قىتاي ۇشاعى قازاقستان كوگىنە حيميالىق زاتتار شاشىپ ءجۇر مە؟

2084
Adyrna.kz Telegram

الماتى كوگىندە قالىقتاعان "قىتاي ۇشاعى حيميالىق راديواكتيۆتى زاتتاردى شاشىپ جۇرگەنى" تۋرالى اقپارات مەسسەندجەرلەردە تاراعان بولاتىن. بەلگىلى بولعانداي، بۇل اقپارات جالعان بولىپ شىقتى دەپ حابارلايدى "ادىران" ءتىلشىسى KAZ.NUR.KZ - كە سىلتەمە جاساپ.

"كوروناۆيرۋس - بۇل وكپە مەن برونحتىڭ راديواكتيۆتى كۇيىك شالۋى" - دەپ سەندىردى اۋديوجازبانى تاراتقان ايەل.

Stopfake.kz اقپاراتىنا سايكەس، اۋديوجازبامەن بىرگە لاينەردىڭ مارشرۋتى كورسەتىلگەن سكرينشوت تاراتىلعان.

كەيىن انىقتالعانداي، بۇل سكرينشوتتا Qatar Airways اۋە كومپانياسىنىڭ قاراپايىم ۇشاعىنىڭ مارشرۋتى كورسەتىلگەن بولىپ شىقتى. اتالمىش ۇشاق بەيجىڭ-دوحا باعىتىندا تۇراقتى تۇردە رەيس ورىندايدى ەكەن.

يندۋستريا جانە ينفراقۇرىلىمدىق دامۋ مينيسترلىگى ۇشاقتىڭ بەيجىڭنەن دوحاعا ۇشىپ جۇرگەنىن راستادى.

"Qatar Airways اۋە كومپانياسىنىڭ "بەيجىڭ-دوحا" مارشرۋتى بويىنشا QR8069 تۇراقتى رەيسى A7-BAL نومىرىمەن تىركەلگەن بوينگ-777 ۇشاعىمەن 2020 جىلدىڭ 13 قىركۇيەگىندە جۇزەگە اسىرىلدى. بورت قر اۋە كەڭىستىگىنە RULAD نۇكتەسى ارقىلى تاڭعى 06:08-دە ەندى جانە SULET نۇكتەسى ارقىلى تاڭعى 06:46-دا قر اۋە كەڭىستىگىنەن شىقتى. قر اۋە كەڭىستىگىن كەسىپ وتكەن ۇشاقتىڭ ۇشۋ بيىكتىگى 11 مىڭ مەتردى قۇرادى. اتالمىش رەيس كۇندەلىكتى ورىندالادى", - دەپ مالىمدەدى مەكەمە.

ودان بولەك قۇزىرلى مەكەمە ۇشاقتىڭ قانداي دا ءبىر زاتتاردى اۋەدەن شاشقانى تۋرالى اقپاراتتى جوققا شىعاردى. باسىلىم مالىمەتىنە سايكەس، بەيجىڭنەن دوحاعا بەت العان ۇشاق جولاي قىتايدى، موڭعوليانى، قازاقستاندى، قىرعىزستاندى، وزبەكستاندى، تۇركىمەنستاندى، يران مەن كاتاردى كەسىپ وتەدى. لاينەر 6 مىڭ شاقىرىمنان استام قاشىقتىقتى ەڭسەرەدى. باسىلىمنىڭ جازۋىنشا، كوپشىلىك حيميالىق زاتتارعا ۇقساتقان ءىز ۇشاقتىڭ كوندەنساتسيالىق ءىزى بولىپ تابىلادى.

ەسكە سالساق، بۇعان دەيىن دە ۇشاقتىڭ حيميالىق زاتتار شاشىپ جۇرگەنى تۋرالى جالعان اقپارات تاراعان بولاتىن.

سول ارادا قىتاي عالىمدارى كوروناۆيرۋسپەن اۋىرىپ شىققان ادامداردىڭ اعزاسىندا انتيدەنەلەر ءبىر ايدىڭ ىشىندە ازايىپ كەتەتىنىن انىقتاعان.

"ادىرنا" ۇلتتىق پورتالى

پىكىرلەر