بۇل ورامنىڭ كالانى ودان ءارى دامىتۋدا زور الەۋەتى بار. بۇل ورام ناۋرىز الاڭىن Shymkent City قالاشىعىمەن بايلانىستىرادى جانە بۇل اۋماق ودان ءارى تارتىمدى بولا تۇسەدى.
يپپودرومدى كوشىرۋ 2018 جىلى، شىمكەنتتىڭ باس جوسپارى وزەكتەندىرىلىپ، قالاعا رەسپۋبليكالىق مارتەبە بەرىلگەن كەزدە جوسپارلانعان ەدى. سول كەزدە جاڭا يپپودرومنىڭ قۇرىلىسىنا شامامەن ەكى ميلليارد تەڭگە قاجەت بولدى. ەگەر جاڭا اكىمشىلىك-تۇرعىن ءۇي كەشەنىنىڭ جوباسى ماقۇلدانسا، يپپودرومدى BI Group ءوز قاراجاتىنا سالىپ بەرەدى، – دەدى قالا اكىمىنىڭ ورىنباسارى.
جالپى بۇرىنعى يپپودرومنىڭ جەرى BI Group-قا تەگىن بەرىلمەيدى. جەر شىمكەنت الەۋمەتتىك-كاسىپكەرلىك كورپوراتسياسىنىڭ ۇلەسىنە بەرىلەدى. جانە اكك ونى ينۆەستيتسيالىق جوبا رەتىندە جۇزەگە اسىرادى.
سونداي-اق، BI Group تۇجىرىمداماسىندا ورام اۋماعىندا ەرەكشە بالالارعا ارنالعان «جۇلدىز-اي» وڭالتۋ ورتالىعىن سالۋ قاراستىرىلىپ وتىر. مۇنداي ورتالىقتار ازىرگە نۇر-سۇلتان مەن الماتى قالاسىندا عانا بار.
باۋىرجان جايمۇرزىنۇلىنىڭ ايتۋىنشا، وسى ۋاقىتقا دەيىن بىردە-ءبىر جەكە كومپانيا شىمكەنتكە 135 ميلليارد تەڭگە ينۆەستيتسيا سالماعان.
قالا اكىمدىگى قۇرىلىس جۇمىستارى دەندروساياباق اۋماعىنا جاقىندامايتىنىن دا مالىمدەگەن ەدى. ويتكەنى، ول ەرەكشە قورعالاتىن ايماق. بىراق تمد-نىڭ مادەني استاناسى جىلى اياسىندا سالىنعان ۋاقىتشا قۇرىلىم ەتنواۋىل بۇزىلادى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
