شىمكەنت قالاسىندا مادەنيەت، تىلدەردى دامىتۋ جانە ارحيۆتەر سالاسىن دامىتۋ ماساتىندا 2020-2024 جىلدارعا ارنالعان تۇجىرىمداماسى ازىرلەندى. وندا 2022 جىلعا دەيىن قالانىڭ قۇرامداس بولىكتەرى مەن اتاۋى جوق جانە قايتالاناتىن كوشەلەرگە تولىعىمەن جاڭا اتاۋ بەرۋ جوسپارلانىپ وتىر.
جوبانى ىسكە اسىرۋ بارىسىندا قالانىڭ مادەنيەتى مەن ونەرىن شەتەلدەرگە تانىستىرۋ ءۇشىن باسقا ءوڭىر مەكەمەلەرىمەن ىنتىماقتاستىق مەموراندۋمدارىن ءتۇزۋ قولعا الىنعان. بۇل تۇرعىدا 2021 جىلى «تۇركى الەمىنىڭ ۇلتتىق دەلفي ويىندارى» وتكىزىلەدى دەپ كۇتىلۋدە.
مادەنيەت، تىلدەردى دامىتۋ جانە ارحيۆتەر باسقارماسى ماماندارىنىڭ ايتۋىنشا، تۇجىمىدامانىڭ ىسكە اسۋى ناتيجەسىندە تۇرعىنداردىڭ مادەني ءىس-شارالارعا قاتىسۋى 30%-عا ارتىپ، مۋزەيلەر سانى ۇشكە، كونتسەرتتىك ۇيىمدار سانى ەكىگە، مادەنيەت سارايلارىنىڭ سانى 12-گە دەيىن ارتادى.
سونداي-اق، مۇمكىندىگى شەكتەۋلى جانداردىڭ قول جەتىمدىلىگى قامتاماسىز ەتىلگەن مادەنيەت نىساندارىنىڭ ۇلەسى مەن تۇرعىنداردىڭ مادەنيەت ينفراقۇرىلىمدارىنا قولجەتىمدىلىگىن 100 پايىزعا جەتكىزۋ جوسپارلانىپ وتىر.
بۇدان وزگە، ءتىل ماسەلەسىندە مەملەكەتتىك ءتىلدى مەڭگەرگەن تۇرعىنداردىڭ ۇلەسىن – 94,3%، ورىس ءتىلىن مەڭگەرگەن تۇرعىنداردىڭ ۇلەسىن – 87,8%، اعىلشىن ءتىلىن مەڭگەرگەن تۇرعىنداردىڭ ۇلەسىن – 24,4% ارتتىرۋ كوزدەلگەن.
بۇل تۇجىرىمدامادا قالا تۇرعىندارىنىڭ مادەني-تاريحي، كوركەمدىك-ەستەتيكالىق، رۋحاني قۇندىلىقتارىن جەتىلدىرۋدەگى نەگىزگى باعىتتار كورسەتىلگەن.
شىمكەنت قالاسى اكىمىنىڭ ءباسپاسوز قىزمەتى
