تامىز ايىنىڭ ون ءبىرىنشى جۇلدىزىندا جامبىل وبلىسى اكىمدىگى ىشكى ساياسات باسقارماسىنىڭ تاپسىرىسى بويىنشا «ادىرنا» ۇلتتىق-ەتنوگرافيالىق بىرلەستىگى ءابۋ ناسىر ءال-ءفارابيدىڭ 1150 جىلدىعى اياسىندا جاس عالىمداردىڭ، ستۋدەنتتەردىڭ جانە وقۋشىلاردىڭ قاتىسۋىمەن عىلىم جانە تەحنولوگيالاردى دامىتۋعا باۋليتىن فيلم كورسەتتى.
ءفيلمنىڭ تانىستىرىلىمى تاراز قالاسى، ىقىلاس دۇكەنۇلى اتىنداعى مادەنيەت ۇيىندە ءوتتى. فيلم باستالماس بۇرىن «ادىرنا» ۇلتتىق-ەتنوگرافيالىق بىرلەستىگىنىڭ باسشىسى اۋباكىر ارمان سەرىكۇلى ءسوز الىپ، جاستارعا تاعىلىمدى اڭگىمەلەردەن مىسالدار ايتىپ بەردى.
فيلمگە كەلگەن كورەرمەندەردىڭ ءبىرى جامبىلقىزى ايدانا: «كارانتين باستالعالى كينوتەاترعا بارۋ دەگەندى ۇمىتقان ەدىك. ال بۇگىن سونداي تاماشا كوڭىل-كۇيدە انيماتسيالىق مۋلتفيلم جانە دەرەكتى ءفيلمدى تاماشالادىق. ءفيلمنىڭ تاربيەلىك ءمانى زور، ەڭ باستىسى عىلىم مەن بىلىمگە باۋليدى» دەپ قۋانا پىكىر ءبىلدىردى. راسىمەن فيلم جاستاردىڭ بويىندا پاتريوتتىق رۋح قالىپتاستىرىپ قانا قويماي، ءومىر سۇرۋگە دەگەن موتيۆاتسيا سىيلايدى.
شارا سوڭىندا شۋ اۋدانى مادەنيەت ءۇيىنىڭ قىزمەتكەرى ەربوسىن قاسىمبەكوۆ اسەم اۋەنىن شارىقتاتا شىرقادى.
"ادىرنا" ۇلتتىق پورتالى
