«قاراپايىم زاتتار ەكونوميكاسى» باعدارلاماسىنىڭ قاجەتتىلىگى, اسىرەسە قازىرگىدەي ىندەت كەزەڭىندە ايقىندالا ءتۇستى. كورىنبەيتىن سوعىستىڭ كەسىرى كاسىپكەرلىككە دە ءتيىپ جاتقانى تۇسىنىكتى. تۇرالاپ نەمەسە جابىلىپ قالعان كاسىپورىندارعا 15 پايىزبەن نەسيە بەرىپ، ونىڭ 9 پايىزى «دامۋ» قورى ارقىلى سۋبسيديالانۋدا. ال، اگروونەركاسىپتىك كەشەندەگى ءوندىرۋ بويىنشا ونىڭ 10 پايىزى اۋىل شارۋاشىلىعى باسقارماسى ارقىلى سۋبسيديالانادى. سوندا ءىس جۇزىندە كاسىپكەرلەر نەسيەنى 6 جانە 5 پايىزبەن وتەيدى. سۋبسيديالاۋ مەرزىمى ينۆەستيتسيالار ءۇشىن 7 جىل جانە اينالىم قاراجاتىن تولىقتىرۋعا — 3 جىل. بۇل – بيزنەس يەلەرى ءۇشىن وتە وڭتايلى ۇسىنىس.
قاراپايىم زاتتار دەگەندى قارابايىرلاپ تۇسىندىرسەك، بۇل – كۇندەلىكتى قولداناتىن تاۋارلار مەن قىزمەتتەر. ولاردىڭ قاتارىندا توقىما ونىمدەرى مەن جيھاز، ازىق-تۇلىك ونىمدەرى ءوندىرىسى جانە باسقا دا تاۋارلار بار. اتالعان باعىتتى دامىتۋدىڭ قاجەتتىگى تۋرالى قر تۇڭعىش پرەزيدەنتى – ەلباسى ن. نازارباەۆ تا «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا جانە مەملەكەت باسشىسى ق. توقاەۆ «Cىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» حالىققا ارناعان جولداۋىندا اتاپ وتكەن بولاتىن.
بۇل باعدارلاماعا شاعىن جانە ورتا بيزنەس سۋبەكتىلەرى دە، ءىرى بيزنەس وكىلدەرى دە قاتىسا الادى. «قاراپايىم زاتتار ەكونوميكاسى» نەگىزىنەن 2 باعىتتان تۇرادى. ءبىرىنشى – كاسىپكەرلىك سۋبەكتىلەرىنە جەڭىلدەتىلگەن نەسيە ءبولۋ، ەكىنشىسى – جوعارىدا اتالعان ونەركاسىپ سالالارىن دامىتۋ. شىمكەنت قالاسىندا بۇل باعدارلاما شەڭبەرىندە كاسىپكەرلەردەن قۇنى 87,8 ملرد. تەڭگە بولاتىن 92 جوبا بويىنشا ۇسىنىس تۇسكەن. ونىڭ ىشىندە 60-قا جۋىق جوبا ماقۇلدانىپ، بۇگىنگى كۇنگە 7,6 ملرد. تەڭگەگە 37 جوبا قارجىلاندىرىلدى. بۇل جونىندە كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ ماماندارى مالىمدەدى.
سونىمەن قاتار، جىل سوڭىنا دەيىن قوسىمشا 23,3 ملرد. تەڭگەگە 22 جوبانى ەكىنشى دەڭگەيلى بانكتەرمەن قارجىلاندىرۋ جوسپارلانۋدا.
بىلتىر جەكە كاسىپكەرلىك سۋبەكتىلەرىن قولداۋ ءۇشىن قازاقستان رەسپۋبليكاسىنىڭ ۇلتتىق بانكى ءوز قاراجاتى ەسەبىنەن جانە ونىڭ باسقارۋىنداعى قاراجاتتار ەسەبىنەن 600 ملرد تەڭگە بولگەن ەدى. ونىڭ ىشىندە 400 ملرد تەڭگە – وڭدەۋ ونەركاسىبى مەن قىزمەتتەردى ىنتالاندىرۋعا، 100 ملرد تەڭگە – اگروونەركاسىپتىك كەشەندە قايتا وڭدەۋگە، تاعى 100 ملرد تەڭگەسى – اگروونەركاسىپتىك كەشەندەگى وندىرىسكە باعىتتالدى.
2025 جىلعا قاراي «قاراپايىم زاتتار ەكونوميكاسى» اياسىندا 16 مىڭ تۇراقتى جۇمىس ورنىن قۇرىپ، بيۋدجەتكە سالىق تۇسىمدەرىن 1,1, ترلن تەڭگەگە دەيىن جەتكىزۋ كوزدەلىپ وتىر. سول ارقىلى ءوندىرىس كولەمى ارتىپ، يمپورت ۇلەسى 37 پايىزعا قىسقارادى.
شىمكەنت قالاسىندا «قاراپايىم زاتتار ەكونوميكاسى ارقىلى» قارجىلاي كومەك الىپ، شارۋاسىن دوڭگەلەتىپ وتىرعان شارۋا قوجالىقتارى كوپ. ەسەپتى كەزەڭدە مال باسى مەن ونىمدىلىكتىڭ ءوسۋى بايقالىپ وتىر. ماسەلەن، ءىرى قارا مالدىڭ سانى وتكەن جىلدىڭ ءتيىستى كەزەڭىمەن سالىستىرعاندا 12,6 پايىزعا ارتىپ 82,7 مىڭ باستى، قوي مەن ەشكى 5,7 پايىزعا ارتىپ 112,3 مىڭ باستى، ال قۇس 8 پايىزعا ارتىپ، سانى 972,1 مىڭ باسقا جەتكەن.
كورسەتكىشتەردىڭ وسۋىن شارۋالار مال شارۋاشىلىعىن قولداۋ ماقساتىندا بەرىلگەن سۋبسيديا جانە «قاراپايىم زاتتار ەكونوميكاسى» باعدارلاماسىمەن بەرىلگەن قولداۋدىڭ ناتيجەسى دەپ بىلەدى.
قازىردە جۇيەلى جۇمىستاردى جۇرگىزۋدىڭ ناتيجەسىندە وسى جىلدىڭ بىرىنشى جارتىجىلدىعىندا ەت 1,5% ارتىپ، 8,4 مىڭ توننا، ءسۇت 2,8% ارتىپ، 25,7 مىڭ توننا، جۇمىرتقا 23,1% ارتىپ 74,1 ملن. دانا ءوندىرىلدى.
مەملەكەتتەن قارجىلاي قولداۋ الىپ ەت بورداقىلاۋ كاسىبىن دوڭگەلەتىپ وتىرعان «ەت ونىمدەرى KZ» جشس. قاراتاۋ اۋدانى، مارتوبە تۇرعىن الابىندا ورنالاسقان شارۋا قوجالىقتىڭ جالپى اۋماعى 5,5 گا قۇرايدى. سىيىمدىلىعى 3 مىڭ باستىق بورداقىلاۋ الاڭىندا قازىردە 1500 باستان اسا ءىرى قارا مال بورداقىلانىپ جاتىر.
مال بورداقىلاۋ الاڭىنىڭ جۇمىسىمەن تانىستىرۋ بارىسىندا سەرىكتەستىك يەسى وتكەن جىلى بۇقاشىقتاردى بورداقىلاۋ قۇنىن ارزانداتۋ بويىنشا مەملەكەت تاراپىنان 148,1 ملن. تەڭگە كولەمىندە قولداۋ كورسەتىلگەنىن اتاپ ءوتتى. سونىمەن قاتار، 2020 جىلى «قاراپايىم زاتتار ەكونوميكاسى» باعدارلاماسىمەن 100 ملن. تگ نەسيە الىپ، شارۋشىلىعىن كەڭەيتىپ جاتقانىن جەتكىزدى.
بۇدان بولەك، مارتوبە تۇرعىن الابىندا ورنالاسقان اۋىل شارۋاشىلىعى ءونىمىن قايتا وڭدەۋشى، نەگىزىنەن ءسۇت ونىمدەرىن وڭدەۋمەن اينالىساتىن «ەم-نۋر» جشس دە بار. كاسىپورىننىڭ جىلدىق قۋاتتىلىعى 6 600 توننا ءسۇتتى قايتا وڭدەپ، 550 توننا قاتتى ىرىمشىك وندىرۋگە باعىتتالعان. بۇل كاسىپورىن بيىلعى جىلى 262 توننا قاتتى ىرىمشىك وڭدىرىسىنە – 87 987,3 مىڭ تەڭگە سۋبسيديا العان.
سونداي-اق، اۋماعى 2,2 گەكتاردى قۇرايتىن «يلياەۆ» جك وندىرىستىك جىلىجاي كەشەنى اتالعان باعدارلامامەن قارجىلاندىرىلعان. كەشەننىڭ جىلدىق قۋاتتىلىعى 800 توننا قىزاناق وندىرۋگە باعىتتالعان. قازىرگى تاڭدا 600 توننا ءونىم جينالىپتى. ەگىلگەن قىزاناق سورتتارى: «مەرليس» جانە «پەمبە». كاسىپكەردىڭ وندىرىستىك جىلىجاي كەشەنىنىڭ قۇرۋعا جۇمساعان شىعىنىنا مەملەكەت تاراپىنان 139 256,0 مىڭ تەڭگە قولداۋ كورسەتىلگەن.
كامپيت پەن ساعىزدان تابىس تاپقان
«قاراپايىم زاتتار ەكونوميكاسى» بويىنشا مەملەكەتتەن نەسيە الىپ، كاسىبىن ورگە دومالاتقانداردىڭ ءبىرى – شوكولادتى كامپيت جانە ساعىز شىعاراتىن كونديتەرلىك فابريكا «NURTAU distributioncompany» جشس.
ءبىزدىڭ ەلىمىزدە «راحات» جانە «بايان سۇلۋ» سياقتى ەكى-اق كومپانيا كامپيت پەن تاتتىلەر شىعارادى. بار-جوعى ەكەۋ-اق بولعاننان سوڭ دا بولار، كونديتەرلىك ونىمدەردىڭ 80-90 پايىزى باسقا مەملەكەتتەردەن كەلەدى. اۋىلىمىز ارالاس، قويىمىز قورالاس وزبەكتان استاناسى تاشكەنتتە ساعىز شىعاراتىن 12 زاۋىت، كامپيت شىعاراتىن 100-دەن اسا ءوندىرىس ورنى بار ەكەن. ياعني، قازاقستاندا كونديتەرلىك فابريكا اشۋ ءىسى كەزەك كۇتتىرمەيتىن ماسەلەنىڭ ءبىرى. «NURTAU distributioncompany» سول ماسەلەنىڭ بايىبىنا بارىپ, مەملەكەت قولداۋىنا سۇيەنە وتىرىپ، ءوزىمىزدىڭ تازا وتاندىق تاتتىلەر مەن ساعىز شىعارۋدى قولعا الدى. بۇل كومپانيا ەلىمىزدە ساعىز شىعاراتىن جالعىز كاسىپورىن.
شىمكەنتتىك كاسىپكەر داۆرون يۋلداشەۆكە جوعارىداعى باعدارلاما بويىنشا كاسىبىن جۇرگىزۋ ءۇشىن بار بولعانى ءۇش-اق اپتا كەتىپتى. كاسىپكەر جەرگىلىكتى كاسىپكەرلەر پالاتاسىنا بارماستان الدىن ءبىر جىل بويى بانكتەردىڭ تابالدىرىعىن توزدىرعان. ويتكەنى، مۇلىكتىك كەپىلگە قوياتىن دۇنيەسى بولماي قارجى ۇيىمدارىنان نەسيە الا الماپتى.
ولار تاسىمالداۋشىدان – وندىرۋشىگە اينالىپ شىعا كەلدى.
– «Nurtau Distribution company»-دىڭ نەگىزى 2016 جىلى قالانىپ، شەتەلدەردەن جۋىناتىن زاتتار، كونديتەرلىك ونىمدەر مەن ساعىز يمپورتىمەن اينالىسىپ كەلەدى، - دەيدى ديستريبيۋتەرلىك كومپانيا ديرەكتورىنىڭ ورىنباسارى داۆرون يۋلداشەۆ.
«ءبىز شىمكەنت قالاسىنا ساعىز جەتكىزەتىن جالعىز تاسىمالداۋشى ەدىك. ءبىر جىل بۇرىن الىپ-ساتپاي-اق، ءوزىمىز ءوندىرۋگە دايىن ەكەنىمىزدى ۇقتىق. ونىڭ ۇستىنە ساتۋ، بايلانىس، ءونىمدى وتكىزۋ ورىندارى، بارلىق جاعىنان ابدەن تاجىريبە جيناقتادىق، - دەيدى داۆرون. –شوكولادتى كامپيت، پىسپەنان مەن ساعىز وندىرەتىن كاسىپورىن اشۋدى قاتتى ارماندادىق. ەكىنشى دەڭگەيلى بانكتەرگە باردىق، بارعان جەرىمىزدىڭ ءبارى دەرلىك مەسەلىمىزدى قايتارىپ تاستادى. ءسويتىپ جۇرگەندە ءبىر تانىسىمىز «كاسىپكەرلەر پالاتاسىنا بارىڭدار» دەپ ۇسىنىس تاستادى. ول جەردەگى ماماندار بىزگە «قاراپايىم زاتتار ەكونوميكاسى» دەگەن ارنايى جوبالىق كەڭسە جۇمىس ىستەيتىنىن، وتاندىق ءونىم ءوندىرىسىن بارىنشا قولدايتىنىن ايتتى. سونىمەن نە كەرەك، ءبىز وسى باعدارلاماعا قاتىستىق. ساراپشىلار يندۋستريالدى ايماقتان 1,3 گەكتار جەردى تەگىن بەرىپ، قۇجات ازىرلەۋ، سونىمەن بىرگە جوبانىڭ جۇزەگە اسۋى ءۇشىن قولىنان كەلگەن كومەگىن ايانىپ قالعان جوق. بانك 330 ميلليون تەڭگە نەسيەنى 6 %بەرەشەگىمەن ماقۇلدادى. ءسويتىپ، قازىرگى زاۋىتىمىزدىڭ قۇرىلىسىن باستاپ كەتتىك».
كومپانيانىڭ كوممەرتسيالىق ديرەكتورى باقىتجان ارىنوۆتىڭ ايتۋىنشا، زاۋىتتىڭ قۇرال-جابدىقتارى مەن قوندىرعىلارى تۇركيادان اكەلىنگەن. زاۋىتتىڭ قۇرىلىسى 9 ايدا تولىعىمەن اياقتالىپ، كاسىپورىن ءوز جۇمىسىن ەلوردا كۇنىنىڭ قارساڭىندا جاڭا تىنىسپەن باستاعان.
قازىردە فابريكادا اي سايىن كامپيتتىڭ 10 ءتۇرى (140 توننا), ساعىزدىڭ 10 ءتۇرى (100 توننا)شىعارىلۋدا. زاۋىتتا 130-عا جۋىق ادام جۇمىس ىستەيدى. ال شيكىزاتتىڭ 80 % وزىمىزدەن، قالعان 20 % شەتەلدەن اكەلىنەدى.
«Lux Shoes» – وتاندىق اياق كيىم برەندى
وتاندىق كاسىپكەرلەر ءوز جەرلەستەرىن تەك كيىندىرىپ قانا قويماي، اياق كيىممەن دە قامتاماسىز ەتۋدە. «Lux Shoes» جشس العاشقى جاۋىن-شاشىندا-اق بىت-شىتى شىقپايتىن تۋفليلەر شىعارىپ جاتىر. بيزنەس-جوسپارىن جاساپ، سەرىكتەستەر مەن تسەح جۇمىسىنا قاجەتتى قوندىرعىلارىن ورناتۋ ءۇشىن بىرنەشە اي قاجەت بولدى. قازىردە شىمكەنتتىك كاسىپكەرلەر ەلىمىزدە ءبىرىنشى بولىپ تازا بىلعارىدان ەرلەر اياق كيىمىن شىعارۋدا. ال ولارعا العاشقى قادامدى جاساۋ ءۇشىن «بيزنەستىڭ جول كارتاسى 2020» جانە «قاراپايىم زاتتار ەكونوميكاسى» سياقتى مەملەكەتتىك باعدارلامالاردىڭ مىقتى قولداۋى قاجەت ەدى.
اياق كيىم فابريكاسىنىڭ سورەلەرىندە 50 ءتۇرلى ۇلگى بار. ول ءار ءتۇرلى ءتۇس پەن تۇرگە يە تۋفليلەر، تابيعي جۇننەن جاسالعان قىستىق اياق كيىم جانە كروسسوۆكالار. بارلىق ۇلگىلەر كورمە زالىنا ورنالاستىرىلعان، ءدال وسى جەردە شيكىزات پەن فۋرنيتۋرا دا بار. كاسىپكەرلەر بىلعارىنى تۇركيادان اكەلەدى ەكەن. ارينە، جولعا كەتكەن شىعىن ءونىم باعاسىن قىمباتتاتپاسا، ارزانداتپاسى انىق. «بىراق، ءوزىمىزدىڭ جەرگىلىكتى بىلعارىمەن جۇمىس ىستەۋ مۇمكىن ەمەس»، - دەيدى.
– ءبىزدىڭ بىلعارىلار 100 پايىز تۇرىكتىكى. قازاقستاندىق بىلعارىنىڭ ساپاسى تومەن، سوندىقتان سايكەس كەلمەيدى. «حالال» ساپاداعى بىلعارىمەن جۇمىس ىستەيمىز. ال جەرگىلىكتى، ءتىپتى، رەسەيلىك وندىرۋشىلەر دوڭىز تەرىسىن پايدالانادى. ال بۇل باسقاشا، ءتىپتى، ءيىسى دە وزگەشە. مۇنداي اياق كيىمدەر ءبىر ماۋسىمعا ارەڭ جەتەدى، - دەدى كاسىبىنىڭ قىر-سىرىمەن بولىسكەن كاسىپكەر نۇرسۇلتان بالابيەۆ.
– فۋرنيتۋرانى دا سىرتتان اكەلىپ جاتىرمىز. 30% جەرگىلىكتى، قالعانىنىڭ ءبارىن تۇركيادان الدىرتامىز. بۇل بىزگە ءتيىمدى بولعاننان ەمەس، سەبەبى، ءبىزدىڭ ەلىمىزدە ءالى اياق كيىم ءوندىرىسى دامىماعان. جەرگىلىكتى بىلعارىلار حالىقارالىق ستاندارتتارعا 50% عانا ساي كەلەدى، رەسەي مەن وزبەكستاندا دا تۋرا سونداي جاعداي. ۋاقىت وتە كەلە ءبىز جۇمىسكەرلەرىمىزدى بىلعارىنى دۇرىس قايتا وڭدەۋگە ۇيرەتىپ، ونى وسى جەردەن-اق ساتىپ الاتىنداي دارەجەگە جەتكىزسەك دەيمىز. بۇل لوگيستيكاعا دا اسەر ەتكەن بولار ەدى، - دەيدى فابريكانىڭ اتقارۋشى ديرەكتورى گايرات حاسانباەۆ.
فابريكانىڭ قۇرىلىسى مەن ىسكە قوسىلۋى 400 ملن تەڭگەگە ءتۇسىپتى. بۇل سومانىڭ ىشىنە جەكە قۇرال-جابدىقتار مەن مەملەكەتتىك قولداۋ، بانكتەن العان قوماقتى قارجى دا كىرەدى. بۇل جەردە تەك تۇرىك قۇرال-سايمانىن عانا ىستەتپەيدى، تۇرىكتەردىڭ شيكىزاتىن دا پايدالانادى. شەتەلدىك ماماندار ازىرگە جەتەكشى رەتىندە ۇيرەتىپ جۇرگەنگە ۇقسايدى. ەكەۋى قۇرىلعىنى باقىلاسا، باس ينجەنەر اياق كيىمنىڭ ساپاسى، ولشەمى، بىلعارىنىڭ قايتا وڭدەلۋىن نازارىندا ۇستايدى.
–ءبىز جۇمىس بارىسىندا ماماندارىمىزدى ۇيرەتىپ جاتامىز. كارانتينگە دەيىن بىزدە 100-دەن اسا ادام جۇمىس ىستەيتىن. كارانتين كەزىندە فابريكا جۇمىسى باسەڭدەپ قالدى. جۇمىسشىلارىمىز اياق كيىم ءوندىرىسىن جاقسى بىلمەيدى، سوندىقتان ولاردى نولدەن باستاپ ۇيرەتىپ جاتىرمىز، - دەيدى كاسىپكەر نۇرسۇلتان بالابيەۆ.
شەبەرحاناداعى ءاربىر قىزمەتكەردىڭ وزىنە بەلگىلەنگەن تاپسىرماسى بار. ءبىرى ديزاينى مەن پىشىمىمەن اينالىسسا، ەكىنشىسى بىلعارىنى دايىندايدى، تاعى ءبىرى وسىنىڭ بارلىعىن كەبىسكە اينالدىرىپ، كەلەسىسى بىرتەگىس قىپ تىگىپ، تاۋاردى بۋىپ-ءتۇيىپ قاپتايدى. ساپا ءاربىر ساتىدا باقىلاۋدا بولادى. فابريكادا كۇنىنە 150 جۇپ اياق كيىم شىعارىلادى. كاسىپورىننىڭ قۋاتتىلىعى كۇنىنە 1500 جۇپتان شىعارۋعا ابدەن جەتەدى. بىراق، ازىرگە بۇل جەردە ءونىم سانىنا قاراپ جاتقان جوق. شەبەرلەر سونشالىقتى اۋقىمدى يگەرە الماي قالا دەپ قورقادى.
قازىردە كاسىپكەرلەر فابريكادا «Lux Shoes»اتتى جەكە برەندپەن اياق كيىمدەر شىعارۋدا. ازىرشە تاۋاردى شىمكەنت پەن تاراز، الماتى، استانا سياقتى جاقىن وبلىستارعا جىبەرىپ جاتىر. قازىرشە لوگيستيكا مەن تاسىمال جاعىنان قيىندىقتار جوق، بىراق، الداعى ۋاقىتتا كاسىپورىندا تمد جانە ورتالىق ازيا ەلدەرىنە ەكسپورتتاۋ جوسپارى بار. بۇنى ىسكە اسىرۋ اسا قيىن ەمەس دەيدى، سەبەبى، ەلىمىزدىڭ وڭتۇستىگىندە تاسىمالداۋ جۇيەسى ايتارلىقتاي دامىعان. سونىمەن بىرگە كاسىپكەرلەرگە ءوندىرىس قۋاتىن الىپ-ساتارلاردىڭ تاپسىرىستارىنىڭ ەسەبىنەن دە ارتتىرۋعا بولادى. مۇنداعى قۇرىلعى كەز كەلگەن برەندتىڭ اياق كيىمىن شىعارۋعا قاۋقارلى كورىنەدى. ال شىمكەنتتتەگى «وڭتۇستىك» ارنايى ەكونوميكالىق ايماعىندا ورىن تەپكەن زاۋىتتىڭ لوگيستيكا ماسەلەسىمەن تاپسىرىس بەرۋشىلەر اينالىساتىن بولادى.
P.S. «قاراپايىم زاتتار ەكونوميكاسى» باعدارلاماسى بءىر عانا شىمكەنتتەن 7,6 ملرد. تەڭگەگە 37 جوبانى قارجىلاندىرۋعا مۇمكىندىك بەردى. بۇل ەلىمىزدىڭ وزگە ايماقتارىنا قاراعاندا جاقسى كورسەتكىش دەپ بىلەمىز. ءۇشىنشى مەگاپوليستەگى ەكونوميكالىق جانە يندۋستريالدىق ايماقتان ءار الۋان باعىتتاعى زاۋىتتار بوي كوتەرىپ، جەرگىلىكتى حالىقتى جۇمىسپەن قامتىپ وتىر. وتاندىق ءونىمدى ساتۋ نارىعى دا جامان ەمەس. 2025 جىلعا قاراي مۇنداي كاسىپكەرلەردىڭ سانى ەسەلەپ ارتادى دەگەن بولجام بار.
تەك ءبىر اتتەگەن-ايى، بىزدە ءالى دە وتاندىق ءونىم 100 % تولىق قۇراممەن شىعارىلمايدى. شيكىزاتى مەن بولشەكتەرىن شەتەلدەردەن الدىرتامىز. ال بۇل ءونىم ساپاسىنا عانا ەمەس، باعاسىنا دا اسەر ەتەدى. سودان ۇزىن-سونار ماسەلەلەر تۋىنداپ كەتە بەرەدى. سوندىقتان، بىزگە تاقيامىزدى اسپانعا اتىپ تۇرىپ «مىنە، ءبىزدىڭ تازا وتاندىق ءونىم!» دەپ ايقاۋلاۋعا ءالى ەرتەلەۋ.
ءماريام ايتباي،
“ادىرنا” ۇلتتىق پورتالى
