ەلىمىزدە 2025 جىلعا قاراي قولما-قول اقشاسىز جاسالاتىن وپەراتسيالار 90 پايىزدى قۇرايدى

2352
Adyrna.kz Telegram

اقپاراتتىق تەحنولوگيانىڭ قارقىندى دامۋى جانە ينتەرنەتتى كوممەرتسيالىق ماقساتتا قولدانۋ سوڭعى ون جىلدا ەلەكتروندىق ساۋدانىڭ ءبىرشاما ىلگەرلەۋىن كورسەتتى. ياعني، بۇگىنگى كۇنى الەم  نارىعىنا  ەلەكتروندىق كوممەرتسيا نارىعى قوسىلدى. الەم ەلدەرىنىڭ كوپشىلىگى دەرلىك وسى نارىقتان بەلگىلى ءبىر ورنىن الىپ، ونىڭ بەرىپ وتىرعان مۇمكىندىكتەرىن پايدالانىپ قالعىلارى كەلەدى.  ەلەكتروندىق كوممەرتسيا ارقىلى ساۋدا-ساتتىقتى ودان ءارى جانداندىرا تۇسۋگە، باسەكەگە قابىلەتتى بولۋدى ارتتىرۋعا بولادى. ول تءىپتى جالپى ەكونوميكانىڭ دامۋىنا مۇمكىندىك بەرەتىن باعدارلامالاردىڭ ءبىرى دەسە دە بولادى.

ەلەكتروندىق ساۋدا - اينالىمنىڭ كولەڭكەلى كولەمىن تومەندەتۋگە اسەرىن تيگىزەدى دەپ كۇتىلۋدە

ەلىمىزدە باسەكەگە توتەپ بەرەتىن ءوندىرىستى العا قاراي جىلجىتۋ اياسىندا, حالىقتىڭ ساپالى ءومىر ءسۇرۋىن كوزدەيتىن، قاراپايىم حالىققا باعىتتالعان نارىقتىق ەكونوميكانىڭ نەگىزىن قالاۋ – ول بىرىنشىدەن تاۋار تۇرىندەگى اينالىم سالاسىندا رەفورما جاساۋدى تالاپ ەتەدى.

ساۋدا سالاسىنداعى قىزمەت كورسەتۋلەردە كەيبىر ساۋدا جۇيەسىنىڭ مونوپوليستىك ۇستانىمىنان ارىلۋ، شاعىن جانە ورتا بيزنەستى قولداۋدا مەملەكەتتىك ساياساتتى  قولعا الۋ، بەلگىلى ءبىر كاسىپپەن اينالىساتىنداردى زاڭدى تىركەۋگە قويۋ مەن سالىق سالۋ بويىنشا جەڭىلدىكتەر قاراستىرۋ, ىشكى جانە سىرتقى ساۋدادا كەزدەسەتىن وزگە دە ءارتۇرلى كەدەرگىلەردى جويۋ – وسى سالاداعى باسەكەلەستىكتىڭ دامۋىنا ۇلەس قوسادى جانە ەلەكتروندى ساۋدانى ىسكە اسىرۋدىڭ پايدالى سالالارى مەن تەتىكتەرىن دامىتادى.

قازىرگى تاڭدا اقپاراتتىق جانە جاھاندىق دەگەن ەكونوميكانىڭ تۇرلەرى كۇندەلىكتى تىرشىلىگىمىزگە ەندى.

ادامزات دامۋىنىڭ ءدال وسى كەزەڭى تسيفرلىق داۋىرگە اينالىپ وتىرعانى جاسىرىن ەمەس. سول سەبەپتى دە الەمنىڭ كوپتەگەن مەملەكەتتەرىندە «تسيفرلىق ەكونوميكا» باعدارلامالارى قولعا الىندى.

ءبىزدىڭ ەلدە دە 2017 جىلى  "تسيفرلىق قازاقستان" مەملەكەتتىك باعدارلاماسىن بەكىتۋ تۋرالىقازاقستان رەسپۋبليكاسى ۇكىمەتىنىڭ قاۋلىسى قابىلداندى.

اتالعان باعدارلامانىڭ ماقساتى،ونى جۇزەگە اسىرۋ كەزەڭدەرى، ونىڭ باسىم باعىتتارى قانداي، جالپى وسى باعدارلامانى قابىلداعاندا ۇكىمەتتىڭ كوزدەگەنى نە، بۇل باعدارلامانىڭ ەلگە تيگىزەر پايداسى،  نەگىزىنەن قانداي باعىتتاردى قامتيتىنى تۋرالى تولىق اقپاراتتى سىلتەمە ارقىلى ءوتىپ وقۋلارىڭىزعا بولادى.

مۇمكىن ءسىزدىڭ دە وسى «تسيفرلىق قازاقستان» باعدارلاماسىنا بەرەرىڭىز، قوسار ۇلەسىڭىز، ايتار ويىڭىز بار شىعار.

باعدارلامانىڭ نەگىزگى ءبىر باعىتى، ول – «ەكونوميكا سالالارىنداعى تسيفرلىق تۇرلەندىرۋلەر»، دەپ اتالادى. بۇگىنگى ءبىزدىڭ اڭگىمەمىز، وسى باعىتتىڭ ىشىندەى – «ەلەكتروندىق ساۋدا» تۇسىنىگى  تۋرالى بولماق.

جالپى ەلەكتروندىق ساۋدا دەگەندە، كوز الدىمىزعا  قولما-قول اقشاسىز جاسالاتىن ساۋدا وپەرتسيالارى كەلەدى.

ەلەكتروندىق ساۋدا نەمەسە ەلەكتروندىق كوممەرتسياعا  ارنايى ەكونوميكالىق ادەبيەتتەردىڭ،  باسىلىمداردىڭ، مامانداندىرىلعان سايتتاردىڭ، كوپتەگەن زاڭنامالىق ورگاندار مەن  بەدەلدى ۇيىمداردىڭ بەرگەن انىقتامالارى مازمۇنداس بولىپ كەلەدى.

ەلەكتروندىق ساۋدا نەمەسە ەلەكتروندىق كوممەرتسيا – ول ينتەرنەت ارقىلى تاۋارلاردى، ونىمدەردى نەمەسە قىزمەتتەردى ساتىپ الۋ جانە ساتۋ.مۇنى كەيدە – ينتەرنەت كوممەرتسيا دەپ تە اتايدى. بۇل قىزمەتتەر ينتەرنەت جەلىسى ارقىلى ونلاين ۇسىنىلادى. اقشامەن، قورلارمەن جانە دەرەكتەرمەن جاسالاتىن وپەراتسيالار ەلەكتروندىق كوممەرتسيا رەتىندە دە قاراستىرىلادى.  

بۇل ىسكەري وپەراتسيالار ءتورت جولمەن جۇزەگە اسىرىلۋى مۇمكىن: بيزنەس -بيزنەس (B2B), بيزنەس-كليەنت (B2C), كليەنت-كليەنت (C2C), كليەنت-بيزنەس (C2B).  

ەلەكتروندىق كوممەرتسيانىڭ ستاندارتتى انىقتاماسىن – ينتەرنەت ارقىلى جاسالىنعان كوممەرتسيالىق مامىلە دەپ تە قاراستىرۋعا بولادى.  سىز بەن ءبىزدىڭ AliExpress, Amazon, Flip.kz ينتەرنەت-دۇكەندەرىنىڭ سايتتارى ارقىلى جاسايتىن تاپسىرىستارىمىز وسى ەلەكتروندىق ساۋدا بولىپ تابىلادى.

وسى ۋاقىتتا دامىعان جانە دامۋشى ەلدەردە ەلەكتروندىق ساۋدا قارقىندى دامۋدا، ونىڭ وڭ اسەرى بيزنەس سالاسىنا عانا ەمەس، تۇتاستاي العاندا، ەلدەگى حالىقتىڭ ءومىر ءسۇرۋ ساپاسىنا دا اسەرىن تيگىزەدى.

اتاپ ايتقاندا، ەلەكتروندىق كوممەرتسيانىڭ ارقاسىندا، حالىقارالىق ساۋداعا ەنۋ ەسەبىنەن حالىق تومەن باعالارمەن كوپتەگەن تاۋارلارعا قول جەتكىزە الادى. بيزنەسكە ىقپال ەتۋ تۇرعىسىنان قاراعاندا، ەلەكتروندىق كوممەرتسيانىڭ ءوسىپ كەلە جاتقان تانىمالدىلىعى وسى سالادا ءوز بيزنەسىن اشۋعا نيەت بىلدىرگەن ادامدار سانىنىڭ وسۋىنە اكەلەتىندىگىن اتاپ كەتۋ كەرەك.

باعدارلامانىڭ نىسانالى ينديكاتورلارىنىڭ ءبىرى 2022 جىلعا دەيىن بولشەك ساۋدانىڭ جالپى كولەمىندە ەلەكتروندىق ساۋدا ۇلەسىن بىرتىندەپ ءوسىرۋ بولىپ تابىلادى. بۇل كورسەتكىش 2020 جىلى -2,0 پايىزدى، 2021 جىلى 2,3 پايىزعا، 2022 جىلى  2,6 پايىزعا دەيىن ارتتىرۋ كوزدەلۋدە.

«تسيفرلى قازاقستان» مەملەكەتتتىك باعدارلاماسى اياسىندا ەلەكتروندىق ساۋدانىڭ دامۋىن ىنتالاندىرۋ ءۇشىن 2018 جىلدىڭ  باسىنان باستاپ 2023 جىلعا دەيىن تاۋارلاردى ەلەكتروندىق ساتۋمەن اينالىساتىن تۇلعالار ءۇشىن تابىس سالىعىنان تولىقتاي بوساتۋ تۇرىندەگى جەڭىلدىكتەر قاراستىرىلعان.

سونىمەن قاتار، زاڭنامالىق قوردى دامىتۋ اياسىندا سالىق كودەكسىندە «تاۋارلاردى  ەلەكتروندى ساتۋ»، «ينتەرنەت – الاڭ»، «ينتەرنەت – ساۋدا»، «ينتەرنەت – دۇكەن» دەگەن سەكىلدى تىركەستەر ەنگىزىلگەن.  

زاڭدى جانە جەكە كاسىپكەرلەر ءۇشىن جالپى ايقىندالعان تارتىپتە بەس جىلعا ەلەكتروندىق ساۋدا سالاسىندا الىناتىن كورپوراتيۆتى تابىس سالىعىن جانە جەكە تابىس سالىعىن  تولەگەننەن تۇسەتىن كىرىستەردى بوساتۋ بولىگىندە سالىق پرەفەرەنتسيالارى كۇشىنە ەنىپ وتىر.

اتالعان شارالار نەگىزىنەن ەلەكتروندىق ساۋدا سۋبەكتىلەرىن كوبەيتۋگە، سونىمەن قوسا وسى سالاداعى جاڭا سۋبەكتىلەردى تىركەۋگە، اينالىمنىڭ كولەڭكەلى كولەمىن تومەندەتۋگە اسەرىن تيگىزەدى دەپ كۇتىلۋدە.

«تسيفرلى قازاقستان» مەملەكەتتىك باعدارلاماسى اياسىندا كورپوراتيۆتى جانە جەكە تابىس سالىعىنان بوساتىلۋ جەڭىلدىگىنە يە بولۋ ءۇشىن ، ينتەرنەت دۇكەن ۇستاۋشىلار، كاسىپكەرلەر مىناداي شارتتارعا ساي بولۋىلارى كەرەك:

- تاۋار ءۇشىن ەسەپ ايرىسۋدا قولما – قول اقشانىڭ قاتىسۋىنسىز جۇزەگە اسۋى ءتيىس;
- كەلىسىم شارت ونلاين تارتىپتە جاسالۋى قاجەت;
- تاۋاردى جەتكىزۋ قىزمەتى نەمەسە تاۋاردى تاسىمالداۋمەن، جولداۋمەن، جەتكىزۋمەن اينالىساتىن تۇلعامەن جاسالعان شارت بولۋى كەرەك.

ايتا كەتەتىن ءبىر جايىت، ەلەكتروندىق ساۋدادان تۇسكەن تابىس زاڭدى تۇلعانىڭ جىلدىق جيىنتىق تابىسىنان نەمەسە جەكە كاسىپكەردىڭ سالىق كەزەڭىندەگى جالپى جيىنتىق تابىسىنىڭ، از دەگەندە 90 پايىزىن قۇراۋى كەرەك.

قازاقستاندا ەلەكتروندىق ساۋدانىڭ دامۋى

2019 جىلدىڭ قازان ايىنداعى Profit.kzاقپاراتتىق پورتالىنىڭ مالىمەتىنشە 2025 جىلعا قاراي قازاقستاندا e-commerce كولەمى ءبىر تريلليون تەڭگەگە جەتۋى مۇمكىن ەكەن.

«ەلەكتروندىق ساۋدانى دامىتۋ ەكونوميكالىق ءوسۋ ءۇشىن زور الەۋەت بولىپ تابىلادى. ول تاۋار اينالىمىن شەكسىز ۇلعايتۋعا, كەز كەلگەن ەلدىڭ نارىعىنا قول جەتكىزۋگە مۇمكىندىك بەرەدى جانە ترانزيتتىك الەۋەتتى دامىتۋدى قامتاماسىز ەتەدى»، دەلىنگەن ماقالادا.

ءمينيستردىڭ تاپسىرماسى بويىنشا "تسيفرلىق قازاقستان" مەملەكەتتىك باعدارلاماسىنا ۇسىنىستار ەنگءىزۋ ءۇشىن 12 باعىت بويىنشا توپ  قۇرىلعان بولاتىن.

E-commerce بويىنشا جۇمىس توبىنىڭ جەتەكشىلەرى "قازپوچتا" اق باسقارما توراعاسى ساكەن سارسەنوۆ جانە Chocofamily Holding نەگىزىن قالاۋشى جانە يەگەرى راميل مۋحورياپوۆ بولىپ تابىلادى. توپتا بارلىعى 327 قاتىسۋشى بار، ونىڭ ىشىندە 240 — بيزنەس وكىلدەرى بولىپ كەلەدى.

2020 جىلدىڭ مامىر ايىندا سول كەزدەگى  تسيفرلىق ننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆتىڭ توراعالىعىمەن ەلەكتروندىق كوممەرتسيا جونىندەگى جۇمىس توبىنىڭ كەزەكتى وتىرىسى وتكەن بولاتىن. جۇمىس توبى بەلسەندى جۇمىس جۇرگىزىلىپ جاتقان ءۇش باعىت - ينفراقۇرىلىمدى دامىتۋ، ىشكى نارىقتى دامىتۋ جانە سىرتقى نارىققا شىعۋ باعىتتارىن باسا كورسەتكەن ەدى.

ينفراقۇرىلىمدى دامىتۋدىڭ نەگىزگى يدەياسى – كليەنتەردىڭ قاراجاتىن الىپ وتىراتىن ماركەتينگتى تولەم ۇيىمدارى ەمەس دەپ رەسمي تانۋ. ازىرلەۋشىلەردىڭ پىكىرىنشە، بۇل ولاردى سالىق سالۋدان بوساتادى.

قالعان باعىتتارعا كەلەتىن بولساق، زاڭنامالىق اكتىلەرگە بيزنەستى ونلاين رەجيمىندە جۇرگىزۋ راسىمدەرىن جەڭىلدەتۋ بولىگىندە وزگەرىستەر ەنگىزۋ ۇسىنىلدى. بۇدان باسقا، بجت تولەۋشىلەردىڭ تابىسىنا قويىلاتىن تالاپتاردى ەكى ەسە كوتەرۋ ءۇشىن كۋرەرلەرگە بىرىڭعاي جيىنتىق تولەم ارقىلى جۇمىس ىستەۋگە رۇقسات بەرۋ ۇسىنىلادى. "قازپوشتا" ساراپشىسى اتاپ وتكەندەي، بۇل جۇمىس ىستەيتىن جانە سالىق تولەمەيتىن ءوزىن-ءوزى جۇمىسپەن قامتىعانداردى كولەڭكەدەن شىعارۋعا كومەكتەسەدى. وسىلايشا جاڭا جۇمىس ورىندارى قۇرىلادى.

جۇرگىزىلگەن جۇمىستىڭ ارقاسىندا بەس جىلدان كەيىن قازاقستاندا 500 مىڭ جاڭا جۇمىس ورنىن قۇرۋ جوسپارلانۋدا. قازاقستاندىق ينتەرنەت-الاڭداردا ساتىپ الۋ 2 036 ملرد تەڭگەگە جەتەدى، ال قالا ىشىندە كۋرەرلىك جەتكىزۋدىڭ ورتاشا ۋاقىتى 60 مينۋتقا دەيىن قىسقارادى دەپ كۇتىلۋدە.

تەحنولوگيالىق دامۋ كەزەڭىندە الەمدە قولما-قول اقشاسىز تولەمدەر مەن ەلەكتروندىق ساۋدا ەرەكشە ورىن الادى. 2019 جىلدىڭ سوڭىندا e-commerce الەمدىك نارىعىنىڭ كولەمى 3,5 ترلن دوللارعا جەتتى. ال 2020 جىلعا قاراي جاھاندىقەلەكتروندىق بولشەك ساۋدا 27 تريلليون دوللارعا جەتۋى مۇمكىن دەلىنگەن رەسمي اقپارات كوزدەرىندە.

قازاقستانعا كەلەتىن بولساق، بۇل باعىتتىڭ دامۋ جولى ەلىمىزدە ەندى قارقىن الىپ جاتىر. دەگەنمەن، بۇگىنگى كۇنى تۇتىنۋشىلاردىڭ ونلاين – ساۋدا جۇرگىزۋگە، قولما-قول اقشاسىز تولەم جاساۋعا قىزىعۋشىلىعىنىڭ ارتۋىن بايقاۋعا بولادى.

قازىرگى تاڭدا ەلەكتروندىق ساۋدا قازاقستان ەكونوميكاسىنىڭ باسىم باعىتتارىنىڭ ءبىرى بولىپ تابىلادى، ول قولما-قول اقشاسىز تولەمدەرگە كوشۋگە، كولەڭكەلى ساۋدا كولەمىنىڭ تومەندەۋىنە جانە كاسىپكەرلىكتىڭ جالپى وسۋىنە ىقپال ەتەدى. وسىلايشا، 2019 جىلى ەلىمىزدەگى ەلەكتروندىق ساۋدا نارىعىنىڭ جالپى كولەمى 702 ملرد تەڭگەگە جەتىپ، 2018 جىلمەن سالىستىرعاندا 1,8 ەسەگە ارتتى، ال بولشەك ساۋدانىڭ جالپى كولەمىنىڭ ۇلەسى 3,7% قۇرادى (2018 جىلى — 2,9%).

ال، 2020 جىلعا كەلسەك،  وسى جىلدىڭ بەس ايى بويىنشا قولدا بار مالىمەتتەرگە سۇيەنە وتىرىپ، ەلەكتروندىق ساۋدانىڭ ءبىرشاما ىلگەرى جىلجىعانىن بايقاۋعا بولادى.  بۇعان  بىردەن- ءبىر سەبەپ، الەمدى جايلاعان كوروناۆيرۋس ىندەتىنىڭ كەسىرىنەن ەنگىزىلگەن كارانتيندىك شارالار مەن ءارتۇرلى شەكتەۋلەر بولىپ وتىر. بۇل ساراپشىلار تاراپىنان دا مويىندالعان قۇبىلىس.

«Covid-19 پاندەمياسى ەلىمىزدەگى ەلەكتروندىق ساۋدانىڭ دامۋىنا وڭ اسەر ەتتى. كارانتيننىڭ ەنگىزىلۋى ينتەرنەت ارقىلى ونلاين-ساتىپ الۋدىڭ جانە بەلگىلى ءبىر تولەم وپەراتسيالارىنىڭ تانىمال بولۋىنا ىقپال ەتتى»، دەلىنگەن Profit.kzساراپتامالىق – اقپاراتتىق پورتالىندا.

مىسالى، 2020 جىلعى قاڭتار ايى مەن ءساۋىر ايىنىڭ ارالىعىندا ەلدە قولما-قول اقشاسىز وپەراتسيالاردىڭ كولەمى 2,5 ەسەدەن استام  ۇلعايىپ،   7,4 ترلن تەڭگەنى (2019 جىلى-2,8 ترلن تگ) قۇراعان.  بۇل رەتتە بەس جىل بۇرىن قولما-قول اقشاسىز تولەمدەر كولەمى نەبارى 234,3 ملرد تەڭگە بولعان ەدى.

ال بۇل كورسەتكىش 2020 جىلعى مامىر ايىندا بىردەن 34 پايىزعا نەمەسە 600,4 ملرد تەڭگەگە ءوسىپ 2 364,1 ملرد. تەڭگەگە جەتتى. بۇل وسى قولما – قول اقشاسىز وتكىزىلگەن وپەراتسيالاردى باقىلاۋ تاريحىنداعى ەڭ جوعارعى كورسەتكىش بولىپ وتىر. وتكەن، 2019 جىلدىڭ سايكەس كەزەڭىمەن سالىستىرساق 927, 6 ملرد تەڭگە بولعان كورسەتكىشتەن  2,5 ەسەگە دەيىن وسكەندىگى بايقالادى.

ەلىمىزدە 2025 جىلعا قاراي قولما-قول اقشاسىز تولەمدەردىڭ ۇلەسىن
90% - عا دەيىن جەتكىزۋ جوسپارلانىپ وتىر.

سونىمەن قوسا، قازاقستاندىقتاردىڭ قولدانىستاعى تولەم كارتالارىنىڭ  دا سانى وسۋدە. تولەم كارتالارىنىڭ قازاقستاندىق نارىعى ءوسۋدىڭ وڭ سەرپىنىن كورسەتۋدى جالعاستىرۋدا. 2020 جىلدىڭ باسىندا اينالىستا 32 ملن تولەم كارتاسى بولسا, ونىڭ ىشىندە 57% نەمەسە 18,2 ملن بەلسەندى بولىپ تابىلادى، دەپ حابارلايدى ەلوردا ينفو.

بۇل كورسەتكىشتىڭ ءوسۋىنىڭ نەگىزگى فاكتورلارى -حالىقتىڭ كارتوچكالىق ونىمدەرگە سۇرانىسىنىڭ ارتۋى, ءموبيلدى سەرۆيستەردى دامىتۋ جانە بانكتەردىڭ نيەتتەستىك باعدارلامالارىنىڭ ىسكە قوسىلۋى بولىپ وتىر.

"تولەم كارتالارىن پايدالانا وتىرىپ، تاۋارلار مەن قىزمەتتەرگە اقى تولەۋ ءۇشىن ينفراقۇرىلىمدى دامىتۋ پروتسەسى جالعاسۋدا. تولەم كارتالارىمەن تولەم قابىلدايتىن كاسىپكەرلەر سانى ارتىپ كەلەدى", - دەدى ۇلتتىق بانكتىڭ تولەم جۇيەلەرى دەپارتامەنتىنىڭ ديرەكتورى ەرلان اشىقبەكوۆ.

2019 جىلدىڭ قورىتىندىسى بويىنشا 96 428 كاسىپكەر 161 690 POS-تەرمينالداردى 134 484 ساۋدا نۇكتەلەرىنە ورنالاستىردى. 2018 جىلعى كورسەتكىشتەرمەن سالىستىرعاندا كاسىپكەرلەر سانىنىڭ  17 پايىزعا , ساۋدا نۇكتەلەرىنىڭ 22 پايىزعا،  POS-تەرمينالدار سانىنىڭ  27 پايىزعا وسكەندىگى بايقالادى.

نە دەگەنمەن دە، بۇگىنگى تاڭدا ەلەكتروندىق كوممەرتسيا الەمدىك ەكونوميكانىڭ قارقىندى دامىپ كەلە جاتقان سالالارىنىڭ ءبىرى بولىپ وتىر. كەيبءىر باعالاۋلار بويىنشا، ول جىل سايىن شامامەن 23% - عا وسەدى. بولجام بويىنشا، وسى ونجىلدىقتىڭ سوڭىنا قاراي بۇل سالا 27 تريلليون دوللاردى قۇرايتىن بولادى.

ەلەكتروندىق ساۋدانىڭ ارتىقشىلىعى مەن كەمشىلىگى

ەلەكتروندىق ساۋدانىڭ ارتىقشىلىقتارىنا توقتالا كەتسەك، ول ارينە بىرىنشىدەن ساتۋشىلار ءۇشىن گەوگرافيالىق كەدەرگىلەرسىز، ياعني ساتىپ الۋشىنىڭ ورنالاسقان جەرىنە قاراماستان قىزمەت كورسەتە الۋىندا. ءبىر سوزبەن ايتقاندا جاھاندى قامتۋعا مۇمكىندىك بەرەدى.  ەلەكتروندىق ساۋدا ترانزاكتسيالىق شىعىنداردى ايتارلىقتاي تومەندەتەتۋگە سەپتىگىن تيگىزەدى. بۇل قانداي دا ءبىر عيماراتتى، كەڭسەنى پايدالانۋ ءۇشىن  كەتەتىن كوپتەگەن شىعىنداردى جويادى.

تاعى دا ءبىر ۇلكەن ارتىقشىلىعىول ەلەكتروندىق ساۋدانىڭ ساتىپ الۋشىلار ءۇشىن ۇسىناتىن قولايلىلىعى. ياعني كليەنت كۇنىنە 24ساعات اپتاسىنا 7 كۇن  قاجەتتى زاتىن ساتىپ الاالادى. سايت ۇنەمى جۇمىس ىستەپ تۇرادى، وففلايندۇكەن سياقتى  بەلگىلى ءبىر ۋاقىتقا شەكتەلگەن جۇمىس ۋاقىتى جوق.

ەلەكتروندىق كوممەرتسيانىڭ كەمشىلىكتەرىنەكەلەتىن بولساق، بۇل كوبىنەسە سول ينتەرنەت دۇكەندەردىڭ يەلەرىنە تيەسىلى بولىپ وتىر.

ەلەكتروندىق كوممەرتسيا پورتالىن ىسكە قوسۋ قۇنى جوعارى. جابدىقتار مەن باعدارلامالىق جاساقتامانى ورناتۋ، قىزمەتكەرلەردى وقىتۋ قۇنى، ۇنەمى تەحنيكالىق قىزمەت كورسەتۋ جانە وسىنىڭ ءبارىن ۇيىمداستىرىپ، ۇستاپ تۇرۋ - وتە قىمباتقا سوعادى.

كەيدە ەلەكتروندىق ساۋدا جاساعاندا، مۇنىڭ ارتىندا راسىمەن دە ءتىرى ادام وتىرماعانداي سەزىلۋى مۇمكىن. وسىدان بولىپ، كوپتەگەن برەندتەر مەن ونىمدەر ءۇشىن ماڭىزدى بولىپ كەلەتىن تۇلعاارالىق قاتىناستاردىڭ جىلۋى جەتىسپەي تۇرادى

قاۋىپسىزدىك - بۇل ەلەكتروندىق ساۋدادا الاڭداۋشىلىق تۋدىراتىن تاعى ءبىر ماسەلە. سوڭعى كەزدەرى كليەنتتەردىڭ جەكە اقپاراتتارىنىڭ ۇرلانعاندىعىنا بايلانىستى قاۋىپسىزدىككە نۇقسان كەلتىرگەن، زاڭ  بۇزۋشىلىقتار بولعاندىعى جاسىرىن ەمەس. نەسيە كارتالارىن ۇرلاۋ، جەكە دەرەكتەردى ۇرلاۋ, جەكە ەسەپ شوتتاردى بۇزىپ اقشا الۋ  جانە وسى تەكتەس  ماسەلەلەر  كليەنتتەر تاراپىنان ءالى وزەكتى بولىپ تۇر.

قورىتا كەلگەندە، ءبىز ۆيرتۋالدى الەمگە اياق باستىق،  ەندى ارى قاراي سول  الەمنىڭ تالابىنا ساي بولىپ، سودان ءوز ۇلەسىمىزدى الىپ قالۋ ءۇشىن ارەكەت ەتۋىمىز كەرەك.

ءبىز قالاساق تا قالاماساق تا، تىرشىلىك ەتۋ ءۇشىن، ونلايندى  مەڭگەرىپ، قولدانا  بىلۋىمىز كەرەك.  

ءدال قازىر «تسيفرلى قازاقستان» مەملەكەتتىك باعدارلاماسى اياسىنداعى قولعا الىنىپ جاتقان ءىس-شارالاردىڭ اۋاداي قاجەت ەكەندىگىنە كوزىمىز جەتە ءتۇستى.

اتالعان باعدارلامانىڭ  ىشىندەگى ەلەكتروندىق ساۋدا – ول ەل ەكونوميكاسىن «قالايتىن كىرپىشتىڭ» بىرىنە اينالىپ وتىر. سول سەبەپتى دە ەلىمىزدىڭ كاسىپورىندارىندا،  ەكونوميكاسىندا ەلەكتروندىق ساۋدانى دامىتۋ ءۇشىن مەملەكەتتىك ساياساتتى باعدارلاۋ وڭ باعىت بولىپ تابىلادى.

«ادىرنا» ۇلتتىق پورتالى

پىكىرلەر