“2 saǵatta baqytty bolýdyń qupııasymen bólisemin. 1 mıllıon tabýǵa kómektesemin”
Búginde osy taqyletti jarnamalar órip júr. Qatysasyz ba, joq pa, ózińiz bilesiz. Alaıda turmystaǵy taýqymet etekten tartqanda, sheshimin izdep trenıngke sabylatynymyz anyq. Jaqynyńmen arańdy jóndep berem degen sypaıy sáýegeıler jeterlik. Sóıtip, ózine degen seniminen aıyrylǵan jumyr basty pende bireýdiń aıtqanyna kónip, aıdaǵanyna júredi.
Bes balanyń anasy Armangúldi baqytty áıel bolýǵa baptaıtyn bapkerge birge barýdy usynǵan qurbysy kóndire almaǵan. Onyń oıynsha:
“20 myń teńgeni trenıngke bergenshe balama tamaq ápergenim artyq. Otbasyndaǵy urys-keristi jurtqa jaıýdyń qajeti joq. Úıdiń máselesin úıde sheshý kerek.
Trenıngtiń paıdalysy qaısy, aılalysy qaısy, tańdaý qıyn. Soqyr taýyqqa bári bıdaı demekshi, óz aqylymyzben emes, ózgeniń aqylyna júginýge qulyqtymyz. Sóziniń áýeni trenıng sońynda “baqytty bolýdy úıretemin” degenge saıady.
Almat NURADDINOV, psıhologııa ǵylymdarynyń doktory:
“Olar psıhologııa jaıly shala-sharpy oqyp alǵandar. Osylaısha, adamdardy ózine táýeldi etip qoıady. Ekinshiden, adamdarǵa aqyl aıta bastaıdy. Aıtqanyna úńilseń, kúndelikti ómirde aıtylyp júrgen, biletin dúnıeler. Ádette, trenıngke psıhıkasy álsiz adamdar barady”
Aqymaq bastyń aqshasyn aqyldy alaıaqtar qalaı bolǵanda da soryp alýǵa tyrysady. Trenıngtiń tizesin shyǵaryp, odan kóńili qalǵandar da bar. Jınaǵanyn dúmshe trenerge bergender endi trenıngke jolamaıtyndaı bolǵan.
Óziniń bilmeıtinin ózgege úıretkisi kelgender áýeli áleýmettik jelidegi áleýetin kóteredi. Iaǵnı oqyrmanyn kóbeıtedi. Olarǵa ózin úlgili kelin, aıaýly jar, túrli saladaǵy myqty maman etip kórsetedi.
Májilis depýtaty Bekbolat Tileýhanov
trenerlerdiń aılasyna quryq boılamaı turǵanyna qapaly:
“Olarǵa tosqaýyl bola almaısyń. Tyńdaýshy ózi sarapshy, ózi súzgi bolý kerek. Ony tyńdaýǵa bola ma, joq pa, sol jaǵyn ózi saralaǵany jón”
Trenıng ótkizý bizge qaıdan keldi?
Eýropadan bastaý alǵanymen qazirgi tańda ol jaqta trenerler sany 20-ǵa áreń jetedi. Sebebin qundylyqtary quldyrap, ekonomıkasy shatqaıaqtap turǵan Eýropanyń qazirgi jaǵdaıynan da baıqaýǵa bolady.
Aldanýdan qalaı qorǵanamyz?
Adamnyń janyn emes, qaltanyń qamyn oılaıtyndar jaýapkershilikten de jurdaı. Elimizde jelilik marketıngtiń jumysyn retteıtin arnaıy zań joq. Eger trenıngke bara qalsańyz trenerden túbirtekti talap etińiz. Túbirtek berilmeıtindeı jaǵdaı bolsa, ol azamattyń ústinen is qozǵalyp, sotqa joldanady.
Abaısha aıtqanda, “ózińe sen, ózińdi alyp shyǵar, aqylyń men kúsh-qaıratyń eki jaqtap”. Trenıngke telmirmeı, aq pen qarany ajyratyp, krıtıkalyq oılaı alatyn azamattarymyz kóp bolǵaı!
Aıaýlym ÁBILDA,
“Adyrna” ulttyq portaly
