بەلارۋس ەلىندە لۋكاشەنكوعا قارسىلىق ميتينگىسى ءالى دە جالعاسۋدا. بۇگىن مينسكى زاۋىتىنىڭ جۇمىسشىلارىنىڭ الدىنا شىققان پرەزيدەنت قايتادان سايلاۋ وتپەيتىنىن مالىمدەدى.
مزكت جۇمىسشىلارىنىڭ "كەت!" دەپ ايقايلاعان سوزىنە، " وسىدان سوڭ "قىسىممەن ءبىر نارسە جاسايدى دەپ ويلاماڭىزدار، مەن ەشقاشان وندايعا بارمايمىن. ولسەم دە، سايلاۋ بولمايدى. سەبەبى، مزكت دا، ماز دا، بەلاز (تراكتور زاۋىتتارى - رەد.) دا قالمايدى، جارتى جىل ىشىندە ءبارى جابىلادى" دەدى لۋكاشەنكو.
پرەزيدەنت ءوز وكىلەتتىگىن ازايتۋعا دايىن ەكەنىن دە ايتتى. بىراق ول كوشەدە ەمەس، كونستيتۋتسيا ارقىلى جۇزەگە اسۋ كەرەك دەپ ەسەپتەيدى.
ال لۋكاشەنكونىڭ سايلاۋداعى باستى قارسىلاسى بولعان سۆەتلانا تيحونوۆسكايا شەرۋگە شىققان حالىقىنا ۇندەۋ جاساپ، بۇرىنعىداي بەيبىت ءومىردى ورناتۋ جولىندا، الەمدىك قاۋىمداستىق مويىندايتىن ءادىل سايلاۋ وتكىزۋ جولىندا ۇلت كوشباسشىسى بولۋعا دايىن ەكەندىگىن مالىمدەدى. ول قانداي جاعدايدا دا تاۋەلسىزدىكتەن ايرىلماۋىمىز كەرەك دەيدى.
بەلارۋس حالقىنىڭ العاشقى كۇندەردەگى ەرەۋىلىنىنەن جۇزدەگەن ادام جارالانىپ، تۇرمەلەرگە قامالعان. وكىنىشكە قاراي كىسى ءولىمى دە بولعان. بيلىك ەرەۋىلشىلەردى ناشاقورلار مەن قاڭعىباستار دەپ ايىپتاعان. جاعدايدىڭ ۋشىعىپ بارا جاتقانىن سەزگەن كۇشتىك قۇرىلىم وكىلدەرى قازىر حالىققا قارسى شىعىپ جاتقان جوق. ءوز كەزەگىندە حالىق تا ەرەۋىلگە اسا مادەنيەتتىلىكپەن شىعۋدا.
بيلىكتىڭ حابارلاۋىنشا، كەشە لۋكاشەنكونى قولداپ 70 (كەبىر دەرەكتەردە 30 مىڭ - اۆت.) مىڭ ادام اكتسياعا شىقتى. ال وعان قارسىلار - 300 مىڭعا دەيىن جەتكەن.
ەل بولعان سوڭ داۋ-داماي بولماي تۇرمايدى. بىراق، ءبىزدى الەكساندر لۋكاشەنكونىڭ الگىندەگى "جارتى جىل ىشىندە زاۋىتتاردىڭ ءبارى جابىلادى" دەگەن ءسوزى قاتتى ويلاندىرادى. سوندا پرەزيدەنت زاۋىتتارىن حالىقپەن ەرەگىسىپ جاپپاق پا؟ الدە...
جانبولات سارىقاسقا،
"ادىرنا" ۇلتتىق پورتالى
