“2 ساعاتتا باقىتتى بولۋدىڭ قۇپياسىمەن بولىسەمىن. 1 ميلليون تابۋعا كومەكتەسەمىن”
بۇگىندە وسى تاقىلەتتى جارنامالار ءورىپ ءجۇر. قاتىساسىز با، جوق پا، ءوزىڭىز بىلەسىز. الايدا تۇرمىستاعى تاۋقىمەت ەتەكتەن تارتقاندا، شەشىمىن ىزدەپ ترەنينگكە سابىلاتىنىمىز انىق. جاقىنىڭمەن اراڭدى جوندەپ بەرەم دەگەن سىپايى ساۋەگەيلەر جەتەرلىك. ءسويتىپ، وزىنە دەگەن سەنىمىنەن ايىرىلعان جۇمىر باستى پەندە بىرەۋدىڭ ايتقانىنا كونىپ، ايداعانىنا جۇرەدى.
بەس بالانىڭ اناسى ارمانگۇلدى باقىتتى ايەل بولۋعا باپتايتىن باپكەرگە بىرگە بارۋدى ۇسىنعان قۇربىسى كوندىرە الماعان. ونىڭ ويىنشا:
“20 مىڭ تەڭگەنى ترەنينگكە بەرگەنشە بالاما تاماق اپەرگەنىم ارتىق. وتباسىنداعى ۇرىس-كەرىستى جۇرتقا جايۋدىڭ قاجەتى جوق. ءۇيدىڭ ماسەلەسىن ۇيدە شەشۋ كەرەك.
ترەنينگتىڭ پايدالىسى قايسى، ايلالىسى قايسى، تاڭداۋ قيىن. سوقىر تاۋىققا ءبارى بيداي دەمەكشى، ءوز اقىلىمىزبەن ەمەس، وزگەنىڭ اقىلىنا جۇگىنۋگە قۇلىقتىمىز. ءسوزىنىڭ اۋەنى ترەنينگ سوڭىندا “باقىتتى بولۋدى ۇيرەتەمىن” دەگەنگە سايادى.
المات نۇراددينوۆ، پسيحولوگيا عىلىمدارىنىڭ دوكتورى:
“ولار پسيحولوگيا جايلى شالا-شارپى وقىپ العاندار. وسىلايشا، ادامداردى وزىنە تاۋەلدى ەتىپ قويادى. ەكىنشىدەن، ادامدارعا اقىل ايتا باستايدى. ايتقانىنا ۇڭىلسەڭ، كۇندەلىكتى ومىردە ايتىلىپ جۇرگەن، بىلەتىن دۇنيەلەر. ادەتتە، ترەنينگكە پسيحيكاسى ءالسىز ادامدار بارادى”
اقىماق باستىڭ اقشاسىن اقىلدى الاياقتار قالاي بولعاندا دا سورىپ الۋعا تىرىسادى. ترەنينگتىڭ تىزەسىن شىعارىپ، ودان كوڭىلى قالعاندار دا بار. جيناعانىن دۇمشە ترەنەرگە بەرگەندەر ەندى ترەنينگكە جولامايتىنداي بولعان.
ءوزىنىڭ بىلمەيتىنىن وزگەگە ۇيرەتكىسى كەلگەندەر اۋەلى الەۋمەتتىك جەلىدەگى الەۋەتىن كوتەرەدى. ياعني وقىرمانىن كوبەيتەدى. ولارعا ءوزىن ۇلگىلى كەلىن، اياۋلى جار، ءتۇرلى سالاداعى مىقتى مامان ەتىپ كورسەتەدى.
ءماجىلىس دەپۋتاتى بەكبولات تىلەۋحانوۆ
ترەنەرلەردىڭ ايلاسىنا قۇرىق بويلاماي تۇرعانىنا قاپالى:
“ولارعا توسقاۋىل بولا المايسىڭ. تىڭداۋشى ءوزى ساراپشى، ءوزى سۇزگى بولۋ كەرەك. ونى تىڭداۋعا بولا ما، جوق پا، سول جاعىن ءوزى سارالاعانى ءجون”
ترەنينگ وتكىزۋ بىزگە قايدان كەلدى؟
ەۋروپادان باستاۋ العانىمەن قازىرگى تاڭدا ول جاقتا ترەنەرلەر سانى 20-عا ارەڭ جەتەدى. سەبەبىن قۇندىلىقتارى قۇلدىراپ، ەكونوميكاسى شاتقاياقتاپ تۇرعان ەۋروپانىڭ قازىرگى جاعدايىنان دا بايقاۋعا بولادى.
الدانۋدان قالاي قورعانامىز؟
ادامنىڭ جانىن ەمەس، قالتانىڭ قامىن ويلايتىندار جاۋاپكەرشىلىكتەن دە جۇرداي. ەلىمىزدە جەلىلىك ماركەتينگتىڭ جۇمىسىن رەتتەيتىن ارنايى زاڭ جوق. ەگەر ترەنينگكە بارا قالساڭىز ترەنەردەن تۇبىرتەكتى تالاپ ەتىڭىز. تۇبىرتەك بەرىلمەيتىندەي جاعداي بولسا، ول ازاماتتىڭ ۇستىنەن ءىس قوزعالىپ، سوتقا جولدانادى.
ابايشا ايتقاندا، “وزىڭە سەن، ءوزىڭدى الىپ شىعار، اقىلىڭ مەن كۇش-قايراتىڭ ەكى جاقتاپ”. ترەنينگكە تەلمىرمەي، اق پەن قارانى اجىراتىپ، كريتيكالىق ويلاي الاتىن ازاماتتارىمىز كوپ بولعاي!
اياۋلىم ءابىلدا،
“ادىرنا” ۇلتتىق پورتالى
