الماتى وبلىسى تۋريستىك ولكە. ايماقتا وتكەن جىلى تۋريزم نىساندارى مەن جوبالارىن دامىتۋعا 60, 5 ملرد. تەڭگە ينۆەستيتسيا تارتىلعان. بۇل تۋرالى ءباسپاسوز-تۋرى كەزىندە ءمالىم بولدى، دەپ حابارلايدى وڭىرلىك كوممۋنيكاتسيالار قىزمەتى.
باسقارمانىڭ تىكەلەي مۇرىندىق بولۋىمەن وتكەن ءباسپاسوز-تۋرىندا وڭىردەگى كوركەم مەكەن كەگەن اۋدانىنا قاراستى كولساي جانە قايىڭدى كولدەرى تانىستىرىلدى.
تۇمسا تابيعاتىمەن كورگەن كوزدى جاۋلايتىن سۇلۋلىققا تولى مەكەندە جوندەۋ جۇمىستارى جۇرگىزىلىپ، كەلۋشىلەرگە قولايلى جاعداي جاسالعان.
مامىر ايىنا دەيىن 80 مىڭ تۋريست كولساي كولدەرىن تاماشالاۋعا كەلگەن. الداعى جازعى ماۋسىمدا بۇل كورسەتكىش 3 ەسەگە ۇلعايادى دەپ جوسپارلانعان.
بىلتىر قوس تاۋدىڭ ورتاسىندا ورىن تەپكەن كولسايعا 250 مىڭ ادام كەلسە، بيىل بۇل ساندار 400-دەن اسادى دەپ كۇتىلۋدە.
«وتكەن جىلى كولساي كولدەرىنە تۋريستەردىڭ قاۋىپسىزدىگى ءۇشىن اعاشتان جاياۋ جۇرگىنشى جولى جاسالعان ەدى، بيىل بۇل ءۇردىس جالعاسىن تاۋىپ، قايىڭدى جانە كولساي كولدەرىنە ۇزىندىعى 470 مەتر بولاتىن جول سالىنادى»،-دەدى وبلىستىق تۋريزم باسقارماسىنىڭ باسشىسى قۋانىشبەك ميرامبەكۇلى.
قازىرگى تاڭدا ءدال وسى جەردە ينفراقۇرىلىم ماسەلەسى شەشىم تاۋىپ، كەلۋشىلەرگە كورسەتىلەتىن قىزمەت ساپاسىن جاقسارتۋعا باعىتتالعان جۇمىستار اتقارىلۋدا.
الماتى وبلىسىنىڭ ايشىقتى مەكەنىن كوزبەن كورۋگە كەلەتىن ادامدارعا قولايلى جاعداي جاساۋ مىندەت. بۇل قاتارعا، كۇرە جولدىڭ تاعدىرى دا كىرەدى.
وبلىستىق تۋريزم باسقارماسىنىڭ باسشىسى قۋانىشبەك ميرامبەكۇلىنىڭ ايتۋىنشا، بۇگىندە تۋريزم جانە سپورت مينيسترلىگى ازىرلەگەن 50/50 باعدارلاماسىنىڭ اياسىندا جول سالۋ ءۇشىن ءوتىنىم بەرىلگەن.ءوتىنىم ماقۇلدانسا، تۋريستەر كوپ كەلەتىن اۋماقتا حالىقارالىق ستاندارتتارعا ساي جولدار سالىناتىن بولادى.
ايتا كەتەيىك، وڭىردە تۋريستەردىڭ اعىنىن ۇلعايتۋ ءۇشىن «Tengri Ultra»، «OCEANMEN» سىندى ءىرى جوبالار جۇزەگە اسىرىلادى. جاقىن ارادا، «QAZAQ MARATHON» سپورتتىق شاراسى وتەدى دەپ جوسپارلانعان، مارافونعا 2 مىڭعا جۋىق ادام قاتىسپاق. بۇگىندە الماتى وبلىسىندا ەكو جانە اگروتۋريزمعا باسا نازار اۋدارىلۋدا.
