بيىل تامىز ايىندا باستالاتىن «Nur Otan» پارتياسىنىڭ پرايمەريزى ناعىز كوشباسشىلاردى انىقتاۋى ءتيىس. سونداي-اق، حالىقتىڭ «مەنىڭ دەپۋتاتىم كىم؟» دەگەن ساۋالىنا جاۋاپ بەرە الاتىنداي جاعداي ورناتۋى كەرەك. بۇل تۋرالى بۇگىن «Nur Otan» پارتياسى جاقتاستارىنىڭ ليگاسى وتكىزگەن ونلاين-كونفەرەنتسيادا پارتيا حاتشىسى الىبەك الدەنەي ايتتى.
ايتا كەتەيىك، ءبىر توپ بەلگىلى بەلگىلى قوعام بەلسەندىلەرىنىڭ باستاماسىمەن قۇرىلعان «Nur Otan» پارتياسى جاقتاستارىنىڭ ليگاسى وسىمەن بىرنەشە رەت zoom-كونفەرەنتسيا وتكىزىپ ۇلگەردى. وعان ليگاعا مۇشە بولعان قوعام بەلسەندىلەرى مەن پارتيا حاتشىلارى قاتىسىپ كەلەدى.
پارتيا ىشىندە پرايمەريز وتكىزۋدىڭ باستى ماقساتتارى مەن مىندەتتەرىنە توقتالعان الىبەك الدەنەي.
«كوپ جاعدايدا – قانداي دا ءبىر ماسەلەگە قاتىستى دۇرىس شەشىم قابىلدانعاننىڭ وزىندە، ەگەر سول شەشىمدەرگە جاۋاپتى ادامدار ءوز ويلارىن اشىق تۇسىندىرمەسە، حالىقتى سوعان جۇمىلدىرا الماسا، ول ءىستىڭ ىسكە اسۋى ەكىتالاي. سوندىقتان دا، ءبىز ءۇشىن پرايمەريز – جاۋاپتى، كاسىبي دەڭگەيى جوعارى، باسەكەگە قابىلەتتى، ءوز ويىن ەركىن جەتكىزە الاتىن، حالىقتىڭ اراسىندا بەدەلى بار، اشىق نەگىزدە ىرىكتەلىپ شىققان ازاماتتاردى پارتيالىق جۇمىسقا تارتۋ. ياعني، ەرتەڭ ولار ءوز اۋدانىنىڭ ماسەلەلەرىن بىلە تۇرا شەشۋ جولدارىن وزدەرى انىقتاپ، حالىقپەن بىرگە سونى تالقىلاپ، ماسليحاتقا نە ماجىلىسكە بارعان كەزدە ۇسىنىستارىن ايقىن دالەلدەر ارقىلى قورعاپ، ىسكە اسىرىلۋىن قاداعالاي الاتىن ادامدار بولۋى كەرەك»، - دەدى ءا.الدەنەي.
قاتىسۋشىلاردىڭ سوزىنشە، قازىرگى دەپۋتاتتار الەۋمەتتىك جەلىلەر مەن ءداستۇرلى باق-تىڭ وزىندە ءجيى سىنعا ۇشىراي باستاعان. تۇرعىندار ولاردان جۇمىستىڭ ناقتى ناتيجەسىن تالاپ ەتىپ حالىقپەن سويلەسۋىن جانە ماڭىزدى سۇراقتاردى اشىق كوتەرۋىن سۇراۋدا.
«وسىنداي جاعدايلاردى بولدىرماۋدىڭ ءبىر تەتىگى – پرايمەريز. پارتيانىڭ اتىنان سايلاۋعا ءتۇسۋ ءۇشىن كەز-كەلگەن ازامات پرايمەريز ارقىلى ءوزىنىڭ وڭىرىندە حالىقپەن كەزدەسىپ، ولاردىڭ پروبلەمالارىن ءبىلىپ، ءتيىستى جاۋاپكەرشىلىك الىپ، سول سايلاۋ بەرۋشىلەردىڭ سوزىمەنەن شىعۋ كەرەك. سوندا، بولاشاقتا حالىقتىڭ كوكەيىندەگى «مەنىڭ دەپۋتاتىم كىم؟» دەگەن ساۋال تۋىندامايتىن بولار. وسىنداي جولمەن سايلانعان ازاماتتار ەرتەڭ جاۋاپكەرشىلىكتى سەزىنىپ، حالىقپەن تىعىز جۇمىس ىستەيدى»، - دەدى بۇل ماسەلەگە قاتىستى ويىن تۇيىندەگەن الىبەك الدەنەي.
“ادىرنا” ۇلتتىق پورتالى
