الماتى قالاسىنىڭ تاۋگۇل شاعىن اۋدانىنداعى كوپقاباتتى تۇرعىن ءۇيدىڭ تۇرعىندارى شاتىرسىز قالىپ، جاۋىن-شاشىننان زارداپ شەگىپ جاتىر، دەپ حابارلايدى “ادىرنا” ۇلتتىق پورتالى حابار اگەنتتىگىنە سىلتەپ.
ايتۋلارىنشا، قاتتى داۋىلدان كەيىن ون كۇن وتسە دە، جوندەۋ جۇمىستارى اياقتالماعان. بۇل تۋرالى Stan.kz اقپارات اگەنتتىگى «حابار» ارناسىنا سىلتەمە جاساپ حابارلادى.
53 ءۇيدىڭ مەتالل شاتىرىن داۋىل ۇشىرىپ اكەتكەن. تۇرعىندار ۋاقىتشا پوليەتيلەنمەن جاۋىپ قويعانىمەن، ول جاڭبىردان قورعاي المادى. اسىرەسە، جوعارعى قاباتتا تۇراتىندار قيىن جاعدايدا. شاتىردان اققان سۋ قابىرعالار مەن توبەگە ءسىڭىپ، ىشكى ارلەۋ جۇمىستارى بۇزىلا باستاعان.
«جاڭبىرلى كۇن ءبىز ءۇشىن تابيعي اپات سەكىلدى. شاتىردى جوندەيمىز دەپ ۋادە بەردى، بىراق ەش ناتيجە جوق. اكىمدىككە دە، پيك-كە دە جۇگىندىك. ءۇش وراما پوليەتيلەن بەرىپ، شاتىردى ءوزىمىز جاپتىق»، – دەيدى تۇرعىن ءلاززات ساتىلحانوۆا.
اكىمدىك وكىلدەرىنىڭ مالىمەتىنشە، مەردىگەر كومپانيامەن بىرلەسىپ شاتىرلاردى قالپىنا كەلتىرۋ جۇمىستارى جوسپارلانعان. الايدا ۇزاققا سوزىلعان جاڭبىر اۋا رايى جۇمىستىڭ باستالۋىنا كەدەرگى كەلتىرىپ وتىر.
«قازىر مەردىگەر ۇيىم الەۋمەتتىك جاۋاپكەرشىلىك اياسىندا جۇمىس ىستەۋدە. شاتىر تولىعىمەن مىرىشتالىپ، نىعايتىلاتىن بولادى. جوندەۋ جۇمىستارى باقىلاۋدا»، – دەدى «الماتى تۇرعىن ءۇي» جشس ديرەكتورى ايدىن قالاباەۆ.
قازىرگى تاڭدا تۇرعىندار تەك جوندەۋ جۇمىستارىنىڭ تەزىرەك باستالۋىن كۇتىپ وتىر. ولار كەشىگۋدىڭ ودان دا اۋىر زارداپتارعا اكەلىپ سوقپاۋىن تىلەيدى.
