تۇركيادا كوروناۆيرۋستىق پاندەميا ەكىنشى شىڭىنا جەتتى دەپ حابارلايدى «ادىرنا» ۇلتتىق پورتالى ريا نوۆوستيگە سىلتەمە جاساپ.
دەنساۋلىق ساقتاۋ ءمينيسترى فاحرەتتين كوجانىڭ ايتۋىنشا،
انكارا، ستامبۇل، يزمير جانە شىعىس پروۆينتسيالاردا قاۋىپ جوعارى.
«پاندەميا جالعاسىپ جاتىر. كۇن سايىن ۆيرۋس جۇقتىرعاندار سانى ارتىپ كەلەدى. ءبىز ءبىرىنشى تولقىننىڭ ەكىنشى شىڭىن باستان كەشۋدەمىز»، – دەدى مينيستر.
سونداي-اق، ول 2 قىركۇيەكتە تۇركيادا 1 596 جاڭا جاعداي تىركەلگەنىن جانە بۇل 15 ماۋسىمنان بەرى ورىن العان ەڭ ۇلكەن ءوسىم ەكەنىن ايتتى.
تۇركيادا ۆيرۋس جۇقتىرعانداردىڭ جالپى سانى 275 مىڭعا جەتتى، 6511 ادام قايتىس بولدى.
قازاقستان مەن تۇركيا اراسىنداعى تۇراقتى جولاۋشىلار رەيستەرىنە شەكتەۋ الىندى
ەستەرىڭىزگە سالا كەتەيىك، 27 تامىزدا قازاقستان مەن تۇركيا اراسىنداعى تۇراقتى جولاۋشىلار رەيستەرىنە شەكتەۋ الىنعان بولاتىن. قازىرگى تاڭدا بىرقاتار دارىگەرلەر تۋريستەرگە ەپيدەميالىق تالاپتاردى ساقتاڭىزدار دەپ دابىل قاعۋدا.
«قۇرمەتتى باۋىرلار، وتانداستار! سوڭعى كۇندەرى تۇركيادا COVID-19 ىندەتى قاتتى تارالىپ جاتىر ەكەن. تۇركياعا دەمالۋعا بارعان ازاماتتارىمىز ەلىمىزگە سول ىندەتتى اكەلسە، قىركۇيەك ايىنىڭ سوڭىندا نەمەسە قازان ايىندا كوروناۆيرۋس قايتا ءورشۋى مۇمكىن. ەگەر كۇن سۋىتىپ، «جرۆي» مەن تىماۋ ماۋسىمى باستالعان كەزدە كوروناۆيرۋس جۇقتىرساق، قىناداي قىرىلاتىنىمىز انىق. سوندىقتان، ەلىمىز ۇلكەن قايعى-قاسىرەتكە ۇشىراماس ءۇشىن كوروناۆيرۋس ىندەتىنەن ساقتانۋ شارالارىن ورىنداڭىزدار!»،- دەپ ەسكەرتتى دارىگەر-كارديولوگ داۋرەنبەك مىرزاشۇلى.
«ادىرنا» ۇلتتىق پورتالى
