الداعى قىسقى ماۋسىمدا ەۋروپا كوروناۆيرۋسكە قاتىستى كارانتيننەن باس تارتۋدى جوسپارلاپ وتىر. ىندەتتىڭ ەكىنشى تولقىنىندا شۆەتسيا ەلىنىڭ تاجىريبەسىن قولدانۋدى ءجون ساناعان كارى قۇرلىق حالقى كارانتين مەملەكەتكە وراسان زور شىعىن اكەلەتىنىن العا تارتادى دەپ جازادى BBC-اگەنتتىگى.
ەۋروپادا كوكتەمگى كارانتيننەن شىققان حالىقتىڭ اراسىندا ۆيرۋستى جۇقتىرعاندار مەن اجال قۇشقاندار سانى كۇرت ارتقان. سونىمەن قاتار كارانتيندە ۇيگە قامالىپ وتىرۋعا نارازىلىق تانىتىپ، كوشەگە شىققاندار سانى دا كۇرت وسكەن. جۇرتتىڭ جۇمىسسىز ۇيدە وتىرۋى سالدارىنان ەل ەكونوميكاسى ۇلكەن شىعىنعا باتقان. وسىلاردىڭ ءبارىن ەسەپكە العان ەۋروپالىقتار سانيتارلىق تالاپتاردى ساقتاي وتىرىپ، قىستى ەشبىر لوكداۋنسىز وتكىزۋگە بەل بۋىپ وتىر. ىندەتتىڭ ەكىنشى تولقىنىن قالىپتى ومىرمەن باستاۋدى كوزدەگەن ەۋروپالىقتار ۆيرۋسپەن بىرگە ءومىر سۇرۋدەن باسقا جول جوعىن ايتادى.
ەستەرىڭىزدە بولسا، الەم ەلدەرى كارانتين دەپ حالقىن ۇيگە قاماعان شاقتا شۆەتسيا عانا قالىپتى ءومىر ءسۇرۋدى توقتاتپاعان ەدى. ۆيرۋستان ۇيدە وتىرىپ قۇتىلا المايتىندارىن ايتقان شۆەدتەر، بۇل ۆيرۋسپەن بىرگە ءومىر سۇرۋدەن باسقا جول جوعىن دا العا تارتىپ ەدى. شۆەدتەردىڭ وسى تاجىريبەسى وزەگ ەلدەرگە ۇلگى بولعانداي. ەندىگى جەردە ەۋروپا دا شۆەتسيانىڭ تاجىريبەسىنە سۇيەنىپ، الداعى قىستى ەشبىر كارانتينسىز وتكىزۋدى جوسپارلاۋدا. كارانتيننىڭ پايداسىنان زيانى كوپ ەكەنىن نەمىس كانتسلەرى انگەلا مەركەل دە، فرانتسۋز پرەزيدەنتى ەممانۋەل ماكرون دا اشىق ايتقان بولاتىن. Paris Match جۋرنالىنا بەرگەن سۇحباتىندا ەممانۋەل ماكرون: «لوكدانۋ تەك زالال كەلتىرەتىنىن كورە تۇرىپ، ءبىز ەلدەگى ءومىردى توقتاتا المايمىز»، دەدى. ال انگەلا مەركەل كوكتەمگى جاعدايدى كۇرسىنە ەسكە الىپ: «الداعى ۋاقىتتا شەكارالاردى جابۋ جاعدايىنان مەيلىنشە اينالىپ ءوتۋ جولدارىن قاراستىرۋىمىز كەرەك»، دەپ نەمىستەر قىستى لوكداۋنسىز وتكىزەتىنىن مالىمدەدى.
ءدال وسىعان ۇقساس پىكىردى پورتۋگاليا پرەمەر ءمينيسترى انتونيۋ كوشتا دا ايتتى: «ءبىز كوكتەمدە امالسىز بارعان قادامدارىمىزدى الداعى ۋاقىتتا قالاي بولعاندا دا قايتالاماۋىمىز كەرەك. ەل ەكونوميكاسى مەن الەۋمەتتىك تۇرمىسىنا زور شىعىن اكەلگەن كوكتەمگى كارانتين جاعدايىن الداعى قىستا اينالىپ ءوتۋدىڭ تەتىكتەرىن تابۋعا ءتيىسپىز».
ەۋروپا ەلدەرىنىڭ باسشىلارى بىرتىندەپ وسىنداي كەلىسىمگە كەلە باستاسا، ورتا ازيا ەلدەرىندەگى جاعداي قالاي بولار ەكەن؟ دامىعان ەل حالقىنىڭ ءوزى ۆيرۋسپەن بىرگە ءومىر سۇرۋدەن باسقا جول تاپپاي وتىرعاندا، تمد حالقى الداعى قىستا تاعى دا كارانتين دەپ ۇيلەرىنە قامالار ما ەكەن؟ ازىرگە بۇل ماسەلەگە قاتىستى ءوز ەلىمىز قازاقستاندا ناقتى جوسپار تۇزىلە قويمادى. الايدا ىندەتتىڭ كەلەسى تولقىنىنا قازاقستاندىق مەديتسينا تاس ءتۇيىن دايىن وتىرمىز دەپ قازىردىڭ وزىندە حابارلاپ باستادى. بۇل دايىندىقتىڭ قانشالىقتى ساپالى ەكەنىن الداعى ۋاقىتتىڭ ەنشىسىنە قالدىردىق.
«ادىرنا» ۇلتتىق پورتالى.
فوتو اشىق دەرەككوزدەن الىندى.
