كوسىرەۆ: لۋكاشەنكونى قولداۋىمىز كەرەك

2140
Adyrna.kz Telegram

مينسكىدە باستاۋ العان شەرۋلەر كيەۆتەگى مايداننىڭ جالعاسى. بەلارۋس رەسپۋبليكاسىنداعى ميتينگىلەردى اقش پەن باتىس ەلدەرى ۇيىمداستىرىپ وتىر. بۇنداي پىكىردى ءماجىلىس دەپۋتاتى، قازاقستان كوممۋنيستىك حالىقتىق پارتياسىنىڭ وكىلى ۆلاديسلاۆ كوسىرەۆ ءبىلدىردى دەپ حابارلايدى، «ادىرنا» ۇلتتىق پورتالى malim.kz-كە سىلتەمە جاساپ.

«بەلارۋس ەلىندە بولىپ جاتقان ميتينگىلەر كيەۆتەگى 2013 جىلعى مايداننىڭ جالعاسى. ءسوتسياليزمنىڭ ارالىنا اينالعان بەلارۋس رەسپۋبليكاسى اقش پەن باتىستىڭ تاماعىنداعى سۇيەك قوي. مينسكىدە باستاۋ العان وقيعالارعا باتىس ەلدەرى مەن اقش ارالاسىپ وتىر. الەكساندر لۋكاشەنكو مەملەكەتىن ساقتاپ قالۋ ءۇشىن بارىن سالىپ جاتىر. بىراق قولىنان كوپ نارسە كەلەر ەمەس. پولشا، ۋكرانينا، بالتىق ەلدەرىنىڭ يدەولوگياسى  كۇشتى بوپ تۇر»، -دەدى ءماجىلىس دەپۋتاتى.

بەلارۋس ەلىندە 9 تامىز پرەزيدەنتتىك سايلاۋدان كەيىن جاپپاي ميتينگىلەر باستالدى. ورتالىق سايلاۋ كوميسسياسىنىڭ حابارلاۋىنشا 26 جىل پرەزيدەنتتىك تاقتا وتىرعان الەكساندر لۋكاشەنكو 80,01 پايىزعا يە بولسا، وپپوزيتسيا اتىنان تۇسكەن سۆەتلانا تيحانوۆسكايا 10,09 پايىز عانا داۋىس جيناعان. بۇعان كەلىسپەگەن حالىق جاپپاي كوشەلەرگە شىعا باستادى. بۇنداي شەرۋلەر تاۋەلسىز بەلارۋس تاريحىندا بولعان ەمەس. وتكەن جەكسەنبىدە مينسكىدەگى ورتالىق الاڭعا 200 مىڭنان اسا ادام شىقتى دەگەن اقپارات بار. قازىر 4 مىڭنان اسا ادام تۇرمەگە قامالىپ، كۇشتىك قۇرىلىمدار تاراپىنان ۇرىپ-سوعۋ فاكتىلەرى انىقتالعان. قۇقىق قورعاۋشىلار ادام ولىمدەرىنىڭ دە بولعانىن مالىمدەگەن.

«بەلارۋستا كوممۋنيستتەر بار. جانە ولار ۇلكەن كۇشكە يە. نەگە تىنىش وتىرعاندارىن بىلمەيمىن. ءبىز قازاقستان كوممۋنيستىك حالىقتىق پارتياسى پرەزيدەنتتىك سايلاۋدان كەيىن باستالعان شەرۋلەردى تالقىلاپ جاتىرمىز. سوۆەت وداعى ىدىراعان كەزدە ونىڭ قورعاپ قالاتىن كۇش بار ەدى. بىراق قاشان دا اگرەسسيا باسىم كەلەدى. شىندىقتى قورعاۋشىلار ءالسىز كەلەتىنى بار. بءىز ەۆرازيالىق وداقتىڭ قۇرامىنداعى ەلمىز عوي. لۋكاشەنكونى قولداۋىمىز كەرەك.  رەسەي پرەزيدەنتى پۋتين مەن قازاقستان باسشىسى توقاەۆتىڭ ۇنسىزدىگىن تۇسىنبەيمىن»،دەدى ۆلاديسلاۆ كوسىرەۆ.

 

«ادىرنا» ۇلتتىق پورتالى

پىكىرلەر