Almaty kóginde qalyqtaǵan "Qytaı ushaǵy hımııalyq radıoaktıvti zattardy shashyp júrgeni" týraly aqparat messendjerlerde taraǵan bolatyn. Belgili bolǵandaı, bul aqparat jalǵan bolyp shyqty dep habarlaıdy "Adyran" tilshisi KAZ.NUR.KZ - ke silteme jasap.
"Koronavırýs - bul ókpe men bronhtyń radıoaktıvti kúıik shalýy" - dep sendirdi aýdıojazbany taratqan áıel.
Stopfake.kz aqparatyna sáıkes, aýdıojazbamen birge laınerdiń marshrýty kórsetilgen skrınshot taratylǵan.
Keıin anyqtalǵandaı, bul skrınshotta Qatar Airways áýe kompanııasynyń qarapaıym ushaǵynyń marshrýty kórsetilgen bolyp shyqty. Atalmysh ushaq Beıjiń-Doha baǵytynda turaqty túrde reıs oryndaıdy eken.
Indýstrııa jáne ınfraqurylymdyq damý mınıstrligi ushaqtyń Beıjińnen Dohaǵa ushyp júrgenin rastady.
"Qatar Airways áýe kompanııasynyń "Beıjiń-Doha" marshrýty boıynsha QR8069 turaqty reısi A7-BAL nómirimen tirkelgen Boıng-777 ushaǵymen 2020 jyldyń 13 qyrkúıeginde júzege asyryldy. Bort QR áýe keńistigine RULAD núktesi arqyly tańǵy 06:08-de endi jáne SULET núktesi arqyly tańǵy 06:46-da QR áýe keńistiginen shyqty. QR áýe keńistigin kesip ótken ushaqtyń ushý bıiktigi 11 myń metrdi qurady. Atalmysh reıs kúndelikti oryndalady", - dep málimdedi mekeme.
Odan bólek quzyrly mekeme ushaqtyń qandaı da bir zattardy áýeden shashqany týraly aqparatty joqqa shyǵardy. Basylym málimetine sáıkes, Beıjińnen Dohaǵa bet alǵan ushaq jolaı Qytaıdy, Mońǵolııany, Qazaqstandy, Qyrǵyzstandy, Ózbekstandy, Túrkimenstandy, Iran men Katardy kesip ótedi. Laıner 6 myń shaqyrymnan astam qashyqtyqty eńseredi. Basylymnyń jazýynsha, kópshilik hımııalyq zattarǵa uqsatqan iz ushaqtyń kondensaııalyq izi bolyp tabylady.
Eske salsaq, buǵan deıin de ushaqtyń hımııalyq zattar shashyp júrgeni týraly jalǵan aqparat taraǵan bolatyn.
Sol arada Qytaı ǵalymdary koronavırýspen aýyryp shyqqan adamdardyń aǵzasynda antıdeneler bir aıdyń ishinde azaıyp ketetinin anyqtaǵan.
"Adyrna" ulttyq portaly
