وسىدان بىرنەشە عاسىر بۇرىن اسان قايعى «اياعى جوق، قولى جوق، جىلان قايتىپ كۇن كورەر؟» دەپ تولعانعان ەكەن... اسان ابىز سياقتى تەرەڭنەن تولعاماساق تا، اياق-قولسىز كۇن كورىپ، كۇن كورىپ قانا قويماي الەمدى اۋزىنا قاراتىپ جۇرگەن نيكولاس ۆۋيچيچ ەسىمدى ازاماتتىڭ تاعدىر جولىنا ءۇڭىلىپ كورەيىكشى. مۇمكىن، ءسىزدى دە ويلاندىرار...
اياق-قولسىز نارەستە
1982 جىلى بوريس جانە دۋشكا ۆۋيچيچتاردىڭ وتباسى تۇڭعىشتارى دۇنيەگە كەلەر ءساتتى تاعاتسىزدانا كۇتەدى. جەلتوقسان ايىندا ايتۋلى كۇن دە كەلىپ جەتەدى. ءسابيىنىڭ دۇنيەگە كەلۋ ءساتىن تاماشالاماق بولعان بوريس قولسىز يىقتى كورىپ، تىسقا اتىپ شىعادى. بىرنەشە مينۋتتان كەيىن دالىزگە شىققان دارىگەردەن «مەنىڭ بالامنىڭ قولى جوق پا؟» - دەپ سۇرايدى. ودان: «ءسىزدىڭ بالاڭىزدىڭ قولىمەن قوسا اياعى دا جوق» دەگەن سۋىق حاباردى ەستيدى. العاشىندا نيكتىڭ اتا-اناسى ۇلدارىنىڭ «تەترا-امەليا» سيندرومىمەن دۇنيەگە كەلگەنىنىن بەيحابار بولدى. ولار اياق-قولسىز نارەستەنى قالاي باعارىن بىلمەي، ءتىپتى، اناسى ونى 4 اي بويى ەمىزبەگەن. بىرتە-بىرتە بالا بويىنداعى كەمىستىككە بوي ۇيرەتكەن اتا-انالار ونى قاتارداعى بالالار سياقتى تاربيەلەۋگە، ماپەلەۋگە بارىن سالادى.
اۋىر كەزەڭدەر جانە جەتىستىك باسپالداقتارى
نيك دۇنيەگە كەلگەننەن كەيىن وتا ارقىلى تابانىنداعى بىرنەشە ساۋساق اراسى اجىراتىلادى. بۇل ونىڭ جازىپ ۇيرەنۋىنە، توقاربانى جۇرگىزۋىنە، سكەيت تەبۋىنە سەپتىگىن تيگىزەدى. دەگەنمەن دە، نيك ءوزىنىڭ بويىنداعى ولقىلىعىنان قاتتى قورلاناتىن. كورگەن كوزدەردىڭ ول تۋرالى كۇبىر-سىبىرى، ماڭايىنداعى بالالاردىڭ كەمىستىگىن بەتىنە باسۋى جانىن جەگىدەي جەيتىن. ون جاسىندا ول وزىنە قول جۇمساۋعا شەشىم قابىلدايدى. بىراق، جاقىندارىن ويلاعان نيك اقىماق شەشىمىنەن باس تارتادى. ۋاقىت وتە كەلە حريستياندىققا بەت بۇرىپ، ءمىنسىز ادام بولمايتىنىن، ءمىنسىز بولۋدى قۇداي دا تالاپ ەتپەيتىنىن تۇسىنگەن ول مازا تاپتىرمايتىن ويلارىنان ارىلادى. العاش رەت 17 جاسىندا كوپشىلىك الدىندا شىركەۋدە ۋاعىز وقيدى. 19 جاسىندا كوپتىڭ قولقالاۋىمەن ءوزى وقيتىن گريففيت ۋنيۆەرسيتەتى ستۋدەنتتەرىنىڭ الدىندا ءسوز سويلەپ، جينالعانداردىڭ قوشەمەتىنە يە بولادى.
جاھان جۇرتىنا شابىت سىيلاۋ
نيكولاس ءبىلىم الۋعا، ءوزىن تۇراقتى تۇردە دامىتۋعا اشىق جان. ونىڭ بۋحگالتەرلىك ەسەپ جانە قارجىلىق جوسپارلاۋ ماماندىقتارى بويىنشا جوعارعى ءبىلىمى بار. "اياق-قولسىز ءومىر" قىزمەتىنەن بولەك، ول "Attitude is Altitude" موتيۆاتسيالىق كومپانياسىنىڭ يەسى. موتيۆاتسيالىق باعىتتاعى دارىستەرىن بۇگىنگە دەيىن نيكولاس الەمنىڭ 50-گە جۋىق ەلىندە وقىدى. سپيكەرمەن جولىعۋ ءۇشىن ۇندىستانداعى كەزدەسۋگە 110 مىڭنان اسا ادام جينالعان. قوعامدىق جۇمىستاردان بولەك نيكولاس گولف، فۋتبول، بالىق اۋلاۋ جانە تەڭىزدە سەرفينگ تەبۋمەن اۋەستەنەدى.
وتباسى
موتيۆاتور كاناە مياحارا ەسىمدى ارۋمەن 2012 جىلى وتباسىن قۇرعان. «تەترا-امەليا» تۇقىم قۋالايتىنىنا قاراماستان، نيك پەن كاناەنىڭ بالالارى اتالمىش سيندرومنان ءدىن امان. ەرلى-زايىپتىلار قازىرگى تاڭدا كيەشي، دەيان اتتى ۇلدار جانە وليۆيا، كەللي ەسىمدى ەگىز قىزداردى تاربيەلەپ وتىرعان باقىتتى وتباسى.
تالايدى تاڭداي قاقتىرۋدان جالىقپايتىن نيك ومىردە تاڭعاجايىپ دۇنيەلەردىڭ ورىن الاتىنىنا ۇلكەن سەنىممەن قارايدى. ونىڭ كيىم سورەسىندە جۇپ باتەڭكەنىڭ تۇرۋى سونى اڭعارتسا كەرەك...
اعىن ايدىن،
«ادىرنا» ۇلتتىق پورتالى
