قازاقستاندا ءبىرازدان بەرى ۇندەمەي جۇرگەن بيلىكتىڭ بۇرىنعى “بۇلبۇلى” ەرمۇحامەت ەرتىسباەۆ كەزىندە قازاقستاننىڭ بەلارۋستەگى ەلشىسى بولعان. سول ەرتىسباەۆ YouTube-تەگى “Talap” كانالىنداعى ونلاين-كونفەرەنتسيادا بەلارۋستەگى قازىرگى جاعدايعا قاتىستى ءوزىنىڭ كوزقاراسىن بىلدىرگەن ەكەن، دەپ حابارلايدى “ادىرنا” Dalanews.kz-كە سىلتەمە جاساپ.
بۇل ورايدا ەرتىسباەۆ قازاقستان پرەزيدەنتىنىڭ سايلاۋى قالاي وتكەنىن ەسكە سالدى. سول تۇستا قازاقستاننىڭ بەلارۋستەگى ەلشىسى بولعان ەرتىسباەۆ ءدال سول كۇنى مينسكىدەگى سايلاۋ ۋچاسكەسىندە جۇرگەن ەكەن.
“بىزدە ءبارى اشىق جانە تازا ءوتتى. ءدال سولاي بولۋى ءتيىس ەدى. جۇزدەگەن ادام كەلدى داۋىس بەرۋگە. ءبىزدىڭ ۋچاسكەمىزدە توقاەۆ 53,8% داۋىس جينادى، قوسانوۆقا شامامەن 39-40% ادام داۋىس بەردى. بۇل كەرەمەت ناتيجە”، – دەپ باستادى ەرتىسباەۆ.
ونىڭ سوزىنشە، لۋكاشەنكوعا قۋلىق جەتىسپەي، ول وزىنە 80%-دان استام داۋىس “بەرگىزدى”، سولايشا ول قاتەلىك جاساپ قويدى.
– ەگەر لۋكاشەنكو سايلاۋدا 54-55% داۋىس العانداي بولىپ، ال حالىق تيحانوۆسكاياعا 44-45% داۋىس بەردى، دەگەندەي ناتيجە جاريالانعاندا، بەلارۋس بۇلايشا كوتەرىلمەس ەدى. سوسىن لۋكاشەنكو سايلاۋدان كەيىن بارلىق كانديداتتاردى ءوز رەزيدەنتسياسىنا قوناققا شاقىرۋى ءتيىس ەدى. پۋتين سوڭعى سايلاۋدا ءسويتتى ەمەس پە؟
بارلىق كانديداتتاردى جيناپ الدى دا، “داۆايتە، بىرگە جۇمىس ىستەيىك” دەدى. ويتكەنى ديالوگقا شاقىرۋ دەگەن ءادىستىڭ نارازى پيعىلدى باساتىن “قاسيەتى” بار. سوندا دەيمىز، حالىقتىڭ 80% داۋىسىن السا – ولارعا رەزىڭكە وق اتۋدىڭ قاجەتى بولار ما ەدى؟ ءوز سوزىندە حالىقتى “وۆتسى” دەپ، قويعا تەڭەگەنى دە تىم ارتىق بولدى. وتە ماڭىزدى نارسەلەر عوي مۇنىڭ ءبارى. حالىق دەگەن نارازىلىق بىلدىرۋگە قاقىلى. مەن لۋكاشەنكونىڭ كۇش قولدانىپ جاتقانىن قاتەلىك دەپ سانايمىن. حالىق كوشەگە شىقسا – شىقسىن دا، ەرەۋىلىن جاساپ تۇرا بەرسىن. بيلىككە ۋزۋرپاتسيا جاساۋ – قىلمىسقا جاتادى، – دەدى ەرتىسباەۆ.
Dalanews.kz
