الماتىنىڭ كورىكتى جەرلەرى

15387
Adyrna.kz Telegram

الماتى قالاسىنا ساياحاتتاپ كەلگەن تۋريستەر مەن قالا قوناقتارىنا “ادىرنا” ۇلتتىق پورتالى وڭتۇستىك استانانىڭ كورىكتى 5 جەرىن ۇسىنادى.

كوكتوبە-الماتىنىڭ قاي شەتىنەن قاراساڭ دا كوزىڭە وتتاي باسىلاتىن كوكتوبەنىڭ بيىك مۇناراسى قالا تۇرعىندارى مەن قوناقتارىنا قول بۇلعاپ وزىنە شاقىرىپ تۇرعانداي. كوكتوبەدە تەك سۇلۋ قالا بەينەسىنە تامسانىپ قانا قويماي, نەشە ءتۇرلى اتراكتسيوندارعا وتىرىپ كوڭىل كوتەرە الاسىز. ءوزىنىڭ كىشىگىرىم زوو-باعى دا بار. تۋريستەردى عانا ەمەس تۇرعىندارىن دا كۇننەن-كۇنگە تاڭقالدىراتىن كوكتوبەنىڭ اسەم بەينەسىن كورۋ ءاربىر جانعا باقىت.

مەدەۋ سپورت كەشەنى-الەمگە اتى شىققان بۇل كەشەننىڭ تاريحى دا تەرەڭدە جاتىر. مەدەۋگە كەلىپ كونكي تەبۋ ءار ادامنىڭ ارمانى شىعار. جوعارعى گورەلنيك سارقىراماسىنىڭ گۇرىلى قوناقتارعا سالەم ايتىپ تۇرعانداي. 800 دەن استام ساتىسى بار باسپالداقپەن جوعارىعا ءمىنىپ-ءتۇسۋدىڭ ءوزى كەرەمەت. سەلدەن قورعاپ تۇراتىن بوگدەر دە قالا ءۇشىن قىزمەت ەتىپ تۇر. مەدەۋدە شىمبۇلاقتاۋ شاتقالىنا اپاراتىن تاس جول بار. تابيعاتى كوز سۇرىندىرەر بۇل جەرگە كەلىپ-كەتىپ جۇرگەن تۋريستەردىڭ سانى دا كۇننەن كۇنگە ارتۋدا.

اتالمىش ەكى جەردە دە(كوكتوبە مەن مەدەۋ) ارقان جول ارقىلى قالانى بيىكتىكتەن تاماشالاي الاسىزدار.

ورتالىق دەمالىس ساياباعى-تازا اۋادا تىنىعىپ، جاقىندارىڭمەن دەمالىپ, كوڭىل كوتەرۋگە ارنالعان ساياباق. نەشە ءتۇرلى اتراكتسيوندار, سپورت الاڭى مەن بالالار الاڭدارى جۇمىستارىن جاساپ، قوناقتارعا قىزمەت ەتەدى. سۋعا تۇسۋگە ارنالعان اكۆاپارك تە جاز ايلارىندا دەمالۋشىلارىن كۇتەدى. قايىق نەمەسە كاتاماراندا سەرۋەندەگەندى ۇناتاتىن جاندار ءۇشىن شاعىن كولشىك تە بار. پارك ىشىندە ورنالاسقان نەمو دەلفيناريءىنىڭ دەلفيندەر قوناقتارعا ءوز ونەرلەرىن كورسەتەدى.

قر تۇڭعىش پرەزيدەنتى پاركى-اۋماعى 73 گا قۇرايتىن دەندروپاركتە اللەيا مەن بۋلۆارلار بار. پاركتە “قازاقستان” مونۋمەنتالدى-ءساۋلەت كومپوزيتسياسى بار. ەسكەرتكىش ورتاسىندا ەلباسى بەينەسى كەسكىندەلگەن. ال بۇركىت قاناتىندا الماتى مەن نۇر-سۇلتان قالالارىنىڭ سيمۆولدارى ورىن العان. 2001 جىلى تۇڭعىش پرەزيدەنتتىڭ ءوز قولىمەن وتىرعىزعان ەمەن اعاشىن دا وسى پاركتەن كورە الاسىزدار. الماتى قالاسىنداعى ەڭ ۇلكەن سۋبۇرقاقتى كورگىلەرىڭىز كەلسە، وندا مىندەتتى تۇردە قر تۇڭعىش پرەزيدەنتى پاركىنە كەلىڭىزدەر.
بوتانيكالىق باق-1932-جىلى اشىلعان بوتانيكالىق باق قالا تۇرعىندارى مەن قوناقتارى ءۇشىن سۇيىكتى دەمالىس ورنى. باقتا 175 مىڭ وسىمدىكتەر جايقالىپ, كەلۋشىلەردىڭ كوز قۋانىشىنا اينالىپ تۇر. ولاردىڭ 1300-ءى ەكزوتيكالىق اعاشتار. كوكتەمگى قۇلپىرعان دالاداي بوتانيكالىق باق تا جىل سايىن جاڭارىپ، تۇرلەنىپ كەلەدى. جانعا سايا سىيلايتىن بۇل ورىندا ءجۇزىپ جۇرگەن اققۋلاردى دا كورە الاسىزدار. كۇردەلى جوندەۋ جۇمىستارىن كورگەن بوتانيكالىق باقتى ارالاپ, وتباسىمەندەمالا الاسىزدار.

لاۋرا تۇرسىنجان،
“ادىرنا” ۇلتتىق پورتالى
پىكىرلەر