قىتايدا برازيليادان يمپورتتالعان تاۋىق ەتىنەن Covid-19 انىقتالدى. بۇل تۋرالى inbusiness.kz Bloomberg اگەنتتىگىنە سىلتەمە جاساپ حابارلادى. قازىر بۇل ەلدىڭ كەدەن قىزمەتكەرلەرى باسقا ەلدەن اكەلىنەتىن تاۋارلاردى تەكسەرۋدە.
تاۋىق ەتىندەگى ۆيرۋستى دەنساۋلىق ساقتاۋ قىزمەتكەرلەرى تەست وتكىزۋ بارىسىندا انىقتاعان. سودان كەيىن ماماندار ءونىمدى ۇستاعان ادامداردى دا تەكسەرىستەن وتكىزدى. بىراق ولاردىڭ ەشقايسىسى اۋرۋعا شالدىقپاعان. ال ساتىلعان ەت دەر ۋاقىتىندا تابىلىپ، زارارسىزداندىرىلدى.
بۇعان دەيىن قىتايدىڭ باسقا قالاسىندا ەكۆادوردان اكەلىنگەن اسشاياننان قاۋىپتى ينفەكتسيا تابىلعان ەدى. وسىعان بايلانىستى قازىر ەلدىڭ كەدەن قىزمەتى بارلىق ازىق-تۇلىك ونىمدەرىنەن، اسىرەسە تەڭىز ونىمدەرى مەن ەتتى ارنايى تەكسەرىستەن وتكىزىپ جاتىر.
ەسكەرە كەتەتىن جايت، شىلدە ايىنان بەرى قىتايدىڭ جەتى قالاسىندا ءونىم قابىنان Covid-19 انىقتالعان بولاتىن. كەي ساراپشىلاردىڭ پىكىرىنشە، ازىق-تۇلىك ونىمدەرىن سالقىن جەردە ساقتاۋ ۆيرۋستىڭ ۇزاق تىرشىلىك ەتۋىنە سەپتىگىن تيگىزەتىن كورىنەدى.
"ادىرنا" ۇلتتىق پورتالى
