وپەك اببرەۆياتۋراسى «مۇناي ەكسپورتتاۋشى ەلدەر ۇيىمىن» بىلدىرەدى. ەكسپورتتاۋشى ەلدەر ۇيىمى 1960 جىلعى 10-14 قىركۇيەكتە باعداتتاعى كونفەرەنتسيادا دامىپ كەلە جاتقان مۇناي ءوندىرۋشى بەس ەل – يران، يراك، كۋۆەيت، ساۋد ارابياسى جانە ۆەنەسۋەلانىڭ باستاماسىمەن قۇرىلدى، دەپ حابارلايدى قازاقپارات.
ۇيىمدى قۇرۋ ماقساتى - ۇلتتىق مۇددەلەردى ەسكەرە وتىرىپ، جاڭا تاۋەلسىز مەملەكەتتەردىڭ ءوز رەسۋرستارىن جانە ولاردىڭ پايدالانىلۋىن باقىلاۋعا دەگەن ۇمتىلىسى. 1960-شى جىلدارى الەمدىك نارىقتا مۇناي ۇسىنىسى ارتىعىمەن بولدى، سوندىقتان وپەك-ءتى قۇرۋ ماقساتىنىڭ ءبىرى – باعانىڭ ودان ءارى قۇلدىراۋىنا جول بەرمەۋ.
وپەك مۇناي ءوندىرۋدىڭ ۇجىمدىق كورىنىسىن ازىرلەدى جانە ۇيىمنىڭ حاتشىلىعىن قۇردى، ول العاشىندا جەنەۆادا، ال 1965 جىلعى 1 قىركۇيەكتەن باستاپ ۆەنادا ورنالاستى. وپەك قۇرامىنا 13 ەل كىرەدى: الجير، انگولا، ۆەنەسۋەلا، گابون، يران، يراك، كونگو، كۋۆەيت، ليۆيا، بىرىككەن اراب امىرلىكتەرى، نيگەريا، ساۋد ارابياسى، ەكۆاتورلىق گۆينەيا. 2016 جىلعى قاراشادا وپەك+ بەيرەسمي فورماتى قۇرىلدى، وعان 10 ەل كىرەدى: ازەربايجان، باحرەين، برۋنەي، قازاقستان، مالايزيا، مەكسيكا، ومان، رەسەي، سۋدان، وڭتۇستىك سۋدان.
قازاقستان ۇيىم حاتشىلىعىنىڭ شاقىرۋىمەن 2019 جىلعى ناۋرىزدا وپەك+ مونيتورينگ كوميتەتىنىڭ قاتىسۋشىسى بولدى، بۇل حالىقارالىق مۇناي-گاز قاۋىمداستىعىندا ەل بەدەلىنىڭ وسكەنىن بىلدىرەدى. قازاقستان وپەك+ ۇلكەن وتباسىنىڭ مۇشەسى بولا وتىرىپ، الەمدىك مۇناي يندۋسترياسىنىڭ دامۋىنا ىقپال ەتەتىن شەشىمدەردى قابىلداۋعا تەڭ دەڭگەيدە قاتىسادى.
وپەك جانە وپەك+ قاتىسۋشى ەلدەرى الەمدىك مۇناي نارىعىندا سۇرانىس پەن ۇسىنىس بالانسىن قالپىنا كەلتىرۋ ءۇشىن وراسان زور كۇش-جىگەرىن سالادى. COVID-19 ىندەتى بارلىق مۇناي ەكسپورتتاۋشى ەلدەرى ءۇشىن ناعىز سىناق بولدى.
وپەك-ءتىڭ باس حاتشىسى مۇحاممەد باركيندو ۇيىمنىڭ 60 جىلدىق مەرەيتويىنا بايلانىستى قۇتتىقتاۋ ءسوز سويلەدى. «بولاشاققا كوز جۇگىرتە وتىرىپ، وپەك ءبىزدىڭ تاريحىمىزداعى الداعى 60 جىلدا كەزدەسەتىن جاڭا سىن-قاتەرلەرگە دايىن. ءبىزدىڭ مۇددەمىز وندىرۋشىلەر، سونداي-اق تۇتىنۋشىلاردىڭ يگىلىگى ءۇشىن تەڭدەستىرىلگەن جانە تۇراقتى مۇناي نارىعىن قالىپتاستىرۋدان تۇرادى»، - دەدى ول.
سونداي-اق ول بۇل ميسسيانى قاتىساتىن 23 ەل، ونىڭ ىشىندە رەسەيدى قوسا العاندا، بەلگىلى وپەك+ مۇناي ءوندىرۋدى رەتتەۋ تۋرالى كەلىسىم ارقىلى ويداعىداي جۇزەگە اسىپ كەلە جاتقانىن اتاپ ءوتتى. باركيندو ەنەرگەتيكالىق كەدەيلىكتى قىسقارتۋ كەزىندە ءدال وسى نارسە ادامزاتقا تۇراقتى دامۋعا قول جەتكىزۋگە مۇمكىندىك بەرەدى دەپ سانايدى.
