پروكۋراتۋرا اقجارقىن تۇرلىبايدى قايتارۋعا قاتىستى مالىمەت بەردى

باس پروكۋروردىڭ ورىنباسارى مارات احمەتجانوۆ قىتايدا ءومىر بويىنا باس بوستاندىعىنان ايىرىلعان اقجارقىن تۇرلىبايدى ەكستراديتسيالاۋ ءتارتىبىن ءتۇسىندىردى، دەپ حابارلادى Sputnik قازاقستان تىلشىسى.

"وعان قاتىستى سوت ۇكىمى زاڭدى كۇشىنە ەندى. بىزدە قىتاي حالىق رەسپۋبليكاسىمەن سوتتالعان ادامداردى بەرۋ تۋرالى كەلىسىم بار. الدىمەن اقجارقىن تۇرلىبايدىڭ ءوزى جازاسىن قازاقستانعا وتەۋگە كەلىسىم بەرىپ، جازباشا ءوتىنىش بەرۋى كەرەك. ودان كەيىن ءبىز ەكىجاقتى كەلىسىم بويىنشا قحر-دىڭ پروكۋراتۋراسىنا سوتتالعان ازاماتىمىزدى بەرۋ تۋرالى حابارلاما جىبەرەمىز", - دەدى احمەتجانوۆ ورتالىق كوممۋنيكاتسيالار قىزمەتىندە وتكەن ونلاين بريفينگتە.

ونىڭ ايتۋىنشا، اقجارقىن تۇرلىبايدىڭ تاراپىنان جازباشا ءوتىنىش ءالى تۇسكەن جوق. بىراق ونى ەلگە قايتارۋعا تولىق مۇمكىندىك بار.

"ول جاقتا اقجارقىن ءومىر بويىنا باس بوستاندىعىنان ايىرىلدى. ءبىز دە وسى قىلمىس ءۇشىن وزىمىزدە قانداي سانكتسيا بار ەكەنىن قارايمىز. مىسالى، قازاقستاندا قىلمىستىق كودەكستىڭ 297-بابى، ياعني، ەسىرتكىنى تاسىمالداۋ مەن ساتۋ بويىنشا ءومىر بويىنا باس بوستاندىعىنان ايىرۋ جازاسى دا قاراستىرىلعان. ەگەر ونىڭ ارەكەتى سوعان سايكەس كەلسە، وندا، مەنىڭشە، بارلىق ماتەريالدى زەردەلەپ شىققاننان كەيىن ونى قازاقستاندا جازاسىن وتەۋ ءۇشىن ەكستراديتسيالاۋعا تولىق مۇمكىندىك بار", - دەپ اتاپ ءوتتى احمەتجانوۆ.

اپپەلياتسيالىق القا ءوز شەشىمىن شىعاردى

وتكەن جىلى گۋانچجوۋ قالاسىنىڭ حالىق سوتى ەسىرتكى كونترابانداسى ءۇشىن ايىپتالعان قازاقستاندىق اقجارقىن تۇرلىبايدى ءومىر بويىنا باس بوستاندىعىنان ايىرۋ تۋرالى ۇكىمدى وزگەرىسسىز قالدىرعان بولاتىن. قورعاۋشى تاراپ سوت ۇكىمىنە شاعىم جاسادى. بىراق تاياۋدا اپەللياتسيالىق ينستانتسيا سوتتىڭ شەشىمىن تاعى وزگەرىسسىز قالدىردى.

بۇگىندە اقجارقىندى قازاقستان رەسپۋبليكاسى مەن قىتاي حالىق رەسپۋبليكاسى اراسىندا سوتتالعان ادامداردى بەرۋ تۋرالى كەلىسىممەن ەكستراديتسيالاۋعا مۇمكىندىك بار. وسى قۇجات 2015 جىلى كۇشىنە ەنگەن بولاتىن. وعان سايكەس، اقجارقىن تۇرلىبايعا قاتىستى ۇكىمدى ورىنداۋدى قىتاي يۋريسديكتسياسىنان قازاقستانعا بەرۋدى قولدانۋعا بولادى.

سوتتالعان ازاماتتى بەرۋ بويىنشا كەلىسسوزدەر قازاقستان باس پروكۋراتۋراسى مەن قحر ۋاكىلەتتى ورگانى اراسىندا جۇرگىزىلەدى.

اقجارقىن تۇرلىبايدىڭ ءىسى

قازاقستان ازاماتى اقجارقىن تۇرلىباي 2014 جىلى ناۋرىزدا گۋانچجوۋ اۋەجايىندا ۇستالعان بولاتىن. وعان شەكارادان 4,5 كەلى ەسىرتكىنى الىپ وتپەك بولدى دەگەن ايىپ تاعىلدى. ول كەزدە وتانداسىمىز 20 جاستا بولعان ەدى. 2015 جىلدىڭ ماۋسىمىندا قىتاي سوتى ونى ءومىر بويىنا باس بوستاندىعىنان ايىردى. سوتتا اقجارقىن شەتەلدىك دوسى الداپ كەتكەنىن ايتىپ، كىناسىن مويىنداعان جوق.

2016 جىلى سوت شەشىمى جويىلىپ، ءىس قايتا قاراۋعا جىبەرىلدى.

2019 جىلى تۇرلىبايدىڭ اناسى زۋحرا سەيتىموۆا قازاقستان پرەزيدەنتىنە كومەك سۇراپ حات جازدى.

كەيىن قاسىم-جومارت توقاەۆ قىتايعا ساپارى كەزىندە اقجارقىن تۇرلىبايدىڭ ماسەلەسىن كوتەرگەن بولاتىن.

قازاقستاننىڭ قىتايداعى ەلشىلىگىنىڭ مالىمەتىنە سۇيەنسەك، تۇرلىباي قاسىنداعى سوتتالعاندارعا اعىلشىن ءتىلىن ۇيرەتىپ ءجۇر. سونىمەن قاتار، كوركەم ادەبيەت وقيدى، دەنە شىنىقتىرۋمەن دە اينالىسادى. قىتاي ءتىلىن جاقسى مەڭگەرىپ العان.