وقۋعا تۇسپەي قالساڭىز..

3603
Adyrna.kz Telegram

بيىلعى وقۋ جىلىندا ۇبت-عا 111113 جاس تۇلەك قاتىسىپ، 82 154 تۇلەك شەكتى بالدى جيناعان بولاتىن. قالعان شەكتى بالدى جيناي الماعان نەمەسە ۇيالى تەلەفون، شپورگالكا سىندى تيىم سالىنعان زاتتاردى الىپ كىرگەنى ءۇشىن تەستىلەۋدەن شىعارىلعان وقۋشىلار قايتا تەست تاپسىرا الدى ما؟

تامىز ايىنىڭ 17-20 كۇندەرى تالاپكەرلەر قايتا ۇبت تاپسىرعان بولاتىن. ايتسە دە بۇل تالاپكەرلەر ءۇشىن سوڭعى مۇمكىندىك ەمەس. شەكتى بالل جيناي الماعان تالاپكەرلەر ءوزى تۇسكىسى كەلگەن وقۋ ورنىنا بارىپ، قايتا انىقتاما السا بولادى. ەلىمىزدەگى بىرقاتار جوعارعى وقۋ ورىندارى شارتتى تۇردە تالاپكەرلەردى وقۋعا قابىلدايدى.

شارتتى تۇردە وقۋعا ءتۇسۋ دەگەن نە؟

ەگەر تالاپكەر قايتا كەشەندى تەستىلەۋدەن شەكتى بالدى جيناي الماعان جاعدايدا شارتتى تۇردە جوعارعى وقۋ ورىندارىنا تاپسىرا الادى. جوعارعى وقۋ ورنىمەن كەلىسىمشارت ءبىر اكادەميالىق وقۋ مەرزىمىنە جاسالادى (قىركۇيەك-جەلتوقسان).

شارتتى تۇردە وقۋعا تۇسكەن ستۋدەنت قاڭتار ايىندا قوسىمشا كەشەندى تەستىلەۋ تاپسىرادى.

شارتتى تۇردە قابىلدانعان ستۋدەنت جوعارعى وقۋ ورىنىنىڭ قابىلداۋ كوميسسياسىنا قوسىمشا كەشەندى تەستىلەۋگە قاتىسۋ ءۇشىن ارنايى بلانكتەگى ءوتىنىش تولتىرىپ جانە كەشەندى تەستىلەۋ وتكىزەتىنى ءۇشىن تولەنگەن تۇبىرتەگىن تاپسىرۋ قاجەت.

مەملەكەتتىك گرانتتى ۇتپاي قالساڭىز..

ەلىمىزدەگى جوعارعى وقۋ ورىندارى تالاپكەرلەرگە ارناپ ءبىرشاما مۇمكىندىكتەر بەرىپ وتىر. ءار جوعارعى وقۋ ورنىندا گرانتقا نەمەسە وقۋ اقىسىنا قاتىستى جەڭىلدىكتەرگە قويىلاتىن تالاپتار مەن بەرىلەتىن مۇمكىندىكتەر ءار ءتۇرلى. سونىمەن قاتار “التىن بەلگى” يەگەرى بولساڭىز، نەمەسە كوپبالالى، جارتىلاي جەتىم، الەۋمەتتىك جاعدايى تومەن وتباسىنان شىقساڭىز سىزگە وقۋ اقىسىن تولەۋگە قاتىستى جەڭىلدىكتەر قاراستىرىلعان.

ىشكى نەمەسە رەكتور گرانتىنا دا تۇسۋگە مۇمكىندىكتەرىڭىز بار. ول ءۇشىن ءبىلىم العىڭىز كەلەتىن وقۋ ورداسىنا نەمەسە سىزگە وسىنداي مۇمكىندىك بەرەتىن وقۋ ورنىن ىزدەپ تابۋىڭىزعا بولادى.

اقىلى وقۋعا تۇسكەن جاعدايدا جوو-دا ۇزدىك وقىپ، بالدارىڭىز جوعارى بولعان جاعدايدا گرانتقا اۋىسۋعا قايتا ءوتىنىش جازا الاسىز.

 

 

فوتو الاش ايناسى سايتىنان الىندى

لاۋرا تۇرسىنجان،

"ادىرنا" ۇلتتىق پورتالى

پىكىرلەر