Osydan birneshe ǵasyr buryn Asan Qaıǵy «aıaǵy joq, qoly joq, jylan qaıtip kún kórer?» dep tolǵanǵan eken... Asan abyz sııaqty tereńnen tolǵamasaq ta, aıaq-qolsyz kún kórip, kún kórip qana qoımaı álemdi aýzyna qaratyp júrgen Nıkolas Výıchıch esimdi azamattyń taǵdyr jolyna úńilip kóreıikshi. Múmkin, sizdi de oılandyrar...
Aıaq-qolsyz náreste
1982 jyly Borıs jáne Dýshka Výıchıchtardyń otbasy tuńǵyshtary dúnıege keler sátti taǵatsyzdana kútedi. Jeltoqsan aıynda aıtýly kún de kelip jetedi. Sábıiniń dúnıege kelý sátin tamashalamaq bolǵan Borıs qolsyz ıyqty kórip, tysqa atyp shyǵady. Birneshe mınýttan keıin dálizge shyqqan dárigerden «Meniń balamnyń qoly joq pa?» - dep suraıdy. Odan: «Sizdiń balańyzdyń qolymen qosa aıaǵy da joq» degen sýyq habardy estıdi. Alǵashynda Nıktiń ata-anasy uldarynyń «Tetra-Amelııa» sındromymen dúnıege kelgeninin beıhabar boldy. Olar aıaq-qolsyz náresteni qalaı baǵaryn bilmeı, tipti, anasy ony 4 aı boıy emizbegen. Birte-birte bala boıyndaǵy kemistikke boı úıretken ata-analar ony qatardaǵy balalar sııaqty tárbıeleýge, mápeleýge baryn salady.
Aýyr kezeńder jáne jetistik baspaldaqtary
Nık dúnıege kelgennen keıin ota arqyly tabanyndaǵy birneshe saýsaq arasy ajyratylady. Bul onyń jazyp úırenýine, toqarbany júrgizýine, skeıt tebýine septigin tıgizedi. Degenmen de, Nık óziniń boıyndaǵy olqylyǵynan qatty qorlanatyn. Kórgen kózderdiń ol týraly kúbir-sybyry, mańaıyndaǵy balalardyń kemistigin betine basýy janyn jegideı jeıtin. On jasynda ol ózine qol jumsaýǵa sheshim qabyldaıdy. Biraq, jaqyndaryn oılaǵan Nık aqymaq sheshiminen bas tartady. Ýaqyt óte kele hrıstıandyqqa bet buryp, minsiz adam bolmaıtynyn, minsiz bolýdy qudaı da talap etpeıtinin túsingen ol maza taptyrmaıtyn oılarynan arylady. Alǵash ret 17 jasynda kópshilik aldynda shirkeýde ýaǵyz oqıdy. 19 jasynda kóptiń qolqalaýymen ózi oqıtyn Grıffıt ýnıversıteti stýdentteriniń aldynda sóz sóılep, jınalǵandardyń qoshemetine ıe bolady.
Jahan jurtyna shabyt syılaý
Nıkolas bilim alýǵa, ózin turaqty túrde damytýǵa ashyq jan. Onyń býhgalterlik esep jáne qarjylyq josparlaý mamandyqtary boıynsha joǵarǵy bilimi bar. "Aıaq-qolsyz ómir" qyzmetinen bólek, ol "Attitude is Altitude" motıvaııalyq kompanııasynyń ıesi. Motıvaııalyq baǵyttaǵy dáristerin búginge deıin Nıkolas álemniń 50-ge jýyq elinde oqydy. Spıkermen jolyǵý úshin Úndistandaǵy kezdesýge 110 myńnan asa adam jınalǵan. Qoǵamdyq jumystardan bólek Nıkolas golf, fýtbol, balyq aýlaý jáne teńizde serfıng tebýmen áýestenedi.
Otbasy
Motıvator Kanae Mıahara esimdi arýmen 2012 jyly otbasyn qurǵan. «Tetra-Amelııa» tuqym qýalaıtynyna qaramastan, Nık pen Kanaenyń balalary atalmysh sındromnan din aman. Erli-zaıyptylar qazirgi tańda Kıeshı, Deıan atty uldar jáne Olıvııa, Kellı esimdi egiz qyzdardy tárbıelep otyrǵan baqytty otbasy.
Talaıdy tańdaı qaqtyrýdan jalyqpaıtyn Nık ómirde tańǵajaıyp dúnıelerdiń oryn alatynyna úlken senimmen qaraıdy. Onyń kıim sóresinde jup báteńkeniń turýy sony ańǵartsa kerek...
Aǵyn AIDYN,
«Adyrna» ulttyq portaly
